Matuš 1
RNC

Matuš 1

1
Le Ježišoskero rodokmeňos
1O ľil pal o rodokmeňos le Ježišoskero Kristoskero, čhavo le Davidoskero, čhavo le Abrahamoskero.
2O Abraham sas dad le Izakoske, o Izak sas dad le Jakoboske, o Jakob sas dad le Judaske the leskere phralenge
3a o Juda sas dad le Pereciske the le Zerachoske, savenge sas daj e Tamar. O Perec sas dad le Checronoske, o Checron sas dad le Ramoske,
4o Ram sas dad le Amminadaboske, o Amminadab sas dad le Nachšonoske, o Nachšon sas dad le Salmonoske,
5o Salmon sas dad le Boaziske la Rachabatar a o Boaz sas dad le Obedoske la Rutatar. O Obed sas dad le Izajoske,
6o Izaj sas dad le kraľiske le Davidoske a o David sas dad le Šalamunoske, savo uľiľa le Urijašiskera romňatar.
7O Šalamun sas dad le Rechabeamoske, o Rechabeam sas dad le Abijoske, o Abijah sas dad le Asaske,
8o Asa sas dad le Jošafatoske, o Jošafat sas dad le Jehoramoske a o Jehoram sas dad le Uzzioske.
9O Uzziah sas dad le Jotamoske, o Jotam sas dad le Achazoske, o Achaz sas dad le Chizkijoske,
10o Chizkijah sas dad le Menaššeske, o Menašše sas dad le Amonoske a o Amon sas dad le Jozijašoske.
11O Jozijaš sas dad le Jekonijašiske the leskere phralenge akor, sar sas o nipi andral o Izrael zaile andro Babilon.
12Paloda, sar sas o Izraeliti zaile andro Babilon, sas le Jekonijaš čhavo o Šealtiel a o Šealtiel sas dad le Zerubbabeloske.
13O Zerubbabel sas dad le Abijudoske, o Abijud sas dad le Eljakimoske, o Eljakim sas dad le Azoriske,
14o Azor sas dad le Cadokoske, o Cadok sas dad le Achimoske a o Achim sas dad le Elijudoske.
15O Elijud sas dad le Eleazaroske, o Eleazar sas dad le Mattanoske, o Mattan sas dad le Jakoboske
16a o Jakob sas dad le Jozefoske, savo sas rom la Mariake, savake uľiľa o Ježiš, saves vičinen Kristus.
17Avke savore pokoleňja le Abrahamostar dži o David sas dešuštar (14); le Davidostar dži akor, sar sas o Izraeliti zaile andro Babilon, sas dešuštar pokoleňja; a akorestar dži o Kristus sas tiš dešuštar pokoleňja.
Sar uľiľa o Ježiš Kristus
18O Ježiš Kristus uľiľa (pes narodzinďa) kavke: Akor, sar sas leskeri daj e Maria mangaďi le Jozefoha, sar mek leha na sas veraduňi, sikaďa pes, hoj hiňi khabňi le Svete Duchostar.
19Ale o Jozef, lakero rom, sas čačipnaskero manuš a vaš oda, hoj lake na kamelas te kerel ladž, kamľa la počoral te premukel.
20Sar pal oda gondoľinelas, sikaďa pes leske o aňjelos le Rajeskero andro suno a phenďa: “Jozef, čhavo le Davidoskero, ma dara tut te lel la Maria romňake, bo oda čhavoro, saves oj užarel, hin le Svete Duchostar.
21Uľola lake čhavoro a deha leske o nav Ježiš, bo ov zachraňinela peskere manušen andral lengere bini.”
22Kada savoro pes ačhiľa vašoda, hoj pes te ačhel oda, so phenďa o Raj prekal o prorokos:
23Dikh, e pačivaľi džuvľi ačhela khabňi, uľola lake čhavoro a dena leske o nav Immanuel,” so hin prethodo: “O Del amenca.”
24Sar o Jozef ušťiľa andral o soviben, kerďa avke, sar leske oda phenďa o aňjelos le Devleskero, a iľa peske la Maria romňake.
25Ale le Jozef na sas la Mariaha ňič dži akor, medik lake na uľiľa o čhavoro. A ov leske diňa o nav Ježiš.

Eastern Slovak Romani New Testament and Portions of the Old Testament © The Word for the World International and The Word for the World Slovakia, 2021.


Learn More About E Nevi Zmluva pal o Romanes 2014