Jo-Hibrania 2
2
Warruok en gima duong’
1Mano emomiyo nyaka waket chunywa kuom mako weche ma wasewinjo, mondo kik waba yo. 2Wach Chik mane malaika okelo ne nigi teko, omiyo ng’at mane ok oluwe, kendo ok orite, noyudo kum moromo kode. 3Wan to dwatony nade, ka wajwang’o warruok maduong’ makama? Ruoth Yesu owuon ema nokwongo nyiso ji wach warruokno, eka joma nowinjo wachno nonyisowa ni en adier. 4Nyasaye owuon bende nonyiso ni en adier, kuom timo ranyisi gi honni kod tije madongo mopogore opogore, kendo kuom pogonwa mich mag Roho kaka en owuon odwaro.
Yesu ema telonwa e warruok
5Wawuoyo kuom piny mabiro, to Nyasaye ne ok oketo malaika mondo obed jotend pinyno. 6#Zab 8.4-6.Nitie kamoro e Muma mawacho niya,
“Dhano en ang’o ma dipare?
Koso Wuod dhano en ang’o ma didewe?
7Ne imiyo obedo matin moloyo malaika kuom kinde manok.
Bang’e ne isidhone osimbo mar duong’ kod pak,
8bende ne iketo gik moko duto e bwo tiende.”
Ka Muma wacho ni Nyasaye noketo gik moko duto e bwo tiend dhano, to mano nyiso ni onge gima odong’ ma ok oketoe tekone. To koro pod ok wane ka gik moko duto oket e teko dhano. 9To gima waneno, en mana Yesu, mane Nyasaye omiyo obedo matin moloyo malaika kuom kinde manok mondo otho ni ji duto kuom ng’wonone mar Nyasaye. En ema Nyasaye nosesidhone osimbo mar duong’ kod pak, nikech rem mar tho mane oneno.
10Nyasaye mane ochweyo gik moko duto mondo otine ne dwaro mondo okel nyithinde mang’eny e duong’ne maler. Omiyo noneno ni ber mondo omi jal matelonigi e warruok bed ng’ama kare chuth bang’ neno sandruok. 11Jal mapwodho ji, kaachiel gi jogo mipwodho, giduto gin nyithind ng’at achiel. Mano emomiyo oluongogi ni owetene, ma ok wiye okuot, 12#Zab 22.22.kowacho niya,
“Anahul nyingi ni owetena.
Anapaki gi wer e dier chokruok.”
13 #
Isa 8.17;
Isa 8.18. Owacho bende niya,
“Anaket genona kuom Nyasaye.”
Kendo owacho ni,
“Eri, an ka,
kaachiel gi nyithindo ma Nyasaye osemiya.”
14Emomiyo kaka nyithindogo nigi ringruok mar dhano, e kaka Yesu bende nokawo ringruok mar dhano. Notimo kamano mondo, kuom thone, oketh loch jal man gi teko mar tho, tiende ni Satan, 15kendo mondo ogony joma luoro mar tho osemiyo obedo wasumbini ndalo duto mag ngimagi. 16#Isa 41.8, 9.Nenore malong’o ni ne ok obiro mana ni mondo okony malaika, to nobiro ni mondo okony nyikwa Ibrahim. 17Mano emomiyo nyaka ne obed machalo gi owetene e yore duto, mondo odog jadolo maduong’ mang’won kendo maradier, matiyo e nyim Nyasaye, katimo misango migologo richo mag jo-Nyasaye. 18Kaka koro en owuon osekadho e tem mar neno masira, omiyo koro onyalo konyo jogo mitemo.
S'ha seleccionat:
Jo-Hibrania 2: DHO15
Subratllat
Copia
Compara
Comparteix
Vols que els teus subratllats es desin a tots els teus dispositius? Registra't o inicia sessió
Dholuo DC Bible © Bible Society of Kenya and Bible Society of Tanzania, 1976.