Matuš 5
RNC

Matuš 5

5
O vakeriben pro verchos
1Sar o Ježiš dikhľa, hoj avle but manuša, geľa upre pro brehos. Bešľa peske a leskere učeňika avle paš leste. 2A chudňa len kavke te sikavel:
Ko hin bachtalo
3„Bachtale hine o čore pro duchos,
bo lengero hin o ňeboskero kraľišagos.
4Bachtale hine ola, ko roven,
bo o Del lenge dela pale o radišagos.
5Bachtale hine o pokorna,
bo lengeri ela e phuv.
6Bachtale hine ola, ko hine bokhale the smedna pal o spravodľišagos,
bo on ena čaľarde.
7Bachtale hine o lačhejileskere,
bo o Del ela ke lende lačhejileskero.
8Bachtale hine o žužejileskere,
bo on dikhena le Devles.
9Bachtale hine ola, ko anen o smirom maškar o manuša,
bo on pes vičinena le Devleskere čhave.
10Bachtale hine ola, pre kaste džan vaš o spravodľišagos,
bo lengero hin o ňeboskero kraľišagos.
11Bachtale avena, te vaš ma pre tumende namištes vakerena, džana pre tumende a klamišagoha pre tumende phenena savoro nalačhipen. 12Radisaľon a thoven baripen, bo baro hin tumaro počiňiben andro ňebos, bo kavke džanas the pro proroka, save sas angle tumende.“
O lon the o švetlos le phuvakero
13„Tumen san o lon la phuvakero. Te o lon našavela peskero lonďipen, soha pes lonďarela? Pre ňisoste imar nane lačho, ča hoj pes te čhivel avri tel o pindre le manušenge.
14Tumen san o švetlos le svetoskero. O foros, so ačhel upre pro verchos, našťi te garuvel. 15Se e momeľi na labaren pre oda, hoj la te garuven tel e piri, ale thoven la pro momeľaris a labol savorenge andro kher. 16Avke mi labol tumaro švetlos anglo manuša, hoj te dikhen tumare lačhe skutki a te lašaren tumare Dades, savo hino andro ňebos.“
Pal o Zakonos
17„Ma gondoľinen tumenge, hoj avľom te zrušinel o Zakonos abo le Proroken. Na avľom len te zrušinel, ale te doľikerel. 18Bo čačipen phenav tumenge, hoj medik na našľona e phuv the o ňebos, na našľola aňi jekh pismenkos aňi jekh čjarkica andral o Zakonos, medik pes savoro na ačhela. 19Oles, ko zrušinďahas ča jekh le nekciknedere prikazaňjendar a sikaďahas avke le manušen, vičinena nekcikneder andro ňeboskero kraľišagos. Ale oles, ko len doľikerela a sikavela, vičinena baro andro ňeboskero kraľišagos. 20Bo phenav tumenge, te na ela tumaro spravodľišagos feder sar le zakoňikengero the le Farizejengero, šoha na džana andro ňeboskero kraľišagos.“
Pal o rušiben
21„Šunďan, hoj sas phendo le phure dadenge: ‚Na murdareha! Oda, ko murdarďahas, mušinel te džal pro sudos.‘ 22Ale me tumenge phenav, hoj sako, ko rušel pre peskero phral, mušinel te džal pro sudos. Sako, ko phenďahas peskere phraleske: ‚Tu demado!‘, mušinel te džal angle Bari Rada. A sako, ko phenďahas: ‚Tu dilino!‘, ela čhido andro jagalo peklos.
23Te anďalas tiro daros pro oltaris a ode tuke avľahas pre goďi, hoj tire phrales hin vareso pre tute, 24muk ode tiro daros anglo oltaris, dža a lačhuv tire phraleha. Paľis av a obetin tiro daros.
25Gondoľin mištes a dovaker tut sigo oleha, ko džal pre tute, medik sal leha pro drom, hoj tut te na del andre le sudcaske a o sudcas tut diňahas le stražňikoske a paľis tut čhidehas andre bertena. 26Čačipen phenav tuke, hoj odarik na aveha avri, medik savoro na počineha.“
Pal o lubipen
27„Šunďan, hoj sas phendo: ‚Na kereha lubipen!‘ 28Ale me tumenge phenav, hoj oda, ko dikhela žadoscaha pre džuvľi, oda imar kerďa laha lubipen andre peskero jilo. 29Te tut cirdel pro binos tiri čači (pravo) jakh, džubin la avri a čhiv la tutar het! Bo feder tuke hin, hoj te merel jekh kotor tutar, sar te calo tiro ťelos uľahas čhido andro peklos. 30Te tut cirdel pro binos tiro čačo vast, odčhin les a čhiv tutar het! Bo feder tuke hin, hoj te merel jekh kotor tutar, sar te calo tiro ťelos uľahas čhido andro peklos.“
Pal o rozvod
31„Sas avke phendo: ‚Oda, ko bičhavel peskera romňa het, mi pisinel lake o rozvodno ľil.‘ 32Ale me tumenge phenav, hoj oda, ko bičhavel peskera romňa het, te oj na kerďa lubipen, ľidžal la andro lubipen. A sako, ko peske lela kajsa romňa, savi hiňi rozvedzimen, kerel lubipen.“
Pal e vera
33„Šunďan mek, hoj sas phendo le phure dadenge: ‚Na leha vera klamišagoha, ale doľikereha le Rajeske tiri vera!‘ 34Ale me tumenge phenav, hoj šoha te na len vera, aňi pro ňebos, bo oda hin o tronos le Devleskero, 35aňi pre phuv, bo oda hin o than, kaj ov thovel peskere pindre, aňi pro Jeruzalem, bo oda hin o foros ole bare Kraľiskero. 36Aňi pre tiro šero na leha vera, bo mek aňi jekh bal našťi keres parno abo kalo. 37Ale sar vakeren, ta vakeren avke, hoj tumaro ‚He‘ mi el ‚He‘ a tumaro ‚Na‘ mi el ‚Na‘. Savoro, so hin buter upral oda, hin le nalačhestar.“
Te na visaren pale o nalačho
38„Šunďan, hoj sas phendo: ‚E jakh vaš e jakh a o dand vaš o dand.‘ 39Ale me tumenge phenav: Ma de pale oleske, ko tuke kerel namištes. A oleske, ko tut demela pal jekh čham, visar the aver. 40Te vareko pes tuha kamel te sudzinel, hoj tuke te lel o gad, muk leske the o plašťos. 41A te vareko tut ispidela, hoj leha te džas a te ľidžas leske o veci jekh kilometros, dža leha duj. 42Te tutar vareko mangel vareso, de les. A ma visar tut olestar, ko tutar kamel vareso kečeň.“
Pal o kamiben ko ňeprijaťeľa
43„Šunďan, hoj sas phendo: ‚Kameha tire prijaťeľis a na kameha tire ňeprijaťeľis.‘ 44Ale me tumenge phenav: Kamen peskere ňeprijaťeľen, [žičinen o lačho olenge, ko tumen prekošen, keren o lačhipen olenge, ko tumen našťi avri ačhen] a mangen pes ko Del vaš ola, [ko tumen tele dikhen] a džan pre tumende, 45hoj te aven o čhave tumare Dadeskere, savo hino andro ňebos. Bo ov kerel, hoj o kham te avel avri pro nalačhe the pro lačhe a del o brišind pro čačipnaskere the pro načačipnaskere. 46Bo te kamľanas ča olen, ko tumen kamen, savo počiňiben tumen užarel? Či na keren oda the o colňika? 47A te pozdravinďanas ča tumare phralen, soha uľanas aver? Či na keren oda the o manuša, save na prindžaren le Devles? 48Vašoda tumen aven dokonala avke, sar tumaro Dad, savo hino andro ňebos.“

Eastern Slovak Romani Bible© The Word for the World International and The Word for the World Slovakia, 2021.


Learn More About E Nevi Zmluva pal o Romanes 2014

Encouraging and challenging you to seek intimacy with God every day.


YouVersion uses cookies to personalize your experience. By using our website, you accept our use of cookies as described in our Privacy Policy.