RINALATAN 1
1
1 I Tiopilus pabukat kuno, ralalom kitab kasaa' kuli, nanulis aku noyo ra ngaangai' ondo' binaal am nangilaan ri Jisus, intor ra Io nanalimpuun ra kandoi Nali, 2saboi ra orou nangkayangan Riso mongoi ra suruga'. Io kalo poyo minugar, mabaya' ra Ambiluo ri Aki Kapuuno' nambilin Io ra rasul-rasul ondo' pinili' Nano. 3Kopongo ra pinatayan Nali, ra buoi apat ngoopor ngoorou i, ingkukula' Io minintalang risilo am niayuk nampaintopot risilo ra Io totopot naayag. Nakakito ilo Riso, am nakimansunur Io risilo intor ra Pamarintaan ri Aki Kapuuno'. 4 Paat ra ilo nantitimung, panusub Io risilo, ragu Nano, “Pai' kau ugar intor ra Jirusalim. Paginaa kau ayuk saboi i Ama' mangani' ra ondo' binantu' Nali sumugut ra nambalaan Kuli ramuyun ragili. 5 Nampariu' i Juanis ramuyun ra timug, kaa' kukula' ngoorou poyo am riwon kau ra Ambiluo ri Aki Kapuuno'.”
Kinayang i Jisus mongoi ra suruga'
6Paat ra rasul-rasul am i Jisus nantimung, pangkuot ilo Riso, konilo, “Tuhan, raino kia pabigoron Mu saguli' Pamarintaan ru Israil?”
7Taam i Jisus, “Ama' Kuno galama' mangaru' ra orou am paat nano. Ginio kalo pana makapandai kau, sabap ra baal raginio i Ama' ra kuasa'. 8 Kaa' akau makaalap ra kuasa' paat ra Ambiluo ri Aki Kapuuno' no matong ramuyun. Masauk kau boo ra sasi' Kuno giu' ra Jirusalim, ngaangai' ra Judia, am Samaria, am saboi ra ati ayuk intok ra tana' ti.” 9 Karagu ayuk i Jisus ginii, kinayang Io mongoi ra suruga' liliwa' ilo nagilong, am gaun i pana nanili Riso intor ra pagilangan nilai.
10Paat ra ilo lakat ayuk poyo nantingaa' ra rasawat, liliwa' i Jisus kinayang, pulusat ru ruo ngaulun nambayang ra mapulak minigor umbir risilo. 11Konilo risilo, “Ulun Galilia kau ngai', kua bigor kau ayuk ragiti am pantingaa' ra rasawat? I Jisus, ondo' nakito min kinayang mongoi ra suruga', sumaguli' Io poyo mogondo' ra nakito min raitii' ni.”
Pamamalit ri Judas
12Rasul-rasul no pana saguli' ra Jirusalim intor ra Bulur Jaitun. Bulur ti galur no olo'-olo' rondo' kilomito intor ra Jirusalim. 13 Giu' ra Jirusalim minongoi ilo ra baloi inayanan nilo, am pagaloi ilo boo ra lamin ra rasawat. Rasul-rasul no am i Pitrus, Juanis, Jakubus am i Andrias, i Pilipus am i Tomas, i Bartolomius am i Matius, i Jakubus anak ri Alpius, i Simon ulun Patriot am i Judas anak ri Jakubus. 14Ngaangai' ilo ti rondo' guang am masalok ilo tumimung makiasi' mababaya' ra ruandu'-ruandu', i Maria ina' ri Jisus am pabukat-pabukat ri Jisus.
15Paat ra rondo' orou timinimung olo'-olo' maatus ruo ngoopor ngaulun, bigor i Pitrus koson mambala' risilo, kono, 16“Pabukat kau ngaangai'! Atan ondo' tinulisan ra Buuk Kitab no, maaru' masauk. Ragili Ambiluo ri Aki Kapuuno' nambala' noyo mansail ra ragu ru raja' Daut intor ri Judas ti, ra io nanulu' ra ulun mamparakop ri Jisus. 17I Judas i sangulun intor ritakau, am io niayuk napili' noyo koson maya' mangandoi mabaya' ritakau.”
(18 Nambali i Judas ra sampila' tana' ra ruit ondo' naapu no intor ra kalaatan nali. Karatu' am patoi io ra giu' i, suku' tinai' nali naburiak am ngaangai' suang no nakaingkual. 19Ngaangai' ulun ondo' minayan ra Jirusalim i naala' ra atan nasauk ti. Ginio sabap ra inggalani' nilo tana' no ra ralalom ragu nilai ra Akildama, ondo' makaarati' ra “Tana' Raraa'”.)
20Tungguli' poyo ri Pitrus, kono, “Ralalom kitab Mazmur mokoondo' tinulisan koson ragitio,
‘Polosoon ayuk inayanan nano masiluk;
sangulun pana pai' ayan ra intok no.’
Mokoondo' niayuk tinulisan koson ragitio,
‘Polosoon noyo ulun bokon pamamalit riso.’
21Ginio ra, musiti' sangulun poyo maya' ritakau masauk ra sasi' ra Tuhan Jisus naayag noyo saguli' intor ra kapatayan. Ulun no musiti' sangulun intor ra ulun ondo' masalok minaya' ritakau paat itakau maya-aya' ra Tuhan Jisus ra ati ayuk pana paat ragili, 22 intor i Juanis timinalimpuun mampariu' ra ulun saboi ra orou i Jisus kinayang mongoi ra suruga'.”
23Ulun ondo' nakasaang ragili nangaru' ra ruo ngaulun, ilo ti am i Jusup ondo' sabiton ri Barsabas (ondo' sabiton niayuk i Justus), am i Matias. 24-25Pakiasi' ilo boo, konilo, “Tuhan, Okou nakapandai ra guang ru ngaangai' ulun. Tinatang noyo ri Judas kandoi nali koson sangulun rasul am minatoi noyo. Tului' akai, osoi intor ra ruo ngaulun ti ondo' pilion Muno koson pamamalit ri Judas i.” 26Kopongo ragili pagugundi' ilo am kapili' i Matias masauk ra rasul, koson maya' ra mopor am rondo' rasul ra bokon i.
Currently Selected:
RINALATAN 1: TMT
Highlight
Share
Copy
Want to have your highlights saved across all your devices? Sign up or sign in
Hakcipta © Bible Society of Malaysia, 2013.