KAPINTARAN RI SALOMO 1
1
Uyumo' noyo katapatan
1 Tagami' noyo katapatan, akau ulun mangunguasa' ra pagun ru tana' ti! Porondono' noyo pangkaraan muno mabaya' ra kabanisan ra Tuhan am uyumo' Io no ra guang mabanis. 2Ulun ondo' kalo mangkinam ra Tuhan makatuum Riso. Mintalang Io risilo ondo' mangintopot Riso. 3Pangkaraan ra kalo mabanis mampainggalur ra ulun intor ri Aki Kapuuno'. Ulun ondo' sasambungon saboi mangkinam Riso, tauyuon ru kuasa' Nano. 4Kapintaran kolondo' ra ulun ondo' masaga' mamparuung kapoam kuasaan ru tula. 5Ulun ondo' mapasau am mapintar minggalur ra pamparuungan am pangkaraan ra kalo matanda'. Kalo tumaan io ra paat ru kalaatan no sumaboi.
Makapandai i Aki Kapuuno' ra atan ondo' raguon takau
6Kapintaran iono ambiluo ondo' mataau guang, kaa' kalo mangampun io ra ulun ondo' magulas ri Aki Kapuuno', sabap ra makapandai i Aki Kapuuno' ra pangkaraan am guangon nano am mokorongog ra ngaangai' raguon nano. 7Ambiluo ru Tuhan monotop ra titikop ru tana' ti. Manguasa' Io ra ngaangai' no am makapandai ra ngaangai' ondo' raguon ru ulun. 8Ulun ondo' mindagu ra malaat kalo noyo makalabus; masuku' paat ra mangapu io ra ukuman nontopot ra atan ondo' binaal no. 9Inatangan ru ulun malaat ilain toojo am ragu nilono posoboyon ra Tuhan, maa' raginio ukumin ilo sabap ra anggal nilono. 10Koson raginio baal no, sabap ri Aki Kapuuno' ondo' maruol guang mokorongog ra ngaangai' no, mulu' poyo butok ru ulun pana kalo masibuni. 11Ginio ra ilalain toojo, pai' noyo bubutok sabap ra baal raginio kolondo' onong no. Pai' niayuk panimbaal ra ragu sabap ra sunur ra inopot sotopot no mokoondo' kinibit no am matoi kou sabap ra abau muno.
Kalo sinauk ri Aki Kapuuno' kapatayan
12Pai' noyo porotongo' kapatayan sabap ra kasalaan muno galama' am pai' noyo imboloo' inan sabap ra binaal malaat, 13 sabap ra kapatayan sala' ka sinauk ri Aki Kapuuno', am kalo maansayan Io amon ru mapuso ondo' maayag no. 14Nampasauk Io ra ngaangai' no maa' raginio magulayun soroi; ngaangai' sinauk Nano moonsoi am mokoonong. Tuwo makaanit ra makapatoi kolondo' noyo risilo; kapatayan kalo manguasa' ra tana' ti, 15sabap ra moonsoi no mantilayun. 16 Koson ra binaal am ragu, ulun malaat mampakaratong ra kapatayan ra inan nilo. Moondom ilo koson moondom ra rangan. Nambaal ilo ra bantu' ra kapatayan, am ginio noyo ondo' sotopot maapu nilo.
Currently Selected:
KAPINTARAN RI SALOMO 1: TMT
Highlight
Share
Copy
Want to have your highlights saved across all your devices? Sign up or sign in
Hakcipta © Bible Society of Malaysia, 2013.