RUT 1
1
Manding i Ilimilik am ilo sambaloi ra Moab
1-2Galing i ra kalo poyo ulun ru Israil makaraja', makabitilan nasauk giu' ra tana' ru Kanaan. Naintuma' ragili mokoondo' sangulun ungkuyon ininggalanan ri Ilimilik. Io intor ra bansa' ru Iprata, am minayan giu' ra Bitligim ra libung Jiuda. Sabap ra bitilan no, ongoi io ra pagun Moab nabaya' ra andu' nano i Naomi, am poyo ruo ngaulun anak ungkuyon nano, i Maglon am i Kilion. Minayan ilo ra Moab ra buoi. Buoi nilo ra giu', 3patoi i Ilimilik, am soroi ayuk i Naomi am ruo ngaulun anak ungkuyon nano. 4Anak-anak ungkuyon nano nanangandu' ra ruandu' ru Moab, ondo' ininggalanan ri Orpa am i Rut. Pakaayan ilo ra Moab buoi mopor ngambilor, 5i Maglon am i Kilion ti boo minatoi, i Naomi ayuk boo sangulun soroi. Io nairuanan ru ralaki nali am karuruo anak nali.
Minaya' i Rut ri Naomi siminaguli' ra Bitligim
6Kopongo raginio nakaining i Naomi ra nambarakat Tuhan ra ulun Nano am nangani' risilo ra ampos ru tinanom ondo' moonsoi. Ginio boo tampos i Naomi koson mangiruan ra Moab nabaya' ra karuruo ngaulun anak mangiwan nano. 7Pintor ilo ngaangai' koson sumaguli' ra Jiuda. Kaa' ralalom pangkiralanan, 8indagu i Naomi ra karuruo ngaulun anak mangiwan nano, “Uli' kano ra baloi ru ina' mino. Gama' ru gumonsoi Tuhan ramuyun koson akau giminonsoi raki' am risilo ondo' namagatoi. 9Gama' ru manaak Tuhan ramuyun ra suput ru abuk koson mangindalaki kau poyo.”
Karagu no ginii, alok i Naomi risilo am pamintor. Kaa' sisikok nantangi' i Orpa am i Rut. 10Indagu ilo ri Naomi, “Kalo! Maya' akai rirun sumaguli' ra bansa' muli.”
11Kaa' taam i Naomi, “Moonsoi poyo muli' kau. Kua baya' kau raki'? Aku ti kalo boo maganak koson paganduon ramuyun! 12Uli' kano. Matutuo aku noyo kalo boo sama' mangindalaki. Amon ru sama' poyo aku mangindalaki ra rondom raiti' niayuk am makaalap ra anak ungkuyon, 13makainaa kau kia saboi ilo masukor? Babaai boo ru ginio mongompong ramuyun ra kalo mangindalaki ra bokon? Pai' koon raginio anak kau. Mangiluk guang kuno ra atan ondo' mailian min kalalaat sabap ra ukuman ru Tuhan raki'.”
14Sikok poyo ri Rut am i Orpa nantangi'. Pintor boo i Orpa alok ra kalindu' ru iwan nano am uli'. Kaa' marara' i Rut mangiruan ra iwan nano. 15Indagu i Naomi riso, “Ilai' Rut, ilas muno minuli' noyo ra bansa' nano am ra dewa-dewa nano. Ugar no anak kuno. Uli' no koson ra ilas muno.”
16Kaa' taam i Rut,
“Pai' aku susubo' muli'. Iowo' aku no maya' rirun.
Ati ayuk angayan muno, maya' aku ayuk.
Ati ayuk ayanan muno, giu' no niayuk ayanan kuno. Bansa' muno, bansa' ku niayuk, am i Aki Kapuuno' ondo' sambaan muno, sambaan ku niayuk.
17Ati ayuk patayan muno,
giu' niayuk patayan kuno am labangan kuno.
Polosoon noyo Tuhan mangukum raki' ra maagat pana
amon ru mopoloso aku ra atan-atan mampatuliar rito
ondo' ak am kapatayan.”
18Kakito ri Naomi ra jumajal i Rut maya' riso, kolondo' boo atan-atan ragu ri Naomi.
19Parampus ilo ugar polos ilo nakasuku' ra Bitligim. Pakasaboi ilo, posongonsol ngaangai' namagun ra bandar no. Indagu ruandu'-ruandu' ra giu' no, “Motopot kia ginio i Naomi?”
20Taam i Naomi, “Pai' aku piawo' ri Naomi. Piawo' aku ri Mara, sabap i Aki Kapuuno' Ondo' Maayo Kaga' Kuasa' napasauk ra kaayagan kuno mapait. 21Galing i paat ra aku nanatang ra intok ragitio naukapan aku, kaa' raino inibit aku saguli' ru Tuhan am kolondo' atan-atan. Intor raino pai' aku boo piawo' ri Naomi, sabap inukum aku noyo ru Tuhan ra masuang kaimbalaan.”
22Ginio noyo tunung ri Naomi minuli' intor ra Moab nabaya' ri Rut, anak mangiwan nano, ulun ru Moab no. Nakasaboi ilo ra Bitligim ra talimpuunan ru mangkumos ra barli.
Currently Selected:
RUT 1: TMT
Highlight
Share
Copy
Want to have your highlights saved across all your devices? Sign up or sign in
Hakcipta © Bible Society of Malaysia, 2013.