MAMPATANOU 1
1
Kaayagan ru ulun kolondo' onong
1Ragu-ragu ragitio intor ra Ulun Mangkara', raja' giu' ra Jirusalim. Io anak ungkuyon ri Raja' Daut.
2Ngaangai' kolondo' onong am kolondo' ampos, kon ru Ulun Mangkara'. Kaayagan no kolondo' onong, ngaangai' kolondo' ampos. 3Ngaangai' ulun gumogot kaga' mangandoi ralalom ru kaayagan nilo, kaa' ati nua' ampos ondo' naalap nilo? 4Rondo' papag matong am papag ra bokon poyo mugar, kaa' tana' ti lakat poyo nogondo'. 5Mato ru orou sumirang am tumolop, am maagou-agou sumaguli' ra intok io sumirang. 6Angin sumiob ra rabugus am ra ralayo, lumibut am sumaguli' poyo. 7Ngaangai' sungoi tumuun ra raat, kaa' kalo niayuk mototop. Sumaguli' timug no giu' ra ralayo ru sungoi, am tumuun poyo saguli'. 8Ngaangai' makajala', kalo maragu. Mato kalo majala' magilong, talingo kalo majala' mangkirongog. 9Baal ondo' nasauk ra galing i, masauk poyo saguli'. Atan ondo' binaal ra galing i, baalon poyo saguli'. Kolondo' nakabagu ra titikop ru tana' ti. 10“Ilai' ga,” kon ru ulun, “gitio noyo baguon!” Kaa' ngaangai' no lair noyo nasauk ra itakau kalo poyo inanak. 11Kolondo' ulun nangkara' ra kasaukan ra galing i; kasaukan ra raino am orou matong no kalo karaan ru osoi pana paat ra orou rumatong no.
Ondo' nailian ru Ulun Mangkara'
12Aku, i Ulun Mangkara', mamarinta giu' ra Jirusalim koson raja' ru Israil. 13Gumogot aku koson migigila' toojo am mintutun ra atan ayuk binaal ralalom ru tana' ti.
Kaayagan ondo' inaru' ri Aki Kapuuno' ra tayar ru ulun ra tana' ti makangiluk kaga'. 14Nakakito aku no ra ngaangai' binaal ru ulun ra tana' ti, am sotopot no ngaangai' no kolondo' onong koson mangilou ra angin. 15Ondo' napikong i kalo maalap banison; ati kolondo' i kalo mauntob.
16 Mindagu aku ralalom ru guang kuno, “Nasauk aku no ra maatang kaga', mapintar poyo intor ra ngaangai' ulun ondo' namarinta ra Jirusalim ra kalo poyo bulintok kuno. Nakapandai aku no ra masuang kapintaran am katutunan ondo' motopot.” 17Gumogot aku toojo koson makapandai ra nansasalaan ru katutunan am kabuduan, kapintaran am sasambungon. Kaa' nakito ra aku ti koson mangilou ra angin ayuk. 18Amon ru gumaai suang ru kapintaran, gumaai suang ru pangalabaan. Amon ru gumaai suang ru katutunan, gumaai suang ru kaimbalaan.
Currently Selected:
MAMPATANOU 1: TMT
Highlight
Share
Copy
Want to have your highlights saved across all your devices? Sign up or sign in
Hakcipta © Bible Society of Malaysia, 2013.