SIRAK 1
1
Paguluon
Kitab Ukum ri Musa, Kitab Nabi-Nabi am kitab-kitab ondo' tinulisan ra tauli ti, mokoondo' ra masuang pangilaan ondo' mokologo ritakau am Israil sotopot no nakaalap ra ompor sabap ra nangani' masuang pangilaan am kapintaran raginio. Kaa' kalo noyo naukop amon ru ulun mambasa' nokoowot ra katutunan koson inan nano galama'. Ulun ondo' manutun ra pangilaan musiti' niayuk mangindangan ra ulun bokon ra ragu am tinulisan nano. Ginio noyo sabap ri Jisus, aki kuli, miningkotog mambasa' ra kitab Ukum ri Musa, kitab Nabi-Nabi am kitab-kitab ra bokon ondo' pinatungkus ru kinamatuaan takau. Kopongo nanutun ra ngaangai' no, makaguang io poyo koson nanulis ra kitab ondo' suang no pangilaan am kapintaran. Arati' nano ioginio ulun ondo' moogot migila', niayuk masauk ra mapandai kaga' ralalom ru ngaangai' no am sumingkot-singkot poyo sabap ra naayag siminugut ra Ukum ri Musa.
Ginio nai ra kitab ti musiti' basaan ra susuyon toojo am ra guang maukab. Musiti' mongorot ra guang ra tayar-tayar ondo' lair pangaligan ra ragu no kalo kukula' moonsoi, kabalu' pana piniratan ku noyo tinuyu' nangalig ra ragu no. Atan ondo' tinulisan noyo ra puun no ralalom ragu Ibrani kalo nogondo' arati' toojo no amon paaligon ra ragu ru bokon. Topot baal raginio sala' ka ayuk koson kitab ragitio, kaa' niayuk koson Kitab Ukum ri Musa, Kitab Nabi-Nabi am kitab-kitab ra bokon. Pangaligan ru ragu nano masuang nansasala' intor ra puun toojo no.
Nakasuku' aku giu' ra Misir gili ra bilor katalu ngoopor am balu' bulintok ra pamarintaan ru Raja' Iuirgitis, am minayan ra giu' ra kukula' buoi. Buoi ra giu', nokoowot aku ra kaluagan koson mintutun am nampaguang aku musiti' koson paaligon ragu ru kitab ti. Nambaal aku ra kandoi maagat no ra piniratan am ingkotog ru guang saboi kitab ti nopongo am maalap kabasa' ru ulun giu' ra pagun ra bokon ondo' makaguang migila', am gumogot koson maayag sumugut ra Ukum ri Musa.
Currently Selected:
SIRAK 1: TMT
Highlight
Share
Copy
Want to have your highlights saved across all your devices? Sign up or sign in
Hakcipta © Bible Society of Malaysia, 2013.