Romanos 8
8
Sãga pꞌanapata Tachi Akꞌõre Jaure ome
1Ma jõma jara aupadade kꞌĩsiadakꞌãri, tachia kꞌawa pꞌanɨ Tachi Akꞌõrepa Jesucristo ome araa pꞌanɨɨrã atuapi–e paitꞌee. 2Cristode wãara ijãadakꞌãri, Tachi Akꞌõre Jaure ba chepari tachi ome. Iruata tachi uchiapipari tachi pꞌekꞌau kꞌachia ooyaa bɨ kꞌapꞌɨa jua ekꞌariipa, ma kꞌaurepa atuanaadamerã. 3Tachi Akꞌõre Ũraa Moisemaa pꞌãpidapa eperãarã pꞌoyaa kꞌaripa ata–e paji, eperãarãpa pꞌoyaa ooda–e pꞌanadairã ma ũraade jara bɨkꞌa, ãchi pꞌekꞌau kꞌachia ooyaa bɨ kꞌapꞌɨa jua ekꞌari pꞌanɨ misa. Mapa Tachi Akꞌõrepa ichi Warra pëiji eperã jĩpꞌaakꞌa bapariimerã mãikꞌaapa piumerã tachi pari, tachia pꞌekꞌau kꞌachia oopata jõmaweda wẽpapiitꞌee. Mãgapɨ Cristopa tachi pꞌekꞌau kꞌachia ooyaa bɨ kꞌapꞌɨa pꞌoyaaji. 4Mãga ooji tachi ijãapataarã pꞌanapataadamerã Akꞌõre Ũraa pꞌãdade jara bɨkꞌa. Mãgá pꞌanadai oodakꞌãri Akꞌõre Jaurepa oopi bɨkꞌa, tachi pꞌekꞌau kꞌachia ooyaa bɨ kꞌapꞌɨapa oopii kꞌãyaara.
5Chi oo kꞌinia pꞌanapataarãpa ãchi pꞌekꞌau kꞌachia ooyaa bɨ kꞌapꞌɨapa oopi bɨkꞌa, mãga oopata jɨrɨpata perã ãchia oo kꞌinia pꞌanɨ aupai. Mamĩda chi oo kꞌinia pꞌanapataarãpa Tachi Akꞌõre Jaurepa oopi bɨkꞌa, mãga oopata jɨrɨpata perã Tachi Akꞌõrepa kꞌinia bɨ. 6Ma awara chi oo kꞌinia pꞌanapataarãpa ãchi pꞌekꞌau kꞌachia ooyaa bɨ kꞌapꞌɨapa oopi bɨkꞌa o kꞌachia jɨrɨpata. Mãgá atuadaitꞌee. Mamĩda chi oo kꞌinia pꞌanapataarãpa Akꞌõre Jaurepa oopi bɨkꞌa, kꞌãiwee pꞌanapata Akꞌõre kꞌĩrapite, iru ode pꞌanadairã mãikꞌaapa ɨtꞌaa wãdaitꞌee perã. 7Mãgee oo kꞌinia pꞌanapataarãpa ãchi pꞌekꞌau kꞌachia ooyaa bɨ kꞌapꞌɨapa oopi bɨkꞌa Tachi Akꞌõre kꞌĩra unuamaa iru pꞌanapata. Mapa oo kꞌiniadakꞌaa iru ũraa pꞌãdade jara bɨkꞌa. Wãara mãgá pꞌoyaa oodakꞌaa, Akꞌõre Jaure wẽe pꞌanadairã. 8Ma awara ne–inaa wẽ–e mãgee eperãarãpa oodai Tachi Akꞌõrepa ãchi pia akꞌɨmerã.
9Jõdee Akꞌõre Jaure pãchi tꞌãride baparida a pꞌanɨ. Mãga pɨrã, parãpa oo kꞌinia pꞌanapataadaipia bɨ iru Jaurepa oopi bɨkꞌa. Tachia kꞌawa pꞌanɨ Cristo Jaure wẽe beerã Cristodeerã–e. 10Mamĩda Cristo pãchi tꞌãride bapari pɨrã, parã jaure ichita chokꞌai bapariitꞌee. Maperã parã kꞌapꞌɨa piudaruta pɨjida pꞌekꞌau kꞌachia oopata kꞌaurepa, Cristo kꞌaurepa Tachi Akꞌõrepa parã pꞌekꞌau kꞌachia wẽe akꞌɨpari. 11Ma awara Tachi Akꞌõre Jaure pãchi tꞌãride bapari pɨrã, parã jai–idaadakꞌãri, irua parã kꞌapꞌɨa chokꞌai pꞌirabaipiitꞌee ichita pꞌanapataadamerã. Mãga kꞌawa pꞌanɨ Tachi Akꞌõrepa mãga ooda perã Cristo ome, iru piupꞌeda pꞌirabaipikꞌãri.
12Mãpai ɨ̃pemaarã, Tachi Akꞌõrepa tachi Cristode ijãapataarã mãgá kꞌaripapari perã ichi Jaure kꞌapꞌɨa, pꞌanapataadaipia bɨ iru Jaurepa pꞌanapi bɨkꞌa. Ɨ̃rá tachi ijãapataarã Cristo jua ekꞌari pꞌanapata. Mãga bɨta ¿sãga oodaima tachi pꞌekꞌau kꞌachia ooyaa bɨ kꞌapꞌɨapa oopi bɨkꞌa? 13Parã pꞌanaruta pɨrã mãgɨ́ pꞌekꞌau kꞌachia ooyaa bɨ kꞌapꞌɨapa pꞌanapi kꞌinia bɨkꞌa, atuadaitꞌee. Mamĩda mãgɨpa oopi bɨkꞌa oo amaaruta pɨrã mãikꞌaapa Akꞌõre Jauremaa oopiruta pɨrã irua oopi bɨkꞌa, parã pꞌekꞌau kꞌachia ooyaa bɨ kꞌapꞌɨa pꞌoyaadaitꞌee mãikꞌaapa Akꞌõre truade pꞌananadaitꞌee.
14Jõmaweda Tachi Akꞌõre Jaurepa pꞌanapi bɨkꞌa pꞌanapataarã Tachi Akꞌõre warrarã. 15Cristode ijãadakꞌãri, Tachi Akꞌõrepa ichi Jaure pëi–e paji parã pꞌera pꞌanapataadamerã esclavoorãkꞌa, irua parã miapii jĩakꞌaapa. Jĩpꞌa pëiji ichi warrarã padamerã. Maperãpɨ Tachi Akꞌõremaa ɨtꞌaa tꞌɨ̃dakꞌãri, jarapata: “¡Abbá!#8.15 Abbá arameo pedeede jara kꞌinia bɨ Mɨ Akꞌõre wa Tate. ¡Mɨ Akꞌõre!” 16Mãga jaradai Akꞌõre Jaurepa tachi tꞌãrimaa kꞌawapipari perã wãara Tachi Akꞌõre warrarã. 17Mãgá Tachi Akꞌõre warrarã pꞌanadairã, iru pꞌanadaitꞌee jõmaweda irua kꞌĩsia iru bɨ ichideerã–itꞌee ɨtꞌari pꞌananadakꞌãri. Ne–inaa iru pꞌanadaitꞌee iru Warra Cristopa iru bɨkꞌa. Iru na eujãde bɨ misa, ijãadakꞌaa beerãpa iru jɨrɨpachida miapidaitꞌee. Mãgá tachi aukꞌa jɨrɨpata. Mapa ɨtꞌari panadakꞌãri, Tachi Akꞌõrepa tachi Cristokꞌa papiitꞌee, aukꞌa iru kꞌĩra wãreede pꞌanapataadamerã.
Tachi Akꞌõre kꞌĩra wãree unudaitꞌee
18Mɨchi tꞌãride mɨa nãga kꞌawa bɨ. Na pꞌekꞌau eujãde pꞌanɨ misa, tachi makꞌɨara miada–e pꞌanɨ kꞌĩsiadakꞌãri jõma Tachi Akꞌõrepa tachimaa unupiitꞌee ichi kꞌĩra wãree eujãde. 19Na pꞌekꞌau eujãde mãgá mia jõnɨ jida, o–ĩa nɨ pꞌanɨ iru ewari waibɨa ewate. Jõma ne–inaa Tachi Akꞌõrepa ooda jida nɨmaa bɨ irua akꞌɨpimerã ichi warrarã Cristo cheru ewaride. 20Chi naapema eperãpa oo–e pakꞌãri Tachi Akꞌõrepa jaradakꞌa, kꞌachiade baaiji. Maperã Akꞌõrepa ichia ooda jõmaweda aukꞌa kꞌachiade baaipiji, ma ne–inaa Akꞌõrepa ooda mãga kꞌinia–e baji mĩda. 21Mamĩda ɨ̃rá ma ooda jõmaweda nɨmaa bɨ ma ewari cherude ma kꞌachia baaidadeepa aukꞌa uchiaitꞌee perã Tachi Akꞌõre warrarã ome. Iru warrarã waa piuda–e paitꞌee mãikꞌaapa Tachi Akꞌõre kꞌĩra wãree eujãde pꞌananadaitꞌee. 22Kꞌawa pꞌanɨ Tachi Akꞌõrepa ooda jõmaweda atꞌãri mia nɨ̃bɨ, wẽra mia nɨ̃baparikꞌa ichi warra ewaa tꞌoitꞌee pakꞌãri. 23Tachi ijãapataarã jida mia chitoonɨ na pꞌekꞌau eujãde pꞌanɨ misa, ne–inaa pipɨara bɨ iru pꞌanɨ mĩda, Tachi Akꞌõrepa kꞌĩsia iru bɨdepema teeitꞌee Cristode ijãapataarãmaa. Mãgɨ́ iru Jaure. Mãgá iru Jaure tachi ome iru pꞌanɨ mĩda, tachi tꞌãride kꞌĩsia paraa pꞌanapata na pꞌekꞌau eujãde pꞌanɨ misa. Aukꞌa o–ĩa nɨpata Tachi Akꞌõrepa tachi kꞌapꞌɨa chiwidi pꞌirabaipimerã mãikꞌaapa ɨtꞌari tachi ichi warrarãkꞌa pꞌanapimerã. 24Ichia tachi o kꞌachiadeepa kꞌaripa atadakꞌãriipa, kꞌawajida ewari cherude wãara mãgá kꞌapꞌɨa chiwidide pꞌanapataadaitꞌee iru kꞌĩra wãree truade. Ma kꞌapꞌɨa chiwidi iru pꞌanadapꞌedaa paara, nɨda–e pakꞌajida kꞌapꞌɨa chiwidi iru pꞌanadaitꞌee. 25Mamĩda wãara ijãa pꞌanɨ pɨrã ma kꞌapꞌɨa chiwidi iru pꞌanadaitꞌee, waide unuda–e pꞌanɨ mĩda, choodaitꞌee tachia nɨ pꞌanɨde.
26Mãgá choodai Tachi Akꞌõre Jaurepa tachi kꞌaripapari perã, audú kꞌĩsia paraa pꞌanadakꞌãri maa–e pɨrã tachi tꞌãride juatau wẽe pɨkꞌa pꞌanadakꞌãri. Mãga pꞌanɨde tachi kꞌĩradoopa pꞌoyaa ɨtꞌaa tꞌɨ̃da–e pakꞌãri Akꞌõremaa, iru Jaurepa enenee nɨ̃bɨ tachi pari ĩyapaa bɨdepai, pedee wẽe. 27Mãpai Tachi Akꞌõrepa tachi ijãapataarã tꞌãride iru bɨ kꞌawapari perã, ũripari ichi Jaurepa jara kꞌinia bɨ tachi kꞌapꞌɨa pari. Ichi Jaurepa ichita iidipari irua kꞌinia bɨkꞌa.
28Mapa kꞌawa pꞌanɨ Tachi Akꞌõrepa pia uchiapiitꞌee jõmaweda ne–inaa pꞌasaru ichi kꞌinia iru pꞌanɨɨrãmaa. Mãga ooitꞌee ichiata mãɨrã jɨrɨda perã Cristode ijãadamerã. 29Eperãarã ooi naaweda, Tachi Akꞌõrepa kꞌawaji mãɨrãpa iru kꞌinia iru pꞌanadaitꞌee. Mapa kꞌĩsia iru baji mãɨrã ichi warra jĩakꞌa papiitꞌee. Cristo chi Warra naapema paji. Maapꞌeda irude ijãapataarã iru ɨ̃pemaarãkꞌa pꞌaneejida. 30Pia jaraitꞌeera, naaweda Tachi Akꞌõrepa kꞌawaji eperãarã ũkꞌuruurãpa iru kꞌinia iru pꞌanadaitꞌee. Mapa mãɨrã jɨrɨpari Cristode ijãadamerã. Mãpai, ijãadakꞌãri, irua ãchi pꞌekꞌau kꞌachia wẽe akꞌɨpari ichi warra Cristo akꞌɨparikꞌa. Maperãpɨ ãra pꞌanapiitꞌee ichi trua kꞌĩra wãree bɨde.
Cristode ijãapata kꞌaurepa Tachi Akꞌõrepa tachi kꞌinia iru bapari
31Kꞌĩsiadakꞌãri jõmaweda Tachi Akꞌõrepa ooparide tachi ijãapataarã kꞌaripaitꞌee, ¿kꞌãata waa jaradaima? Tachi Akꞌõrepa tachi mãgá kꞌaripapari pɨrã, ¿kꞌaipa tachi kꞌachia ooima? 32Tachi Akꞌõrepa wãakꞌa–e paji pɨrã ichi Warra piupikꞌãri tachi pari, audupɨara wãakꞌa–e paitꞌee ne–inaa awaraa ichia jara bɨ teeitꞌee tachi Cristode ijãapataarãmaa. 33¿Kꞌaipa Tachi Akꞌõrepa jɨrɨtꞌeradaarã ɨmɨateeima, irua ãra pia–ee akꞌɨmerã? Tachi Akꞌõrépata tachi pꞌekꞌau kꞌachia wẽe akꞌɨpari Cristopa ooda kꞌaurepa. 34Mãga–e pɨrã, ¿kꞌaipa Cristode ijãapataarã atuapiima? Jesucristo piuji mãikꞌaapa chokꞌai pꞌirabaiji tachi o kꞌachiadeepa kꞌaripa ataitꞌee. Maapꞌeda ɨtꞌari Tachi Akꞌõre juaraare banaji chupɨria iidiitꞌee Akꞌõremaa tachi pari. 35Mãga–e pɨrã, ¿kꞌaipa tachi ãyaa ataima Cristo juadeepa, irua tachi kꞌinia–ee iru bamerã? Mãgá ãyaa wãda–e pai nepɨrade baairuta pɨjida maa–e pɨrã audú kꞌĩsia jõnɨ pɨjida maa–e pɨrã awaraarãpa tachi kꞌachia ooruta pɨjida Cristode ijãapata perã maa–e pɨrã jarrapisia jõnɨ pɨjida maa–e pɨrã pꞌaru wẽe pꞌanɨ kꞌaurepa chupɨria chitoonɨ pɨjida maa–e pɨrã awaraarãpa tachi jɨrɨruta pɨjida miapidaitꞌee wa peedaitꞌee. ¡Ne–inaa apidaapa tachi ãyaa wãpida–e Cristo juadeepa! 36Tachi Akꞌõre Ũraa pꞌãdade jara bɨ:
‘Akꞌõre, taipa pɨ kꞌinia iru pꞌanapata perã, kꞌachia beerãpa tai ipꞌii jɨrɨpata peedaitꞌee. Oveja peepataarãpa oveja iru pꞌanapatakꞌa ateedakꞌãri peedaitꞌee, mãga pɨkꞌa mãgee kꞌachia beerãpa tai iru pꞌanɨ.’ (Salmos 44.22)
37Kꞌachia beerãpa tachi ijãapataarã atꞌãri mãgá iru pꞌanɨ mĩda, tachia ne–inaa jõmaade ãchi pꞌoyaapata, tachi kꞌinia iru baparipa kꞌaripapari perã. 38Cristopa tachi mãgá kꞌinia iru bapari perã, mɨchi tꞌãripa mɨa nãga ijãa bɨ. Ãyaa wãda–e iru juadeepa piuruta pɨjida maa–e pɨrã mia jõnɨ pɨjida na eujãde pꞌanɨ misa. Cristo juadeepa tachi ãyaa wãpida–e pai angeleerãpa, netuaraarãpa, na pꞌekꞌau eujãdepemaarã waibɨarãpa pida. Apidaapa mãgá wãpida–e pai ne–inaa ɨ̃rapema wa tꞌẽepema ewari cherude. 39Ɨtꞌɨpɨara wãruta pɨjida pajãde maa–e pɨrã edupɨara wãruta pɨjida eujã ekꞌari maa–e pɨrã tꞌɨmɨpɨara wãruta pɨjida na pꞌekꞌau eujãde, ãyaa wãda–e pai iru juadeepa. Mɨa mãga jara bɨ wẽ–e perã ne–inaa tachi ãyaa wãpiitꞌee Tachi Akꞌõre juadeepa Tachi Waibɨa, Jesucristopa, tachi kꞌinia iru bapari perã.
S'ha seleccionat:
Romanos 8: sjaB
Subratllat
Copia
Compara
Comparteix
Vols que els teus subratllats es desin a tots els teus dispositius? Registra't o inicia sessió
©2005, 2010, 2015 Wycliffe Bible Translators, Inc. All rights reserved.