Jo-Hibrania 3
3
Yesu duong’ moloyo Musa
1Emomiyo owetena ma Nyasaye osemiyo obedo joge owuon, kendo ma bende oseluongo mondo odhi ire e polo, paruru Yesu, mane ooro mondo obed Jadolo Maduong’ mar yie ma wahulo. 2#Kwan 12.7.Ne obedo jaadiera ni Nyasaye mane okete e tich mana kaka Musa bende nobedo jaadiera e od Nyasaye. 3Kwar jodhoot moro nigi duong’ moloyo jodhoode. Mano emomiyo Yesu bende duong’ moloyo Musa. 4Jodhoot ka dhoot nigi kwargi, to wuon gik moko duto en Nyasaye. 5Musa nobedo jaadiera e od Nyasaye duto, to mana kaka jatich, kendo nowuoyo kuom gik ma Nyasaye nowacho e ndalo mabiro. 6To Kristo en jaadiera e od Nyasaye kaka wuowi ma jatend od wuon mare. Wan e jood Nyasaye, to mana ka wasiko gi chir kod geno ma ok dog chien.
Yueyo ma Nyasaye oseloso ni joge
7 #
Zab 95.7-11. Onego watim mana gima Roho Maler wacho e Muma ni,
“Winjuru dwond Nyasaye kawuono.
8Kik wiu dog matek
kaka ne wi kwereu odoko matek
kane ging’anyo ni Nyasaye,
e kinde mane giteme e thim.
9Nyasaye wacho niya,
‘Kwereu notema kuno mondo ong’e chunya,
kata obedo ni giseneno gik mane atimo
kuom higni piero ang’wen.
10Mano emomiyo nakecho kod tieng’no,
mi awacho niya,
“Ndalo duto gitamore winjo chikena,
kendo ok ging’eyo yorena,”
11Kuom mano mirima ne omaka, mi akuong’ora ni,
“Ok ginidonj kama antie mondo giyue koda.” ’ ”
12Owetena, beduru motang’ mondo kik ng’ato kuomu bed gi chuny marach matamore yie, mamiyo oweyo Nyasaye mangima. 13To moloyo, jiwreuru ng’ato gi ng’ato kapod iluongo ndalo ni ‘Kawuono’, mondo kik richo gal ng’ato kuomu, mi bed gi chuny matek, 14nimar ka wamako geno mane wachakogo nyaka giko matek, to wanabed jocham gikeni kaachiel gi Kristo.
15 #
Zab 95.7, 8. Muma wachonwa wan bende niya,
“Winjuru dwond Nyasaye kawuono.
Kik wiu dok matek
kaka ne wi kwereu odoko matek
kane ging’anyo ni Nyasaye.”
16 #
Kwan 14.1-35. Ng’ano giri mane ong’anyo kane owinjo dwonde? Donge gin jogo duto mane Musa owuokgo Misri? 17To ng’ano giri mane Nyasaye okechogo kuom higni piero ang’wen? Donge gin joma ne otimo richo, mi ringregi odong’ e thim? 18Koso ng’ano giri mane Nyasaye okuong’ore ni ok nodonj kama entie mondo oyue kode? Ne gin joma notamore winjo wachne. 19Omiyo waneno ni ne ok ginyal donjo kar yueyone nikech ne gitamore yie.
S'ha seleccionat:
Jo-Hibrania 3: DHO15
Subratllat
Copia
Compara
Comparteix
Vols que els teus subratllats es desin a tots els teus dispositius? Registra't o inicia sessió
Dholuo DC Bible © Bible Society of Kenya and Bible Society of Tanzania, 1976.