Romanos 9
9
Tachi Akꞌõrepa Israel pidaarã jɨrɨtꞌerada
1Mɨ Cristode ijãadakꞌãriipa, araa bɨ iru ome. Tachi Akꞌõre Jaurepa kꞌawapipari mɨa wãarata jararu. Ma awara mɨchi tꞌãripa ichiaba kꞌawa bɨ seewa jara–e nãga jarakꞌãri. 2Mɨ audú tꞌãri pꞌua nɨ̃bɨ mɨchi aukꞌaarã, judiorãpa Cristode ijãadakꞌaa perã. 3Piara bakꞌaji Cristopa mɨ yiaraa iru bada paara, mɨchi aukꞌaarã atuadai kꞌãyaara. 4Ãra Israeldeepa uchiajida. Chonaarãweda Tachi Akꞌõrepa ãra jɨrɨtꞌeraji ichideerã pꞌaneedamerã. Mãgá ichi warrarãkꞌa pꞌaneejida. Iru bapachi ãra chonaarã tꞌãide. Mãga nɨde iru kꞌĩra wãree unujida. Ãra chonaarãmaa jaraji ichia ooitꞌee Abrahamdeepa uchiadapꞌedaarã kꞌapꞌɨa pari. Ichi ũraa pꞌãpiji ãra chonaarãmaa mãikꞌaapa mãɨrãdepema ũkꞌuru awara bɨji mimiadamerã ichi–itꞌee. Jaraji ãra chonaarãmaa sãga ɨtꞌaa iidipataadaipia bɨ. Ãra chonaarãmaa jarada chokꞌara jaraji ãra pia akꞌɨ bapariitꞌee mãikꞌaapa eperã pëiitꞌee ãra kꞌaripade. 5Ãra uchiajida tai chonaarã Abrahamdeepa, Isaacdeepa, Jacobdeepa. Maapꞌeda Tachi Akꞌõre Waibɨa Jesucristo, chi ne–inaa jõmaweda akꞌɨpari tꞌokꞌãri eperã kꞌapꞌɨade, ãchi aukꞌaa paji, ichiaba ma chonaarãdeepa uchiada perã. ¡Maperã ichita gracias jaradáma irumaa! ¡Amén!
6Mãgara ¿kꞌãata jaraima? ¿Tachi Akꞌõrepa oo–e pajikꞌã ichia ooitꞌeeda adakꞌa Israel pidaarã ome? ¡Mãga ooji! Mamĩda ichi–itꞌee jõmaweda Israeldeepa uchiadapꞌedaarã wãara Israel pidaarã–e. 7Ichiaba ichi–itꞌee jõmaweda Abrahamdeepa uchiadapꞌedaarã wãara Abraham warrarã–e. Tachi Akꞌõre Ũraa pꞌãdade jara bɨ:
‘Mɨa Isaacdeepa uchiadaitꞌeerã pia akꞌɨitꞌee, pɨ mɨde ijãapari perã.’ (Génesis 21.12)
8Akꞌõrepa mãga jarada perã, kꞌawa pꞌanɨ iru–itꞌee Isaacdeepa uchiadapꞌedaarã aupai Abraham warrarã, Abrahampa awaraa warrarã ooji mĩda. Tachi Akꞌõrepa Isaacdeepa uchiadapꞌedaarã mãga akꞌɨpachi, ãra uchiadapꞌedaa perã irua Abrahammaa jarada kꞌaurepa. 9Tachi Akꞌõrepa mãgaji Abrahammaa:
‘Añomaa mɨ waya cheitꞌee mãikꞌaapa Sarapa warra tꞌoitꞌee.’ (Génesis 18.10)
10Ma awara aɨ tꞌẽepai tai judiorã chonaa Isaacpa me–iso ooji chi wẽra Rebeca ome. 11Mamĩda ma me–iso tꞌodai naaweda, Tachi Akꞌõrepa kꞌĩsia iru baji aba jɨrɨtꞌeraitꞌee mãikꞌaapa waibɨara papiitꞌee chi apema kꞌãyaara. Akꞌõrepa mãga ooji ma warrarãpa waide ne–inaa pia wa kꞌachia ooda–e pꞌanajida mĩda. Mãga ookꞌãri, kꞌawapiji ichiata eperã jɨrɨtꞌerapari oomerã ichia oopi bɨkꞌa. 12Jɨrɨtꞌera–e ma eperãpa ne–inaa pia oopari perã. Jĩpꞌa jɨrɨtꞌerapari ichia kꞌinia bɨkꞌa. Mãga kꞌawa pꞌanɨ Akꞌõrepa Rebecamaa nãga jarada perã:
‘Chi naapema chi tꞌẽepema jua ekꞌari baitꞌee.’ (Génesis 25.23)
13Tachi Akꞌõre pedee jarapataarãpa pꞌãdapꞌedaade ichiaba jara bɨ:
‘Jacob jɨrɨtꞌeraji. Jõdee Esaú unuamaa iru baji.’ (Malaquías 1.2-3)
14Mãgara ¿kꞌãata jaradaima? ¿Tachi Akꞌõrepa pia oo–e bɨkꞌã, aba pipɨara akꞌɨpari perã chi apema kꞌãyaara? ¡Mãga–e! 15Mɨa mãga jara bɨ Tachi Akꞌõrepa Moisemaa nãga jarada perã:
‘Mɨa chupɨria kꞌawaaitꞌee mɨa chupɨria kꞌawaa kꞌinia bɨɨrã. Pia akꞌɨitꞌee mɨa pia akꞌɨ kꞌinia bɨɨrã.’ (Éxodo 33.19)
16Mãga jarada perã, kꞌawa pꞌanɨ Tachi Akꞌõrepa eperãarã jɨrɨtꞌerapari kꞌaripaitꞌee, ichia ãchi chupɨria kꞌawaa kꞌinia bairã. Jɨrɨtꞌera–e ãchia mãga kꞌinia pꞌanadairã maa–e pɨrã ne–inaa pia wa kꞌachia oo pꞌanadairã. 17Ichiaba Akꞌõrepa ichi ũraa pꞌãdade jaraji Egiptodepemaarã poro waibɨa Faraonmaa:
‘Mɨa pɨ rey papiji mãikꞌaapa pɨ kꞌĩrapite ooji ne–inaa eperãarãpa pꞌoyaa oodakꞌaa ãchi juadoopa. Mãga ooji mɨa pɨ nepɨrade baaipida kꞌaurepa, na pꞌekꞌau eujãdepemaarãpa kꞌawaadamerã Mɨta, jõmaarã Akꞌõre Waibɨa.’ (Éxodo 9.16)
18Mãga jarada perã, kꞌawa pꞌanɨ Tachi Akꞌõrepa chupɨria kꞌawaapari ichia chupɨria kꞌawaa kꞌinia bɨɨrã mãikꞌaapa kꞌɨɨrɨ kꞌisuapipari ichia mãgá oopi kꞌinia bɨɨrãmaa.
19Mamĩda parãdepemapa mɨmaa iidii: “Mãga pɨrã, ¿sãgapꞌeda Tachi Akꞌõrepa kꞌɨɨrɨ kꞌisua pꞌanɨɨrã miapiitꞌeema? ¿Iru kꞌaurepa mãgá pꞌanapata–ekꞌã?” 20Mɨa ma iidida nãga pꞌanautꞌee. Pɨ na pꞌekꞌau eujãdepema. Mãga bɨta, ¿Tachi Akꞌõrepa ne–inaa oopari iidiipia bɨkꞌã?
‘Ma awara pɨ, Akꞌõrepa ooda, iidiipia bɨkꞌã: “¿Sãapꞌeda mɨ nãgá oojima?” ’ (Isaías 29.16; 45.9)
21Kꞌĩsíaji nãgɨde. Chokꞌo kꞌaparipa ichi yooro pꞌe iru bɨdee chokꞌo kꞌĩra tꞌãdoo kꞌapari, ichia kꞌinia bɨkꞌa. Ma yoorodee kꞌai chokꞌo pi–ia fiestadee ateeitꞌee mãikꞌaapa aɨ yoorodee kꞌai chokꞌo jĩpꞌaa teeda iru baitꞌee.
22Tachi Akꞌõrepa mãga pɨkꞌa oopari na pꞌekꞌau eujãdepemaarã ome. Ichia kꞌĩsia iru bɨ mĩda pꞌekꞌau kꞌachia ooyaa pꞌanɨɨrã jõpiitꞌee, choopari ãra ome ichi ewari waibɨa ewate paru misa. Mãgá choo kꞌinia bɨ pɨrã, ¿kꞌãata jaradaima? 23Mãgá chooru pɨrã kꞌĩsia iru bada perã eperãarãmaa ichi kꞌĩra wãree unupiitꞌee, ¿kꞌãata jaradaima? Irua mãga ooji tachi chupɨria kꞌawaakꞌãri mãikꞌaapa tachi kꞌapꞌɨa ichi kꞌĩra wãree unupikꞌãri awaraarãmaa. 24Tachi Akꞌõrepa tachita jɨrɨji judiorã tꞌãideepa mãikꞌaapa judio–eerã tꞌãideepa, tachi jõmaweda aukꞌa Cristode ijãadamerã. 25Kꞌawa pꞌanɨ Akꞌõrepa mãga kꞌĩsia iru baji, iru pedee jarapari Oseamaa jarapida perã:
‘Mɨchi eperãarã–ee pꞌanadapꞌedaarã tꞌɨ̃jaradaitꞌee “mɨchi eperãarã” mãikꞌaapa eperãarã mɨa kꞌinia–e badaarã tꞌɨ̃jaradaitꞌee “eperãarã mɨa kꞌinia iru bɨɨrã”.’ (Oseas 2.23)
26Awara ãi Akꞌõre Ũraa pꞌãdade Oseapa ichiaba jaraji:
‘Mɨa eperãarãmaa jara badamãi: “parã mɨchi pꞌuuru pidaarã–e”, mãgɨɨrãmãi ãchideepa uchiadapꞌedaarãmaa “Akꞌõre ichita chokꞌai bapari warrarãda” adaitꞌee.’ (Oseas 1.10)
27Ma awara Tachi Akꞌõre pedee jarapari Isaíapa jaraji:
‘Israel pidaarã ipu tau nãusaakꞌa pꞌusa ide chokꞌara pꞌanɨ mĩda, Tachi Akꞌõrepa ãra chokꞌara–ee uchiapiitꞌee kꞌachia beerã juadeepa. 28Taarã–e nɨde Tachi Akꞌõrepa eperãarã chokꞌara jõpiitꞌee.’ (Isaías 10.22-23)
29Mamĩda aɨ naaweda Isaíapa ichiaba jara baji:
‘Jõmaarã Akꞌõre Waibɨapa tachi warrarã chokꞌara–ee pꞌanɨɨrã kꞌaripa–e pada paara, kꞌiniikꞌajida Sodoma pidaarãkꞌa mãikꞌaapa Gomorra pidaarãkꞌa.’ (Isaías 1.9)
Judiorã Cristode ijãadaamaa pꞌanadapꞌedaa
30Tachia ¿kꞌãata kꞌawaadaima kꞌĩsiadakꞌãri Akꞌõrepa mãga oodade Israel pidaarã ome? Kꞌawa pꞌanɨ judio–eerãpa Tachi Akꞌõre jɨrɨda–e pꞌanajida. Mamĩda ɨ̃rá pꞌekꞌau kꞌachia wẽe pꞌanapata Tachi Akꞌõre kꞌĩrapite, Cristode ijãapata perã. 31Jõdee Israel pidaarãpa Tachi Akꞌõre jɨrɨ pꞌanajida mãikꞌaapa oo kꞌinia pꞌanajida iru ũraa pꞌãdade jara bɨkꞌa, irua ãchi pia akꞌɨmerã. Mamĩda pꞌoyaa ooda–e paji jõmaweda ma ũraade jara bɨkꞌa. 32¿Sãgapꞌeda mãga pꞌanajida? Cristode ijãa pꞌaneedai kꞌãyaara Tachi Akꞌõrepa ãchi pia akꞌɨmerã, Akꞌõre Ũraa Moisemaa pꞌãpidakꞌa oo kꞌinia pꞌanapachida. Mamĩda Akꞌõrepa Cristo pëiji ichi o akꞌɨpimerã. Mapa irude ijãa kꞌiniada–e pakꞌãri, ma o atuajida. 33Oojida Akꞌõrepa jaradakꞌa chonaarãweda ichi ũraa pꞌãdade:
‘Judiorã tꞌãide Sión pꞌuurude#9.33 Chonaarãweda Jerusalén tꞌɨ̃jarapachida David Pꞌuuru maa–e pɨrã Sión. mɨa eperã mãu pipɨara bɨkꞌa papiitꞌee. Ara eperã tꞌĩutɨparikꞌa mãumaa, mãga pɨkꞌa eperãarã chokꞌara tꞌĩutɨ pɨkꞌadaitꞌee ma mãu pipɨara bɨ kꞌaurepa. Mamĩda chi irude ijãa bɨ tꞌãri o–ĩa bapariitꞌee Akꞌõre kꞌĩrapite.’ (Isaías 8.14; 28.16)
S'ha seleccionat:
Romanos 9: sjaB
Subratllat
Copia
Compara
Comparteix
Vols que els teus subratllats es desin a tots els teus dispositius? Registra't o inicia sessió
©2005, 2010, 2015 Wycliffe Bible Translators, Inc. All rights reserved.