FILIPAAI DIMA 1
1
1Gbaŋŋu wa yi la man, Pɔla, saani na - man ni Timɔti gba: tirim mun nyɛ Yisa Kirisita Masiiya daaba, ka ti sɔbri n‑tiri ya Naawunni niriba, yaseeba ban bɛ Filipaai tiŋŋa ka bɛ ni ni Yisa Kirisita taaba, yan ni ya gyeeŋŋu kpamma ni ban suŋŋni ba zaa. 2Ti Ba Naawunni tim ya sufudoaa ni alaafɛa, ŋɔn ni ti Dugma Yisa Kirisita.
3N pɛ'ari la m Ba Naawunni saha kam zaa, n yi ti teaari ya yɛla sahanseaa maa. 4Man yi puusi u saha kam, n susiri zaŋŋi n‑kyaŋŋi ya zaa yɛla; ka n lala susigu bɛ la ni sufumaasim, 5yan daa la'am n‑suŋŋi ma zugu - ya suŋŋni ma zaŋŋi n‑kyaŋŋi Naawunni lahabasuŋŋu tuma ziiya, piiligu ni halli ni zuna. 6Dama n niŋi yɛdda, ni, Naawunni ŋɔn pun piili tunsunseesi ya saani la, u nin kyɛ ka a na kyɛnni tooni lala halli ni a naari, Kirisita Masiiya Dabsiri daari saha. 7Ya bɛ la n sufu ni saha kam, ka di zugu di tuya, ni, n niŋi lala yɛdda zaŋŋi n‑kyaŋŋi ya yɛla. Ya la'amni n‑suŋŋni ma n‑nyari Naawunni piinisuma. Di nyɛ la lala man ŋɔn lɔ la kyɔrimi seem ziiya, ni man ŋɔn gyɛrigi sarikatta maa tooni ka wulisiri lahabasuŋŋu maa yɛlimaŋni ŋɔn zɛ seem ziiya m‑paasi. 8Halli Naawunni mammaŋŋa nin sakki, ni, n sufu siri boori ya yɛla hoo Yisa Kirisita sufu ŋɔn boori ya yɛla nimmoosi seem la. 9Ka man susiri Naawunni seem maa nŋɔa: ni, u kur kyɛ ka ya na maali n‑wuri sɔkam pam, ka di dɔli la ya yɛm ni ya sufu ni bamsim an zoaai seem maa. 10Lala nin kyɛ ka ya nin toaai m‑baŋŋi din tu, halli nti paai Kirisita Dabsiri daari la; ka lala saha ya nin ti zaani, galinsɛseelli ka ni. 11Di saha ka yɛlimaŋni tuma zaa nin paali ya, ka a taabu yi la Yisa Kirisita kɔkɔ saani na: di nin kyɛ ka pɛ'abu ni tibsim ti bɛ ni n‑tiri Naawunni.
12Tɔ: ka dinŋɔna, m mabiisi, m boori ya baŋŋi, ni, yɛttɔ'aseesi an paai ma na zaa - ay! a naari nyɛ la: ni, lahabasuŋŋu yɛla kur kyɛnni tooni. 13Dama dinŋɔ n kyɛ ka sɔkam baŋŋi, ni, di nyɛ la Yisa Kirisita zugu ka ba lɔ ma kyɔrimi lala: halli Naaba Kambɔnsi maa ni ban kpalim zaa ti baŋŋi lala. 14Ka ban daa lɔ ma maa zugu n kyɛ ka ti mabiisi pam maali m‑mari sufukpeemni nti moonni Yɛligu maa paalu ni, dabeem ka ni: baseeba ban niŋi Yisa yɛdda pam niŋni lala.
15Tɔ, seeba m bɛ ni n‑niŋni lala karimbaani ni nyamaŋŋa zugu, ni ba yuuri ti du n‑gaari ba taaba; ka seeba mun moonni Kirisita yɛla ba sufu ni yɛlimaŋni ni yɛdda zugu. 16Ii, lala niriba siri moonni ka la wurilim zugu, dama ba baŋŋi, ni, di nyɛ la lahabasuŋŋu zugu ka n zɛya wa, ni n ti wulisi di yɛlimaŋni ŋɔn bɛ seem la. 17Banla muna moonni la Kirisita yɛla nyuuri zappu zugu; ba sufu ni teesa bu dɔli soori, ka ba yɛtti, ni, man ŋɔn kpalim n‑lɔ zugu ba nin kyɛ ka n sufu sa'am. 18Amaa m ba'a ka ba yɛla maa ni: n nya ka Kirisita yɛla yi paalu, ni niriba ti wum, ka n sufu maai di zugu. Di yi nyɛ ba sufu ni yɔmsigu zugu ka ba moonna, bee, ba sufu yɛlimaŋni zugu gba, di ka taalli. Ii, n sufu nin maai 19dama m mi, ni, di zaa nin naayi kyɛ ka n nya fa-m‑basi, ka di nyɛ la yarim wunsusigu zugu, ni Yisa Kirisita Sii la suŋŋsim zugu gba. 20Ii! - m mari la tama ka bu birisira, ni, n bu ya di vi seelikam zaa puuni. Ni, n nin mari dablim n‑tɔ'asi yɛligu maa paalu ni pampaŋŋɔa, hoo man daa pun tɔ'asi ka sahakam. Ka lala nin kyɛ ka Kirisita yuuri du n yɛla zugu, di yi ti nyɛ la man na bɛ ni maa zugu, bee, man ka ni la gba zugu. 21Man saani, n yi ti bɛ n nyɔvuri ni, Kirisita nla: man mun yi ti kpi, anfaani n nyɛ di n‑ti ma. 22Tɔ - n yi ti kpalim m‑bɛ n duniya wa ningbina la ni, n nin toaai n‑tumni n tuma m‑paasi n‑nyari tuma maa bukyi. Ay! - n ku toaai m‑baŋŋi man nin yiisi sɔseaa. 23Sɔya ayi wa n dɔya, ka di mugsi ma ka n ku toaai n‑yiisi yinni: m boori n bakki n‑kyaŋŋi nti bɛ Kirisita saani - lala n sɔa: bee, m ma'ai ni? 24Amaa di mun kpa la talasi ni n kpalim m‑bɛ kpa, ka di nyɛ la yarima suŋŋsim zugu. 25Tɔ: n siri mi halli, ni, lala n nyɛ di. Ni, ka di zugu n nin kpalim n‑na bɛ ya saani, ni ya ti kyɛnni tooni n‑nyari sufupeelim pam ya yɛdda niŋbu zugu. 26Dama n nin laa m‑bɛ ya saani yaasa, ka lala zugu nin kyɛ ka ya sufu maai zaa, ka ya tibgri Kirisita Yisa man yɛla zugu.
27Yɛttɔ'a seelikam zaa yɔri, ya na kpalimma m‑bɛ beesisuŋŋu din sumsi Kirisita lahabasuŋŋu niriba la. Di yi bɛ lala, man yi kyɛ ya saani na n‑nya yan bɛ seem, bee, n na bɛ wa'aligu ka kur wumni ya damni, di zaa nyɛ la yimmu. Dama n nin baŋŋi, ni, ya la'amni m‑bari n‑zaani Sii maa nangbanyinni ni, n‑tumni lahabasuŋŋu yɛdda tuma ni nimbirimoaa. 28Ninvugseeba m bɛ ni m bu boori ya yɛla halli. Amaa yan di zɔri ba yɛla dabeem seelikam zaa zugu. Ba zabboobu wulisiri la ya zaa yɛla, ni, ban nin baasi yɔri, yarim mun nin nya tuliginsim, ka di yi la Naawunni saani na. 29Ya deaari la piini Kirisita yuuri zugu: di pa la yan niŋi u yɛdda seem la kɔkɔa, amaa halli yan di wahala u zugu gba n nyɛ piinisuŋŋu n‑ti ya. 30Ya bu nya? - yan moori seem la, di nyɛ la yan pun nya ka wumni pampaŋŋɔ, ni, man gba moori lala.
S'ha seleccionat:
FILIPAAI DIMA 1: maw
Subratllat
Copia
Compara
Comparteix
Vols que els teus subratllats es desin a tots els teus dispositius? Registra't o inicia sessió
© 2002, Wycliffe Bible Translators, Inc. All rights reserved.