Romanos 10
10
1Ɨ̃pemaarã Cristo kꞌaurepa, tꞌãripa mɨa kꞌinia bɨ judiorãpa Cristode ijãadamerã. Ɨtꞌaa tꞌɨ̃pari Tachi Akꞌõremaa ãra chupɨria kꞌawaamerã, mãgá o kꞌachiadeepa uchiadamerã. 2Mɨchi taupa unu bɨ ãrapa Akꞌõre netꞌaa kꞌawa kꞌinia pꞌanɨ. Mamĩda wãara iru kꞌawadakꞌaa. 3Kꞌawa kꞌiniadakꞌaa Akꞌõrepa Cristode ijãapataarã pꞌekꞌau kꞌachia wẽe beepipari. Kꞌĩsiapata ne–inaa pia oo pꞌanɨpa Tachi Akꞌõrepa ãchi pia akꞌɨitꞌee. Maperã Cristode ijãa kꞌiniada–e. 4Mamĩda Cristopata ichideerã uchiapipari Tachi Akꞌõre Ũraa pꞌãdade jara bɨ jua ekꞌariipa, oopataadamerã irua jara bɨkꞌa. Maperã Tachi Akꞌõrepa Cristode ijãapataarã pꞌekꞌau kꞌachia wẽe akꞌɨpari.
5Moisepa pꞌãdade jara bɨ:
‘Eperãpa ookꞌãri jõmaweda Akꞌõre Ũraade jara bɨkꞌa, ichita bapariitꞌee ma ũraade jara bɨkꞌa.’ (Levítico 18.5)
6Mamĩda pꞌekꞌau kꞌachia wẽe beerã Cristode ijãa pꞌanɨ kꞌaurepa, mãgɨɨrãpa aukꞌa jaradai Moisepa jaradakꞌa Tachi Akꞌõre kꞌawa kꞌinia pꞌanadapꞌedaarãmaa:
‘Kꞌĩsianáatɨ pãchi tꞌãridepai: “¿Kꞌaita wãima Akꞌõre eujãdee irua kꞌinia bɨ kꞌawaade?” ’ (Deuteronomio 30.12)
(pia jaraitꞌeera, Cristo chemerã Akꞌõre eujãdeepa.) 7Maa–e pɨrã:
‘ “¿Kꞌaita piudapꞌedaarãmaa wãima Akꞌõrepa kꞌinia bɨ kꞌawaade?” ’ (Deuteronomio 30.13)
(pia jaraitꞌeera, Cristo chemerã iru ɨadapꞌedaamãiipa.) 8Mãga kꞌĩsiadai kꞌãyaara, jaradaipia bɨ Akꞌõre Ũraade jara bɨkꞌa:
‘Nãgaweda Tachi Akꞌõrepa jara pëida kꞌawa pꞌanɨ, mãgɨ́ pãchi itꞌaideepa jarapata perã mãikꞌaapa pãchi tꞌãride kꞌawapata perã.’ (Deuteronomio 30.14)
Mãgɨ́ pedee Moisepa pꞌãdadepemakꞌa ichiaba taipa jarateepata jõmaarãmaa: tꞌãripa Cristode ijãapataadamerã. 9Eperãpa jara bɨ pɨrã: “Jesucristo Mɨchi Waibɨa” mãikꞌaapa tꞌãripa wãara ijãa bɨ pɨrã Tachi Akꞌõrepa Cristo chokꞌai pꞌirabaipiji, Tachi Akꞌõrepa ma eperã wãpiitꞌee ichi truadee. 10Tꞌãripa Cristode wãara ijãadakꞌãri, pꞌekꞌau kꞌachia wẽe pꞌaneepata Akꞌõre kꞌĩrapite. Ma awara tachi itꞌaideepa jaradakꞌãri, “Jesucristo Mɨchi Waibɨa”, akꞌɨpipata irua tachi o kꞌachiadeepa kꞌaripa ataji.
11Kꞌirãpátɨ Akꞌõre Ũraa pꞌãdade ichiaba jara bɨ:
‘Eperã Cristode ijãa bɨ kꞌĩra pia–ee ba–e paitꞌee Akꞌõre kꞌĩrapite.’ (Isaías 28.16)
12Mãga jara bairã kꞌawa pꞌanɨ judiorã, judio–eerã ome aukꞌa pꞌanɨ Tachi Akꞌõre kꞌĩrapite, Cristode ijãadakꞌãri. Iruta Jõmaarã Waibɨa. Aukꞌa kꞌaripapari chi chupɨria iidirutaarã ichimaa, ãchi aukꞌa kꞌinia iru bapari perã. 13Maperã kꞌawa pꞌanɨ na Akꞌõre Ũraa wãarata jara bɨ:
‘Tachi Akꞌõrepa ichimaa chupɨria iidirutaarã kꞌaripa ataitꞌeeda aji, atuanaadamerã.’ (Joel 2.32)
14Mamĩda ¿sãga chupɨria iididaima, irude ijãada–e pꞌanɨ pɨrã? Ichiaba ¿sãga irude ijãadaima, irua ooda ãchi–itꞌee ũrida–e pꞌanɨ pɨrã? Ma awara ¿sãga ũridaima irua ooda ãchi–itꞌee, eperãpa mãga jara–e pɨrã ãchimaa? 15Mãgɨ́ eperã, ¿sãga wãima jarateede, awaraarãpa iru pëida–e pꞌanɨ pɨrã? Tachi Akꞌõre Ũraa pꞌãdade jara bɨ:
‘Eperãarã o–ĩadaipata awaraarãpa pedee pia ãchimaa jara chedakꞌãri.’ (Isaías 52.7)
16Mamĩda jõmaarãpa ũri kꞌiniada–e pꞌanɨ, Akꞌõre pedee pia jara chedakꞌãri. Mãga kꞌawa pꞌanɨ Tachi Akꞌõre pedee jarapari Isaíapa pꞌãdade jara bairã:
‘Tachi Akꞌõre, ¿kꞌaipa ijãajima aji, taipa jarateedapꞌedaa?’ (Isaías 53.1)
17Ma jõma jara aupadade kꞌĩsiadakꞌãri, kꞌawa pꞌanɨ eperãarãpa ũridakꞌãri Cristopa ooda ãchi–itꞌee, mãgapɨ irude ijãapata.
18Mãga pɨrã, ¿sãgapꞌeda judiorãpa ijãada–e paji? ¿Ũrida–e pajikꞌã Cristopa ooda ãchi–itꞌee? ¡Ũrijidapɨ! Akꞌõre Ũraa pꞌãdade jara bɨ:
‘Tachi Akꞌõrepa ooda jarateepachida jõmaarãmaa; na pꞌekꞌau eujãdepema tꞌɨmɨ́ beerãmaa paara kꞌawapijida irua ooda.’ (Salmos 19.4)
19Mãga pɨrã, waya iidiitꞌee: ¿sãgapꞌeda ijãada–e pajima? ¿Kꞌawada–e pajikꞌã ãchia ũridapꞌedaa? ¡Kꞌawajidapɨ! Naapɨara mɨa kꞌirãpapi kꞌinia bɨ Moisepa pꞌãdade jara bɨ:
‘Tachi Akꞌõrepa nãga jara bɨ ichi eperãarãmaa: Mɨa parã kꞌĩra unuamaa iru pꞌanapiitꞌee mɨchi eperãarã–eerãmaa, ãra mɨde ijãa kꞌinia pꞌanadairã. Ma awara parã kꞌĩraupiitꞌee mãgɨɨrã ome, chi parãpa kꞌĩsiapata kꞌĩsia kꞌawa–ee beerã.’ (Deuteronomio 32.21)
20Ichiaba Isaíapa pꞌãdade jĩpꞌa jara bɨ:
‘Mɨ jɨrɨda–e pꞌanadapꞌedaarãpa mɨ unujida. Mɨa unupiji mɨ kꞌawa kꞌiniada–eerãmaa.’ (Isaías 65.1)
21Jõdee Israel pidaarã ãpɨte jara bɨ:
‘Ichita mɨa Israel pidaarã kꞌaripa kꞌinia baji. Mamĩda ãchia oodaamaa pꞌanapachida mɨa jara bɨkꞌa, mɨde ijãa kꞌiniada–e pꞌanadapꞌedaa perã.’ (Isaías 65.2)
S'ha seleccionat:
Romanos 10: sjaB
Subratllat
Copia
Compara
Comparteix
Vols que els teus subratllats es desin a tots els teus dispositius? Registra't o inicia sessió
©2005, 2010, 2015 Wycliffe Bible Translators, Inc. All rights reserved.