AMSAL 1
1
Logo ru amsal
1 Gitio noyo amsal-amsal ri Salomo buayoi ri Daut, raja' Israil.
2Kuayan no mangindangan ra ulun atan koson masauk ra mapintar, am makapandai ra ugar ru kaayagan am niayuk makarati' ra ragu-ragu ondo' malandom arati' nano. 3Amsal ragitio mangila' ati kulaan ulun maayag ra mapintar, mabanis guang, matimpok am motopot. 4Ulun kolondo' kailian ilaan no saboi makaalap ra pangkaraan malarom, am ulun mamulok ilaan no masauk ra ulun mapandai am makapangkara' koson ra matutuo. 5Intor ra amsal ragitio ulun mapintar pana rumuang katutunan nano, am ulun makainigilaan mokoowot ra pangilaan. 6Baal raginio maratian nilo ondo' nakasibuni arati' no ralalom ru amsal am aration nilo ragu-ragu ru ulun mapintar am niayuk sundait ondo' pasalulaan nilo.
Pambilinan ra kamulakan
7 Koson mokoowot ra kaintutunan, pagulu akau musiti' mangurumat am malaa' ra Tuhan. Ulun sasambungon kalo maringkuanang ra kapintaran am marara' ilaan.
8Karaa' noyo atan rinagu ru matuo muno rirun, anak kuno, 9sabap ra pangilaan nilono mamparuang ra kaansayan muno koson ra sapak ru ulu am sisigot koson mamparuang ra kinantalur muno.
10Amon ru ulun makatula mangambi' rirun, anak kuno, pai' gagayaa' pangambian nilono. 11Amon ru mindagu ilo, “Ibok, uyumo' takau ulun namatoi risilo. Ongoyo' takau gabuo' ulun ra kolondo' sala koson ra kukuli ayuk! 12Raino kaayagan nilo matasu' am kolondo' maruol, kaa' pupus no masauk ilo koson ra ulun matikapatoi. 13Alapon takau kuliamos nilo ra mologo, maa' raginio baloi takano napanu' ra kuliamos ondo' ginaau! 14Baya' no ramon, tatayaron takau ampos ru tinakou takano!”
15Anak kuno, pai' kau baya' ra ulun koson raginio. Inggalur kau risilo. 16Kalo moorot nilo guang mambaal ra kalaatan, gogolong ka mampatoi ilo mataki'. 17Kolondo' onong mapataan ra pukot ondo' malimparang makito ru susuit rokopon no, 18kaa' ulun malaat mapataan ra landak ondo' masulungan nilo galama' – landak ra makapatoi risilo galama'. 19Ulun ondo' maguyum ra akanon ralalom kalaatan bayarin niayuk ra painawo nilo galama'.
Bolos ru kapintaran
20Rongogo' noyo! Kapintaran no mampipiau giu' ra ralan-ralan am pasar, 21mampiau ra ulun ralalom bolos matangil giu' ra kulobon ru garabang am ati-ati ayuk ulun mantitimung:
22“Alii ra ulun budu! Kula' poyo buoi ra akau masauk ra budu? Kula' poyo buoi ra akau magasab ra katutunan? Sanggilan akau migigila'? 23Iningo' min aku mangila' ramuyun. Pinsanin takamin, am mantayar ramuyun ra katutunan kuno. 24Piawon takamin rumatong kaa' kalo mangkirongog kau. Kalo lioon min aku. 25Ngaangai' pinson kuno kalo suguton min am kalo mangapu ra pangilaan kuno. 26Ginio ra, bulintok ra akau makauma' ra kapaganan ra tauli no, kuritin takamin. Bulintok ra akau malumpa' ra makalalaa' asabin takamin. 27Makalalaa' no rumatong koson ra bagiu' magibit ra asab am mangkinibit ramuyun marualan am maimbolo'. 28Bulintok raginio mampiau kau raki', kaa' kalo taamon takamin. Maguyum kau raki' ra ati-ati ayuk kaa' kalo matuum min aku. 29Akau masisang mintutun ra kapintaran am kalo masaga' gumagaya' ra Tuhan. 30Kalo igondo' kau gagaya' ra bilin kuno kapoam mampalio ra sawai am ila' kuno. 31Intor raginio, malimanan min kinibit ru binaal am ginuang min ra mangalaat. 32Ulun ra kolondo' katutunan matoi sabap ra mampalilian raki', am ulun budu mapuso sabap ra kalo mampalio raki'. 33Kaa' osoi mangkirongog raki' io maayag. Kaayagan nano moonsoi am kalo pana malaa'.”
Currently Selected:
AMSAL 1: TMT
Highlight
Share
Copy
Want to have your highlights saved across all your devices? Sign up or sign in
Hakcipta © Bible Society of Malaysia, 2013.