Romam 11
11
Ki̱bune Kwama we Yisrela
1Mi̱n bi̱du, n Kwama a ko ni̱bu ki̱mu Yisrela? Ko bayim! Mi̱n m mi̱fwan mi̱n naba Yisrela, a ki̱kuwang Yibrayim, a ki̱fi̱ku Benyami.
2N Kwama a kobu ni̱bu ki̱mu n ki̱n a sutu chi feredimu. Ta swaanbu chi ya̱m Kwamamu a fwa dur a Fa̱ku Yiliyana. Yinangu n Fa̱ku Yiliya a ki a di̱Kwama we Yisrela ko, 3“Tewuduwe, n chi a chi̱beti̱beti̱ fa̱kubu mumu. N chi ki̱badu ka chiti̱ mi̱nu.”
4Yinu n Kwama a ni ki̱n di̱ki̱li̱n yiinu ko wule? N yang dur mi̱nu mi̱n bi̱kam kuniritu ti̱dibiin bi̱bu a siinbu di̱yor Baal wemu.
5Di̱ne yiko, we ki̱swi wu ki̱ka̱nge, bi̱kam we bayim bi̱bu n Kwama sutu chi ki̱ni li̱me komu. 6Sutuki̱ kangu a bunti̱na li̱me, a bunti̱ba nangi̱n ni̱bi ti̱tu ki̱madii. Nangki̱n, ka newe yiko, li̱me a kabu.
7A ma yire ye? Yisrela a mwinti̱n a yaabu ki̱li̱mang Kwamangu. Aya bi̱kami bayim bi̱bu a ya sutuki̱mu a ya ki̱li̱mang Kwamangu, aya bi̱kamu di̱yal Kwamanu a mabu chi ni̱ri tul. 8N Kwama a ni chi fi̱ki̱m ba direbi̱m, nuiyu n ke yiyu ka kuun diin ki̱teliyu n ke yiyu ka nwen diin, a lanta di.
9N Fa̱ku Dauda a fwaate ya̱m bi̱bu ko:
“Yiye a kau chi mi̱n la̱n,
chi ka yo chimi̱n yare,
yam a yo chimi̱n riye.
10Nui chiyu a no di̱ltedu
ke a kudu di we riye no ta̱l chidu ki̱diya kwade.”
Yuku a lanti̱ kuuti yikaiyi kwang
11A lanta di mi̱n bi̱du mi, yo ni̱bu Yafudam a yare, n chi a yar ki̱diya a ne kunna? Ko bayim. Di̱ne ki̱leti chiye, yikaiyi kuuti kwang a ya yuku, di̱ne ke ni̱bu Yafudam a nwe ki̱fwini. 12Ka ki̱leti chiyu a kau ti̱ti̱nitu mi̱n kuliye yinu yare chi a kau kuli we kuutiyu, kur nabwe kulitu ki̱laku chiyangu ka bedi ki̱ne.
13Mi̱n fwa ya̱mu n ti ti̱n Yikayu kuuti, kangu kwer mi̱n fandu chi̱nangu. N yo ni̱r we nangang mangu a la chi. 14N yo we ni̱ru mi mang madi ying ka ni̱bu Yafudam we kubedu ka baddu ko ke chi swiye. 15Yo kwer ti̱ti̱nitu a ya wa̱re di̱ne Yisrela a ko Kwama, a kau fati̱ntu a no bwaatu ka kau ti̱nuwe ka n Kwama yiu Yisrela. 16Ka bale yaa wu kake a nwe biku wauwade, yaa kanodi wauwadu, ka ki̱yinengu yi wauwade, ki̱yangtiyu kano wauwadu ti̱n.
17Aya yikayu we ki̱yange tiyang setunang a chire a di̱ Yibrayime, bi̱kamu ni̱bu Yafudam a ti̱ren. N ti̱n yikayu kuuti yiyu no n ti̱n a tini setuniye di̱kiriyu a ru chi̱n a tiyang. Ki̱ka̱ngu ti̱yati̱ dela Kwamangu a bwa̱u n ti Yibrayim n ti bwesi̱m ki̱m, n chi ware we kuli Kwamatu ki̱ ru chidu ki̱yili̱n tiyang saitunang kangu. 18Aya n ti̱n ti̱mangi daan, ti̱ngadu kwiye we di̱ne a ru chi̱n ta sute ki̱yange we tiyangu. Ti̱tabduwe, n ti̱n ki̱yangti n ke ti̱yini̱n.
19Ta medu ta yidu tiko ki̱yange ti yikiyu a kiyan ke a yo mi ti̱yini̱n. 20We yiko, tabi̱duwe mwi ni̱bu Yafudam a ti̱ren di̱ne kwalan keku bi̱yili̱mange aya m mun n chakakku mun swedu we fi wuko di̱ne keku bi̱yili̱mang mwangu. Ngadu kwiye we, nwe taiyi Kwamayu a la ri̱kaki̱ku. 21Ka n Kwama a dubu ki̱yange ti kiye, yiduwe mwi ka du munu ti̱n. 22Da̱ng yinangu n Kwama ki̱ma li̱me ki̱mati̱ bwar we ni̱bu a yari̱mangu. Ki̱ma li̱me ka niya chakakku we keku bi̱yili̱mange, ki̱ma bwar ka niya kebu bi̱yili̱me. Ka a newe yiko, ka switati̱ munu we a ki̱yange. 23Aya ka ni̱bu Yafudam a ki̱lawe, a ke bi̱yili̱me, n Kwama ka di̱ki̱ti̱ chi we di̱kur lon ki̱nu. 24Ka n Kwama a ke ki̱baddu ka yiu chi̱nu n ti̱n bi̱bu bi̱ki̱n feredimu a no ki̱yangti we tiyang setunang ki̱kirangu wu a ru chintuwe tiyang ki̱yilang kange, chi a no dakabu ka kadi yiko, n ki̱n ka baddu ka la chi ka ruti̱ ni̱bu Yafudam tiyang ki̱ku no n chi wemi̱nangu.
N Kwama ki̱nwe ki̱bune ni̱be kwang
25Mang babu ta kau ki̱dubu we ya̱m bi̱yili̱mu a wudeni̱mu, di̱ne ke ti̱kadu bi̱bu ki̱ri̱ka ka yichimu we. Yisrela a mu ni̱r chi̱ni ti̱ki̱n, a wudu yikayu kuuti mi̱nbu wa̱re. Ka lami̱nti̱ yo ni̱bu n ke ni̱bu Yafudamu n Kwama ki̱baddu ka ridi̱mu ka be bwa di̱Masiya. 26Di̱ne yiko, ni̱bu Yafudam ki̱ni kwang ka swidu, yinanga mwal ko,
“Naba yuke ka chiredu a Siyona;
N ki̱n ka yo Yisrela ka ki̱la bwa di̱Yakubu we.
27Bi̱bu nang ya̱mu mang ma bwa̱ki̱ a ni̱r mi̱ni̱mu
we ki̱dangu mang du chi mi̱n ki̱letiyangu.”
28Ni̱bu Yafudam nabwen a kebu ya̱m bi̱li̱mu di̱ne. Aya ti̱tu a kau li̱me we di̱ chiye. N Kwama a ni chi̱n yikayu kuuti li̱me ko. Aya a mwintuwe n Kwama a tu a sutu ni̱bu Yafudam we bwa̱ki̱ku a mawe n ti tukebu chimangu. 29Ki̱kumang li̱me Kwama n ti di̱yal ki̱nu a sutenbuwe. 30A lakanbu n ti chi̱n we ki̱dangu n ti̱n no ta nwebu diyangu aya ki̱ka̱ngu ti̱ya li̱me Kwama di̱ne ni̱ru ni̱bu Yafudam yungi̱ni̱nu. 31A fiwiine ki̱ka̱ngu#11:31 Ki̱ka̱ngu: ki̱ka̱ngu yikayu tatti̱ki̱dai yika̱riyu a ne ki̱ka̱ngu we mwalku chiyangu., ni̱bu Yafudam nang ni̱bu muli̱ni̱mu, a yo li̱me Kwama ki̱la bwa di̱ chi̱ne. Aya wuka di, n chi ka le yaa Kwama ware n ti yikayu kuuti. 32Nangki̱n, n Kwama a mar ni̱bu yinang ti̱bi̱nti̱li di̱ne ni̱tu ti̱bwilatu. A ma ying ko ke ki̱yung ki̱bune ko we di̱chiye.
Delaku di̱ne Kwama
33Wo, swa̱n kuli yingkitu n ti swaanku Kwamatu yire mwa̱ta̱ku kangu n ti wa̱ri kiyu ne ni yin chakkadu.
34N wure ki̱yim chi a ni̱r Kwamane?
Ka n wure a ya ka maka Tewuduwe bi̱kam ya̱me?
35N wure ka ngau kwiye ko ki̱ni Kwama
ti̱kan chi yinu n Kwama ka ki̱ne?
36Aya a di̱ki̱ne yinu a bwa di̱ki̱ne, a di̱ki̱ne, chitu kwang a di̱ki̱ne. Delaku ki̱diya kwadu n ti ki̱n! Amin.
S'ha seleccionat:
Romam 11: Tula
Subratllat
Copia
Compara
Comparteix
Vols que els teus subratllats es desin a tots els teus dispositius? Registra't o inicia sessió
© 2015, The Nigeria Bible Translation Trust and Wycliffe Bible Translators, Inc. All rights reserved.