Romam 10
10
1Kebi̱mi̱m, chi a ni̱r mi̱ne n ti twa̱ba̱ku mangu we di̱Kwama mi di̱ne ke Yisrela a ya swiku. 2N yim mi n chi ki̱bau Kwama yinang aya baku Kwama chiyangu a bunti̱bu a yingki̱ ki̱yilang. 3Yo n chi a yingbu yile wu ki̱suwedu a di̱Kwama, ki̱funti̱bwi ka ru yi chi. N chi a bunti̱bu yile Kwama. 4Nangki̱n yilangu a kur, a di̱Masiya. Di̱ne wu a ke bi̱yili̱me, a ya fiswe wu wauwade we kakku Kwamangu.
Yuki̱ku di̱ne ni̱bi kwang
5M Musa a mwal ya̱m bi̱bu ko ni ka chiru we bunti̱ku yili̱nangu ko, “Kanang wuwule niye wu a bunti̱ yili̱n ti̱te ka ya ti̱kuri.”
6Aya chi bi̱mwali̱li̱mu ya̱m Kwama a fwaatu we yinangu ni ka ya yile we keku bi̱yili̱mang kangu. “Yidu we ni̱r munu mwi n wure ka fi̱l bwadiye?” Kanang chikiye ke a suwe ki̱ni Yesu Masiya. 7Ka mwang fwadu mwi n wure a ya we ni̱r di̱ti̱nu. Kanang chikiye ke a kuku Yesu Masiya we Kwa̱miyu.
8Kano a fwa ko wule? Di̱kwa̱l Kwamanu a kwami̱ntuwe, we a yii mo n ti ni̱r munu, ka nang chikiye di̱kwa̱l niku bi̱yili̱mangu nang wu ni made. 9Ka n fwa ki̱ni yii mo mwi n Yesu Tewuduwe chire, n ke bi̱yili̱mu we ni̱ru mwi, n Kwama a kuku ki̱n we fure, mwang ya yuku. 10Ni ki̱ke bi̱yili̱mu ki̱ni ni̱r, yinu Kwama ka ku ki̱nu naba yile we kakku kangu. Nii ki̱fwadu ki̱ni yi yinu ki̱ya yuku.
11Yinangu bi̱mwali̱li̱mu ya̱m Kwamamu a fwaangu, ka nang wuwule niye wu a ke bi̱yili̱me a di̱ki̱ne a ne nwe dibwi. 12Nangki̱n a ne lakaku we naba ni̱bu Yafudam n ti Yelenamu. N Tewuduwe wiin nang Tewuduwe ka wuwule niye. N ki̱n nang wu ki̱ni ki̱li̱mangu nabwen we bi̱bu ki̱ya ki̱mi̱nu ki̱ni wimu. 13Yinangu bi̱ mwali̱li̱mu ya̱m Kwamam a fwangu, “Kanang wuwule niye wu ka yalu a di̱n Tewuduwe ne ka ya yuku.”
14Yoye n chi ka yal wu a kebu bi̱yili̱m yire? N chi ka ke bi̱yili̱mu we wu n chi a nweebuwe yire? N chi ka nwedi yire ka a ne naba di̱mware wenge? 15Yinu ka ma di̱mwari yire, ka ni̱ba tumbu chiye? Yinang bi̱ mwali̱li̱mu ya̱m a fwa ko, “Ni̱bu ki̱ma di̱mwari̱mu a le!” 16Aya n wure ki̱ke ya̱m bi̱li̱m yinangu faku Yichaya a fwangu, “Tewuduwe n wure a ni bi̱yili̱mu we ya̱m mume?”
17Di̱ne yiko, keku bi̱yili̱mangu ki̱beda a nweku ya̱m bi̱li̱m yinu ni̱bu ki̱nwe di̱mwar ya̱m bi̱li̱mu a dur Masiya. 18Aya mi̱n ma di̱bi̱du, bi̱yili̱m n chi a nwe ba? Bi̱yili̱mu n chi a nwe:
“Ker chi̱nu a bunti̱ ti̱ti̱niti kwang,
ya̱m chimu ti̱n a lam ka wule bale we ti̱ti̱nitu.”
19Mi̱n bi̱ti̱du ki̱da. Ki̱kumang Yisrela a swaanba? M Musa a mwe a ke ko, n Kwama a yi ko,
“Mang yodu ta nwe ki̱fwini
ni̱bu n ke kuumu.
Ti̱nti̱ne, mang yo chi̱nu ta ma ki̱fwini we kuu wu
a swaanbu chiye.”
20Yinu n Yichaya a mu ni̱ru a fwati̱n ko:
“Bi̱bu a baibi̱mu, nang bi̱bu a yayimu.
N yung dur mi̱nu we bi̱bu a no bi̱ti̱bu chi
yinangu ka yayangu.”
21Aya we Yisrela, n Kwama yi ko,
kuko kwadu mi̱n tar fa̱li miyu we bi̱bu a
mabu kwa̱mbi̱r a nweti̱bu diimu.
S'ha seleccionat:
Romam 10: Tula
Subratllat
Copia
Compara
Comparteix
Vols que els teus subratllats es desin a tots els teus dispositius? Registra't o inicia sessió
© 2015, The Nigeria Bible Translation Trust and Wycliffe Bible Translators, Inc. All rights reserved.