Zekariya 14
14
Jehova mbwasooboola kukubeteka bantu akusalazya Jerusalemu
1Amubone! Buzuba bwa-Jehova buyoosika, zisaalo zyanu niziyooabwa akati kanu, 2#Joel 3:2Njoobunganya bamasi boonse kuzoolwisya jerusa lemu, nkabela munzi uyoozundwa, amaanda ayoomwayigwa, abanakazi bayootizigwa. Cisela camunzi ciyootolwa mubuzike, pele bamwi bantu basyaala tabakooyoogwisigwa mumunzi. 3Elyo Jehova uyoonyamuka kuyoolwisya masi ayo mbubonya mbwalwana mubuzuba bwalumamba. 4#Ezk 11:23; Inc 1:11,12; Joel 3:12Nkabela mubuzuba obo zituta zyakwe ziyoolyatilila acilundu ca-Elaioni cili kujwe lya-Jerusalemu. Lino cilundu ca-Elaioni ciyooandulwa akati, kuzwa kujwe akumbo kukabe mumpata mupati loko, nkabela cisela cimwi cacilundu ciyooswena kunyika, acisela cimwi ciyooswena kumusanza. 5#Am 1:1; Mt 24:30; Joel 3:11Mumpata wazilundu zyangu uyoosinkwa, nkaambo mumpata wazilundu uyootana kumabazu aawo ku-Azeli. Nkabela muyoocija mbubonya mbumwakacija muzuzumo wanyika mumazuba aa-Uziya mwami wa-Juda. Mpawo Jehova Leza wangu uyoosika, abasalali boonse bayooba awe.
6Lino mubuzuba obo takukooyooba impeyo niciba caanda. 7#Ciy 21:23Alimwi kuyooba isikati luzutu (Jehova ulizi obo), takukooyooba isikati amasiku pe, nkaambo ciindi cagogo kuyooba mumuni.
8 #
Ezk 47:1; Joh 7:38; Ciy 22:1 Nkabela mubuzuba obo kuyookunka maanzi maumi kuzwa ku-Jerusalemu. Cisela cimwi cao ciyooya kulwizi lwakujwe, acisela cimwi ciyooya kulwizi lwakumbo. Taakooyooyuminina pe, mainza acilimo.
9 #
Int 2:8; Ef 4:5,6 Nkabela Jehova uyooba mwami wanyika yoonse mubuzuba obo. Jehova uyooba omwe alike, azina lyakwe liyooba lyomwe.
10 #
Neh 3:1
Lino nyika yoonse iyoosandulwa kuba ibanda, kuzwa ku-Geba akusikila ku-Rimoni kumusanza waku-Jerusalemu. Pele Jerusalemu ucinoosyeede ajulu mpobede, kuzwa kumulyango wa-Benjamini kusikila kumulyango mutaanzi, nkukuti mulyango wakucooko, akuzwa kucisanza caHananeli akusikila kudindi lyakusinina waini lyamwami. 11#Jer 31:40; Ciy 22:3Nkabela kuyooba bantu bakede mumonya. Takukooyooba limbi lutuko pe. Jerusalemu uyookala cakuliiba.
12Nkabela nceeci cuumo Jehova ncati umye bantu boonse beza kukulwisya Jerusalemu. Uyoobozeka nyama yabo nibaciimvwi amaulu aabo, aalo meso aabo ayoobola mumakomba aao, azyalo indimi zyabo ziyoobola mukanwa lyabo. 13#1 Sam 14:15Mubuzuba obo bayoosikilwa lupyopyongano lupati luzwa kuliJehova, aboobo umwi aumwi uyoojata ijanza lyamweenzinyina. Boonse bayootambika maanza aabo cakuumana, umwi aumwi mweenzinyina. 14Acalo cisi ca-Juda ciyoolwisya Jerusalemu. Nkabela lubono lwabamasi oonse aaengelede luyooyobololwa, ingolida ansiliva azyakusama zinji loko. 15Alimwi luumo luli mbubonya luyoowida ambizi amabbiza ankamela ambongolo abanyama boonse bali muzilao.
16 #
Is 66:23; 1 Tim 6:15; Neh 8:14; Hos 12:9; Lev 23:39-43 Lino bantu boonse basyeede akati kamisyobo eyo iyakasika kuzoolwisya Jerusalemu bayooboola myaka yoonse kuzookomba Mwami Jehova wamakamu akuzoolya ipobwe lyazilao. 17#Is 60:12Nkabela kufumbwa musyobo wabantu baansi uubula kusika ku-Jerusalemu kukukomba Mwami Jehova wamakamu, bantu abo bayooimwa imvula. 18Alwalo luzubo lwaba-Egepita, na babula kusika kuzoolibonya, bayoopenzegwa luumo olo Jehova ndwayooumya misyobo yoonse iitasika kukulya ipobwe lyazilan. 19Mbuboobo mbubayoopegwa mulandu, ba-Egepita abantu bamasi oonse batasiki kukulya ipobwe lyazilao.
20Mubuzuba obo amilangu yambizi ayoolembwa majwi aakuti, Kusalalisya kwa-Jehova. Azyalo zilongo zyamuŋanda ya-Jehova ziyooba mbubonya mbuli mitiba iili kunembo lyacipaililo. 21#Kol 3:17; Is 35:8; Ciy 21:27; Ef 2:19Zilongo zyoonse zili muJerusalemu amucisi ca-Juda ziyoosalalila Jehova wamakamu. Boonse basika kuzoopaila bayookonzya kuzibweza buyo akujikila nyama yazituuzyo mumonya. Mubuzuba obo takukooyooba limbi musambazi muŋanda yaJehova wamakamu.
Currently Selected:
Zekariya 14: Ibbaib63
Highlight
Share
Copy
Want to have your highlights saved across all your devices? Sign up or sign in
The Bible in Tonga (Zambia) © United Bible Societies, 1963.