2 SAMUIL 1
1
Binalaan i Daut ra minatoi noyo Raja' Saul
1Kopongo Raja' Saul minatoi, minuli' i Daut nalupus nangala ra ulun ru Amalik. Ruo ngoorou buoi ri Daut minayan giu' ra Jiklag. 2Suabon no, minatong sangulun ungkuyon mamulok intor ra pangkiman ru Raja' Saul. Koson tatandu' ru mangulir, rinilak ru ungkuyon mamulok no bayang nano am tinaukan ulu nano ra tana'. Ratong io ri Daut am igulatur koson mangurumat riso. 3Pangkuot i Daut riso, “Ati kia intor mutu?”
Taam ungkuyon mamulok no, “Bagu aku nagiru' intor ra pangkiman ru ulun ru Israil.”
4Kon ri Daut, “Tunungo' noyo atan ondo' nasauk.”
Taam ungkuyon mamulok no, “Saujor maili nagiru' intor ra pangayawan am masuang saujor minatoi, nakaaya' Raja' Saul am i Jonatan anak nano.”
5Kon ri Daut, “Ati kulaan kou nakapandai ra Raja' Saul am i Jonatan minatoi noyo?”
6 Taam ungkuyon mamulok no, “Nakainamot ra aku soroi giu' ra Gunung Gilboa, am nakito ku Raja' Saul nakasandig ra tutura' nano. Paat raginio masuang kurita' kuda am pulalai ru nangkuda ru pantula' ondo' nakainggaar noyo koson magawang riso. 7Liminikar Raja' Saul am nakakito raki', am nampiau io raki'. Taam aku, ‘Iou raja' kuno.’ 8Nangkuot io ra aku ti osoi, am balai' ku io ra aku ti ulun ru Amalik. 9Kopongo raginio indagu io, ‘Ibok, potoyo' aku no! Napilatan aku toojo am matikapatoi noyo.’ 10Inggaar aku riso am potoyo' ku io, sabap ra nakapandai aku ra maratu' io ayuk, maaru' matoi niayuk. Pinuas ku karaun ra ulu nano am paguso' ku golong intor ra longon nano, am ngaangai' no inibit ku rirun.”
11Pokorongog raginio, rinilak ri Daut bayang nano ra mangiluk guang. Ngaangai' ru ulun nano nambaal niayuk raginio. 12Nanulaboi ilo, nangulir ilo, am nampali ilo buoi songorou ra tayar ru Raja' Saul am i Jonatan, am tayar ru Israil ulun ru Tuhan, sabap ra masuang kaga' ulun minatoi ralalom pangayawan.
13Kopongo raginio nangkuot i Daut ra ungkuyon mamulok ondo' nagibit ra tanou no, “Ati kia intor mutu?”
Taam ungkuyon mamulok no, “Ulun aku ru Amalik, kaa' namagun ra pagun mutu.”
14Nangkuot i Daut riso, “Kua kia baani kou namatoi ra raja' ondo' pinili' ru Tuhan?” 15Kopongo raginio nampiau i Daut ra sangulun intor ra ulun nano am nanusub, “Potoyo' io!” Ulun no nonobok ra ungkuyon mamulok ru Amalik no saboi minatoi. 16Kon ri Daut ra ulun ru Amalik no, “Gitio kasalaan muno galama'. Inukum matoi mu okou galama' sabap ra nangiou kou ra okou noyo ondo' namatoi ra raja' ondo' pinili' ru Tuhan.”
Nanulaboi i Daut ra Raja' Saul am i Jonatan
17I Daut pana nanulaboi boo ra Raja' Saul am anak nano i Jonatan. 18 Nanusub i Daut maa' raginio rimbai ru sulaboi ti pailaan ra bansa' ru Jiuda. (Rimbai ru sulaboi ti tulisin ra ralalom ru Kitab Jasar).
19“Tingganai takano pinatoi giu' ra bulur-bulur ru Israil!
Tutumula'-tutumula' takano minatoi noyo!
20Pai' potonowo' tanou raginio giu' ra Gat,
kapoam giu' ra ralan mongoborok ru Askilon,
pai' masaboi ruandu' ru Palistin magindii,
kapoam ruandu' ondo' kalo makaulig ri Aki Kapuuno' maansukan.
21“Polosoon rasam am bolobou kalo rumatu' giu' ra kabuluran Gilboa,
polosoon umo-umo nano mapuaan,
sabap ra perisai ru tutumula' nakabanta' ra giu' no,
perisai ru Raja' Saul kalo boo inumawan.
22Panah ri Jonatan sakti, mamatoi;
ilang ru Raja' Saul kalo makaasi',
nonobok ra saujor ondo' mapanggol,
am namatoi ra pantula'.
23“Raja' Saul am i Jonatan, kasagain am tagamin,
kalo nantuliar ralalom ru bayag am matoi;
matasik ilo poyo intor ra kanui,
am maikang poyo intor ra singa'.
24“Akau ruandu'-ruandu' ru Israil, pangulir kano ra Raja' Saul.
Pinambayang no akau ra bayang malia' ondo' mologo,
linimpor no akau ra mas am batu mologo.
25“Tutumula'-tutumula' namagatoi noyo,
minatoi giu' ra tatanga' ru pangayawan.
I Jonatan minatoi giu' ra kabuluran.
26“Mangiluk guang kuno sabap ra okou, i Jonatan, pabukat kuno.
Mapara' bonsoi muno raki'!
Mapara' kinatulai ru togom muno raki',
am matulai poyo intor ra togom ru ruandu'.
27“Tutumula' takali namagatoi noyo,
kinandoi nilono nakabanta' am nalubat.”
Currently Selected:
2 SAMUIL 1: TMT
Highlight
Share
Copy
Want to have your highlights saved across all your devices? Sign up or sign in
Hakcipta © Bible Society of Malaysia, 2013.