ƐFƐSUSI DIMA 6
6
1Biisi, ya wumni n‑tiri ya ba ni ya ma dima, ti Dugma zugu; dama dinŋɔ n nyɛ din tu. 2Ni, “Tim i ba ni i ma gyirima.” - ya yi dɔlisi Litaafi zaalikpana n‑ti paai kanla, kana n di toonni ka mari nangbambasiri zaŋŋi n‑kyaŋŋi laara yɛla. 3Dama di laa n‑yɛtti, ni, “Lala ka i nin kpalim i nyɔvuri ni n‑yuui tingbaŋŋu maa ni.”
4Yarim biisi badima muna - yan di galimni ka tuuri ya biisi ka ba ti gyɛ suuri, amaa ya mari ba la suŋŋa n‑wulisi ba n‑kpaamni ba ti Dugma zugu.
5Daaba, ya wumni n‑tiri ya duniya wa dugmadima maa, ni gyirima ni ninzoaa. Yan zaŋŋma ya sufu zaa n‑wumni n‑tiri ba, hoo yan nin wum n‑ti Kirisita seem la. 6Ya gyeemni ba, pa la ban yi gɔsiri ya kɔkɔa, hoo ninvugseeba ban boori ni ba nya duusigu ninsaalidima saani, amaa yɛlimaŋni ni, hoo daaba ban nyɛ Kirisita dinni; ya tumni la Naawunni tuma ya sufu ni. 7Ya tumni nimmoosi, hoo yan tumni n‑tiri ti Dugma, pa la saala. 8Dama ya mi, ni, ti Dugma nin yɔ sɔkam u tunsuma zugu, di daama yi nyɛ la daabri, bee, u pa daabri gba.
9Yaseeba ban mari daaba la muna - hoo man yɛnni, ni, ba tumma n‑tiri ya seem la, lala ka ya gba tumni ni n‑tiri ba; ya kyɛli tulisigu ni mugsigu. Ya baŋŋma, ni, ya gba nyɛ la Kirisita daaba; yan ni ban zaa mari ya dugma yinni: u bɛ la arizana ni, ka nyɛ sɔ ŋɔn bu gaŋŋni nira ni nira.
10Di zaa nyaaŋŋa, ya kpamsim ya mansi ti Dugma saani, ka kyɛ ka u yiiko titaari bɛ ya saani. 11Ya yeema Naawunni gba'anu ka deaai u tɔppu neema zaa. Anŋɔ nin kyɛ ka ya nyaŋŋi Sintaani yɔmsigu putɔyam zaa. 12Dama ti bu moori ni ninsaalidima, amaa saazugu yiiko dima ka ti zabra, ni saazugu naam dima, ni seeba ban su duniya wa fukumsi ka bɛ la zibsim ni la - halli siseeba ban bɛ saazugu m‑mari yɛlibeeri yiiko la zaasa. 13Dinzugu ya deaam Naawunni tɔppu neema zaa, ka lala nin kyɛ ka ya tuusi dabsibeoo daari tɔppu la n‑zɛ deede; ka di zaa yi ti naai, ya nin nyɛ la ban nin kpalim n‑zɛ ya gbaya zugu. 14Dizugu ya zɛ deede. Ya looma ya seaa suŋŋa - yɛlimaŋni maa nyɛ la ya lala sɛlooriga; ka zaŋŋi gba'anu n‑ta'ai ya nyaari - ya beesigu ŋɔn tuusi seem la nla. 15Ya pirima mugrikpeema - di nyɛ la: ya maalim siri ni ya mooli sufudoaa lahabasuŋŋu maa. 16M‑paasi, Sintaani nin tɔ ya bugum piima, see ka ya mari bunni n‑ta'ai a n‑kpiisi a - ya yɛdda niŋbu mun nla. 17Ka laa m‑pili soogyadima kutti zupiliga - di nyɛ la: tuliginsim din ta'ari ya; ka zaŋŋi takoobi n‑kyeera - Naawunni yɛligu maa ŋmanni la u Sii Kasi suu wa n‑ti ya.
18Ya mari wunsusigu sahakam, n‑susiri m‑bɛlimni Naawunni yan boori seelikam, Sii Kasi maa soori ni. Halli ya galima gɔgala gba, ni ya ti susira; yan bɛlimma u, ka teaai u u maŋtoori niriba zaa yɛla. 19Ya laa n‑susiri n‑ti ma gba, n‑yɛli Naawunni ka u ti ma yɛttɔ'a, man ŋɔn tɔ'asi saha kam gba, ni n ti zaŋŋi n sufukpeemni n‑wulisi lahabasuŋŋu maa yɛlisɔ'ara ka a ti yi paalu. 20Lahabasuŋŋu maa zugu ka n nyɛ ti Dugma tuumu n‑zɛ u zaani n‑tiri niriba, ka ba lɔ ma la kyɔrimi di zugu. Amaa ya susima n‑ti ma, ni, n tɔ'asi paalu ni ka dabeem ka ma, hoo din sumsi ni n tɔ'asi seem.
21Tikyikusi nyɛ la m mabisuŋŋu, ka laa n‑nyɛ yɛdda daansɔ ŋɔn suŋŋni ma ti Dugma zugu, ka n wuri u pam. U yi ti paai ya na, u nin yɛli ya din bɛ ni maa zaa, ka ya gba baŋŋi n lahabaari - man ŋɔn nya seem la, ni man tumni seem maa zaa. 22Lala zugu ka n tumni u ya saani na, ni u ti kyɛ ka ya baŋŋi ti yɛla, ka kpamsi ya sufu.
23M puusiri ti mabiisi zaa: Naawunni paasim ba alaafɛa, ni wurilim ni yɛdda - anŋɔ zaa ka ti Ba Naawunni tisira, ni ti Dugma Yisa Kirisita Masiiya. 24Naawunni paasim u piinisuma n‑ti ya zaa ban wuri ti Dugma Yisa Kirisita Masiiya ka ya wurilim bu kpiira.
S'ha seleccionat:
ƐFƐSUSI DIMA 6: maw
Subratllat
Copia
Compara
Comparteix
Vols que els teus subratllats es desin a tots els teus dispositius? Registra't o inicia sessió
© 2002, Wycliffe Bible Translators, Inc. All rights reserved.