LUKAS 1
1
Ragu Pagulu
1Tiopilus ondo' urumaton kuno,
Masuang noyo ulun nopongo nanulis ra pambalaan motopot koson ra atan ondo' nasauk ra tatanga' takau. 2Nanulis ilo maya' ra tinunung ramon i ru ulun ondo' nakakito galama' ra atan ondo' nasauk intor ra puun i am tauli nampatanou ra bala' i. 3Kopongo ngaangai' no naimumuyan ku toojo intor ra puun i, aku pana nampaguang ra moonsoi mamatik aku rirun ra rondo' pambalaan ondo' masusui toojo. 4Binaal ku gitio koson makatutun kou ra ngaangai' atan ondo' nangilaan rirun i motopot toojo.
Pinabala' ra i Juanis Mampariu' anakon
5 Paat ra i Irodis raja' ru Judia, mokoondo' sangulun imam Jaudi makainggalan ri Jakaria. Io sangulun papag ru imam Jaudi, tayar ru Abia. Inggalan ru andu' nano am i Ilisabit, am niayuk papag ru imam. 6Kaayagan ru mansawo ti mapabansuk ra guang ri Aki Kapuuno'. Ilo karuruo gumagaya' toojo ra ngaangai' susuban am ukum ru Tuhan. 7Kaa' kolondo' anak nilo sabap ra i Ilisabit ti tabanang am matutuo ilo no karuruo.
8Paat ra sangarawan, i Jakaria nampaugar ra kandoi nano koson ra imam ra saang ri Aki Kapuuno', maya' ra paat ru tayar Abia no. 9Sumugut ra pampilian, ondo' masalok baalon ru imam-imam, napili' io sumubol ra Baloi Tuhan am monolob ra kaminyan. 10Liliwa' monolob i pinaugar, ulun masuang makiasi' giu' ra liwar.
11Paat ragili, pulusat malaikat ru Tuhan ri Jakaria. Minigor malaikat no tampilon ra pamiris ru panalaban, intok nanalaban ra kaminyan. 12Paat ri Jakaria nakakito ra malaikat no, naliangan am nalaa' io. 13Kaa' indagu malaikat no, “Pai' kalaa', Jakaria! Norongog noyo ri Aki Kapuuno' pinakiasian muli. I Ilisabit, andu' muno maganak ra sangulun anak ra ungkuyon. Inggalani' io ri Juanis. 14Maansukan kou kaga' am masuang ulun maansukan ra io maanak lalaing no! 15 Masauk io ra sangulun maatang maya' ra pagilangan ru Tuhan; ginio nai ra kalo makainum io ra anggur kapoam inumon ra bokon ondo' makagauk am kuasaan io ru Ambiluo ri Aki Kapuuno' intor ra io kakaanak ayuk poyo. 16Masuang ulun ru Israil ibiton no sumaguli' ri Aki Kapuuno', Tuhan nilai. 17 Momongo io ra ralan ru Tuhan am maikang am makakuasa' io koson ra nabi Ilia. Mopobonsoi io ra ama' am anak, magibit ra ulun ondo' kalo gumagaya' sumaguli' ra pangkaraan motopot. Koson raginio boo, momongo io ra ulun tumampos manguma' ra Tuhan.”
18Kuati' ri Jakaria malaikat no, “Ati kulaan aku makapandai ginio masauk? Akai mansawo matutuo noyo.”
19 Taam malaikat no, “I Gabriil aku. Mangandoi aku ri Aki Kapuuno'. Io nanusub raki' mampasaboi ra pambalaan moonsoi ti rirun. 20Atan ondo' rinagu kutu, masauk toojo ra orou inaru' no. Kaa' kalo mangintopot kou, kalo makaindagu kou saboi masauk atan ondo' rinagu kuli.”
21Liliwa' raginio, ulun masuang no naginaa ayuk ri Jakaria. Nangimuag ilo sabap ra nabuoi io kaga' giu' ra ralalom ru Baloi Tuhan i. 22Paat ra io miningkual, kalo boo makaindagu io risilo, mambaal io ayuk ra tatandu' ra kalindu' mambala' risilo. Ilo pana nakapandai boo ra i Jakaria ti nakakito ra rondo' pagilangan intor ri Aki Kapuuno' ralalom ru Baloi Tuhan i.
23Kopongo kandoi no ra giu' i, uli' i Jakaria ra baloi. 24Kalo nabuoi ragili, andu' nali i Ilisabit pana maapang. Nagaput io ra baloi buoi limo ngambulan. 25Indagu io, “Pupus nali, inindangan aku ru Tuhan ra Io namuso ra asab kutu!”
Pambalaan ra i Jisus anakon
26Paat ri Ilisabit maapang onom ngambulan noyo, panusub i Aki Kapuuno' ra malaikat Nano, i Gabriil mongoi ra Nasarit, rondo' pekan ru libung Galilia. 27 Sinusub i Gabriil mongoi ra sangulun ralaa, makainggalan i Maria. Ralaa ti makatamung makainggalan i Jusup, am io ti intor ra papag ru raja' Daut ra galing i. 28Ratong malaikat no ri Maria am indagu, “Kaansayan rirun, okou no totopot kaansayin ru Tuhan! Tuhan mabaya' rirun!”
29Naliangan kaga' i Maria nakaining ra ragu ru malaikat i, saboi nampaguang io, atan arati' ru ragu ni. 30Indagu poyo malaikat riso, “Maria, pai' kalaa', sabap ra maansayan i Aki Kapuuno' no rirun. 31 Maapang kou am maganak kou ra sangulun anak ungkuyon. Inggalani' anak no i Jisus. 32 Masauk Io ra sangulun ondo' maatang kaga' am Io ti sabiton Anak ru Tuhan Ondo' Masawat Kaga'. Saukon Io ri Aki Kapuuno' ra sangulun raja', koson ra kinamatuaan Nali, i raja' Daut. 33Mantilayun Io mamarinta ra papag ri Jakub am pamarintaan Nano kolondo' pupus.”
34Indagu i Maria ra malaikat no, “Aku ti ralaa am kalo igondo' lampit ra ungkuyon. Ati kulaan masauk baal raginio?”
35Taam malaikat no, “Matong Ambiluo ri Aki Kapuuno' rirun am kuasa' ri Aki Kapuuno' sumoroi rirun. Ginio sabap ra anak ondo' anakon muno sabiton Anak ri Aki Kapuuno' ondo' matulai. 36Ilai', i Ilisabit pabukat muno, maapang io onom ngambulan noyo, kabalu' pana matutuo io no am ulun mindagu ra tabanang io. 37 Kaa' kolondo' kalo mabaal ri Aki Kapuuno'.”
38Indagu i Maria, “Aku ti ulipon ru Tuhan. Polosoon noyo masauk raki' koson ra rinagu muni.” Liot boo malaikat no nangiruan ri Maria.
Minongoi i Maria pagayam ri Ilisabit
39Kopongo ayuk raginii, parayus i Maria ra rondo' pekan ra Judia, giu' ra kabuluran. 40Minongoi io ra baloi ri Jakaria, am paat ra io minumpos, indagu io ri Ilisabit, “Kaansayan rirun.” 41Kaining ayuk ri Ilisabit ragu ri Maria ni, lalagang tininai' nali pana minimbuir. Kinuasa' i Ilisabit ru Ambiluo ri Aki Kapuuno', 42 am taam io ra mosongou, “Okou no binarakat toojo intor ra ngaangai' ruandu'! Am binarakat niayuk anak ondo' anakon muno! 43Osoi niayuk aku ti saboi ina' ru Tuhan kuno matong raki'. 44Kaining ku ayuk ragu muni, lalagang tininai' kutu pana minimbuir naansukan. 45Mumpara' bansuk muno, sabap ra nangintopot kou ra rinagu ru Tuhan rirun no masauk!”
Rimbai ri Maria mongompor ri Aki Kapuuno'
46 Indagu i Maria,
“Mongompor aku ra Tuhan ra sotopot-topot ru guang kutu.
47Maansukan aku kaga' sabap ra i Aki Kapuuno' Mamamayag kuno.
48 Nangkara' Io raki', kabalu' pana aku ti ulipon Nano ondo' musikin!
Intor raino aku ti sabiton ru ngaangai' ulun ra aku binarakat ru Tuhan.
49Mongompor aku ri Aki Kapuuno' Ondo' Maayo Kaga' Kuasa' sabap ra binaal Nano raki' baal ondo' maatang kaga'.
Matulai inggalan Nano.
50Makaasi' i Aki Kapuuno' ra ulun ondo' mangurumat Riso
intor ra rondo' papag suku' ra papag ra bokon.
51Mampakito Io ra kuasa' Nano
am mampatuliar ra ulun-ulun mangasumbung.
52 Patuunon No raja' ondo' nanguasa',
kaa' pasingkoton No ulun ondo' musikin.
53Basugon No ulun nangaitilan ra ngaangai' ondo' moonsoi,
kaa' paugaron No ulun langkaya' ra kolondo' taakin risilo.
54Mangindangan Io ra ulun ru Israil, ulipon Nano,
sabap ra mangkara' Io ra asi' Nali.
55 Koson ondo' binantu' Nano ra kinamatuaan takali,
i Abragam am papag nano ra sabuoi-buoi no.”
56Talu ngambulan buoi i Maria siminimpung ri Ilisabit, am minuli' boo ra baloi nano galama'.
Naganakan ri Juanis Mampariu'
57Kasuku' orou paganakan ri Ilisabit, am naganak io ra sangulun lalagang ungkuyon. 58Pakaining pinasambalayan am pabukat-pabukat nano ra ati kulaan gayo ru asi' ru Tuhan ri Ilisabit i, minaya' ilo niayuk riso maansukan.
59 Balu' ngoorou noyo buoi ru lalagang i, ratong ilo koson mongoi panunat riso. Masaga' ilo manginggalan ra lalagang no i Jakaria, paansangayon ra ama' nano. 60Kaa' indagu ina' nano, “Kalo! Inggalan nano i Juanis.”
61Indagu ilo riso, “Kolondo' sangulun pana intor ra pabukat-pabukat muno makainggalan koson raginio.” 62Pambaal ilo boo ra tatandu' ru kalindu' koson mangkuot ri Jakaria ra osoi painggalanon ra anak nano.
63Pakitaak i Jakaria ra rondo' papan pamatikan am panulis io, “I Juanis inggalan nano.” Nangimuag ilo ngaangai'. 64Paat ragili niayuk makaindagu boo saguli' i Jakaria am pongompor io ri Aki Kapuuno'. 65Nangalaa' ngaangai' pinasambalayan nano am tanou raginio nakatabual ra ngaangai' pamagunan ru kabuluran ru Judia. 66Ngaangai' ulun ondo' nakaining ra tanou raginio nampaguang, “Atan nua' kasaukan ru lalagang no ra tauli no?” Sabap ra kuasa' ru Tuhan sumoroi riso.
Nampasaboi i Jakaria ra pambalaan ru Tuhan
67I Jakaria, ama' ru lalagang no, kinuasa' ru Ambiluo ri Aki Kapuuno' am nampasaboi io ra pambalaan ru Tuhan. Indagu io,
68“Omporo' takau no i Aki Kapuuno', Tuhan ru ulun ru Israil,
sabap ra minatong Io mangindangan am mampalabus ra ulun Nano.
69Nanusub Io ra Mamamayag ondo' maikang matong ritakau,
intor ra papag ru raja' Daut, ulipon Nali.
70Sumugut ra nabi-nabi ondo' pinili' Nano ra galing i, nangani' Tuhan ra bantu' Nano
71koson mamayag ritakau intor ra pantula' takano,
am niayuk intor ra kuasa' ru ulun mangasisang ritakau.
72Koson mampakito ra asi' Nano ra kinamatuaan takali
am suguton No bantu' Nali ra matulai i.
73-74Nagibot am nambantu' Io ri Abragam, kinamatuaan takali,
mamayag Io ritakau intor ra pantula' takano,
maa' raginio makakau' takau mangandoi Riso,
75am mambaal ra kasagaan Nano am mangandoi Riso ayuk,
buoi itakau maayag ra tana' ti.
76 Okou anak kuno, piawon ra nabi ri Aki Kapuuno' Ondo' Masawat Kaga'.
Sumigulu kou ra Tuhan
koson momongo ra ralan Nano.
77Koson mambala' ra ngaangai' ulun Nano ra bayagon ilo
paat ra ampunon tula nilono.
78Tuhan takano mataau am makaasi' kaga' am matong Io mamayag ritakau.
Koson niayuk ra mato ru orou sumirang paat ra susuab,
79 mangani' Io ra sinda ra ulun
ondo' mayan ra kalandaman am malaa' ra kapatayan, am maningganai ritakau ra ralan sumuku' ra kaansayan.”
80Anak ri Jakaria i siminukor am kinuasa' io poyo toojo ri Aki Kapuuno'. Minayan io giu' ra tana' kaagisan suku' ra orou pambalaan nano ra ulun ru Israil osoi io sotopot no.
Currently Selected:
LUKAS 1: TMT
Highlight
Share
Copy
Want to have your highlights saved across all your devices? Sign up or sign in
Hakcipta © Bible Society of Malaysia, 2013.