BARUK 1
1
Paguluon
1 Gitio noyo kitab ondo' tinulisan ri Baruk lalaing ri Niria akupu ri Magsiya, papag ri Jidikia, Asadia, am Ilkia. Kitab ragitio tinulisan giu' ra Babil, 2Paat orou katulu' sila' raginio ralalom bilor kalimo kalupus ulun ru Babilonia nanguasa' am nonolob ra bandar Jirusalim.
3-4Kitab i binasa' galama' ri Baruk ra saang ru Raja' Jikonya, anak ru Raja' Joyakim, raja' Jiuda am giu' ra saang ru ngaangai' mamagun ondo' minayan giu' ra Babil mamaar ra Sungoi Sud. Ilo ngaangai' minatong koson mangkirongog ra pambasaan ru kitab i: ulun nauligan kaga', pabukat-pabukat ru raja', ulun tuu' lair; ontoson ragu ngaangai' ulun intor ra ngaangai' bansa'.
5Kopongo kitab i binasa', nantangi' ilo, nampali, am nakiasi' ra Tuhan. 6Am sigagama' nangani' ra taak maya' ra mataakan nano, 7am ruit ondo' pinataak i inataran ra Jirusalim intok ru Tingganai Maayo Imam Joyakim anak ri Ilkia, akupu ri Syalom am ra imam-imam ra bokon mabaya' ra ngaangai' ulun ondo' mabaya' ra Tingganai Maayo Imam giu' ra Jirusalim.
8Paat orou koopor ra sila' Siwan, nangalap i Baruk ra kuliamos ondo' tinakou intor ra Baloi ru Tuhan am pinasaguli' no ra pagun ru Jiuda. Ginio noyo kuliamos pirok ondo' binaal ri Jidikia, anak ru Raja' Josia intor ra Jiuda, 9kalupus i Jikonya, ngaangai' tingganai, ulun-ulun manukang, ulun mauligan toojo ralalom ru mamagun am ulun kaindalaman inibit intor ra Jirusalim mongoi ra pamatiran giu' ra Babil maya' ra susuban ri Nibukadnijar, raja' ru Babilonia.
Surat poongoyon ra Jirusalim
10Gitio noyo surat intor ra ulun ru Jaudi giu' ra Babil posoboyon ra Tingganai Maayo Imam am ulun giu' ra Jirusalim.
“Kasaga' no mamakai ra ruit ondo' inataran maiti koson mambali ra bibiag tinambiag tayar ru taak simbalui koson mapabansuk ra guang ru Tuhan am niayuk taak simbalui koson mangampun ra tula am koson mambali ra kaminyan am niayuk gandum tayar ru taak simbalui koson paringkuanangan ra Tuhan. Pataako' noyo ngaangai' taak simbalui no giu' ra rasawat ru altar ru Tuhan, i Aki Kapuuno' takau. 11Kasaga' no makiasi' ra tayar ru Raja' Nibukadnijar, raja' ru Babilonia am Biltsajar anak nano. Gama' ru ilo ruo maayag mamimio ra sabubuoi no. 12Gama' ru Tuhan mampaikang am mangila' ramon maa' raginio maayag ralalom panindungan ru Raja' Nibukadnijar, raja' ru Babilonia, am Biltsajar anak nano, am gumagaya' risilo buoi ru kaayagan mai, suku' akai ti iowon nilo ruo. 13Pabukat kau ngai', pakiasi' kano ra Tuhan i Aki Kapuuno' koson ramon sabap akai ti makatula' Riso, am saboi raino kasangitan Nano ondo' maayo kaga' lakat poyo lumumpa' ramon. 14Basaa' noyo kitab ondo' inataran ti ra saang ru ngaangai' ulun ralalom Baloi ru Tuhan paat ra Pangiantakan Mangkalukub ra Raun am paat ra orou-orou sambayang.”
Pangiawan ra tula
15Ngaangai' pabukat musiti' mangiou koson ragitio, “Tuhan, i Aki Kapuuno' takau ti matimpok, kaa' akai ti lakat poyo liniputan ru guang mauyu'. Ngaangai' mai, ulun ru Jiuda, mamagun ru Jirusalim, 16Raja'-raja' mai, ngaangai' tingganai, ngaangai' imam, ngaangai' nabi, am kinamatuaan mai tinauyu', 17sabap akai ti makatula' ra Tuhan, i Aki Kapuuno' mai 18am kalo gumagaya' Riso. Akai kalo mangkirongog Riso am kalo maayag sumugut ra susuban-susuban Nano. 19Intor ra Tuhan nagibit ra kinamatuaan mai miningkual intor ra Misir saboi orou raiti', kalo giminagaya' akai Riso. Akai kalo mampalio Riso am kalo minaya' ra susuban Nano. 20 Ginio ra saboi raino natiu' akai ra karaat am usung ondo' sinusub ru Tuhan ramon ondo' pinabala' galing ri Musa ulipon Nano, paat ra Tuhan nagibit ra kinamatuaan mai miningkual intor ra Misir koson mangani' ramon ra rondo' pagun ondo' langkaya' am malabung. 21Akai kalo masaga' mangkirongog ra bilin ru Tuhan ondo' pinasaboi ramon ondo' pinabala' galing ra nabi-nabi. 22Limpatui ru ginio minaya' akai ra gogoton malaat ru guang mai ra sumamba ra dewa-dewa am mambaal ra baal-baal ondo' kasisangin ru Tuhan, i Aki Kapuuno' mai.
Currently Selected:
BARUK 1: TMT
Highlight
Share
Copy
Want to have your highlights saved across all your devices? Sign up or sign in
Hakcipta © Bible Society of Malaysia, 2013.