Jeremiya 9
9
1Nicakabota mutwe wangu niwakali maanzi, ameso aangu naakali kasensa kamisozi, elyo nindakalila isikati amasiku nkaambo kabajayidwe ba mwana musimbi wabantu bangu.
Kutasyomeka kwabantu akukomba mizimu: zintu ezi zyobile nzeziyoobaletela mapenzi
2Nicakabota nindakajisi cilao casilweendo munkanda, elyo nindakaanzaana abantu bangu akuzwa kulimbabo, nkaambo boonse buyo mbasimamambe, inkamu yabantu batakwe lusyomo. 3#Bab 2:10; 1 Sam 2:12; Tus 1:29; Jer 4:22; Rom 1:28; 1 Kor 15:34Indimi zyabo zilyoongomene mbuli mata, balaziwaazya majwi aakulengelela, Baba anguzu akati kanyika, pele teensi lusyomo ndubabelesezya inguzu zyabo pe, nkaambo balavuzya bubi atala lyabubinyina, pele mebo tabandizi, mbwaamba Jehova. 4#Mik 7:5,6Muntu acenjele mweenzinyina, atasyomi simukowanyina pe, nkaambo basimukowanyina boonse mbasilweeno, abeenzinyina boonse balaya bumulengelela. 5Boonse balabeja akweena umwi aumwi mweenzinyina, taakwe naba omwe uuamba lusinizyo pe. Indimi zyabo baziiyiisya kwaamba cakubeja. Balalikataazya buyo kuti bacite bubi. 6#Tus 1:24Cikalilo cako cili akati kalweeno, Mulweeno lwabo balakaka kundiziba, mbwaamba Jehova.
7 #
Is 1:25; Hos 11:8 Nkaambo kako mbuboobu mbwaamba Jehova wamakamu. Ncitile buti mwana musimbi wabantu bangu? Njoobaenzununa akubalingula. 8Lulimi lwabo ngumuvwi uubosya, Lulaamba cakubeja. Umwi aumwi ulaambila mweenzinyina caluumuno kumilomo, pele mumoyo wakwe ulalindila kumuca. 9Sa nsikooyoobauma nkaambo kamakani aya? mbwaamba Jehova. Sa nsikooyooliya inkoto kumusyobo uuli boobo?
10Kolila akoomoka nkaambo kazilundu, aalo macelelo aamunkanda koacitila cililo, nkaambo zyoonse zyapya, taakwe muntu uuinda mulinzizyo, alimwi ijwi lyaŋombe talimvwigwi limbi, Bayuni bakujulu abanyama boonse bacija, bainka. 11Njoosandula Jerusalemu ube zitantaala, bulyango bwabamwaaba, ayalo minzi yoonse ya-Juda njooisandula ibe matongo aabula bantu bakala mumo. 12#Int 107:43; Is 42:23; Hos 14:9Nguni muntu musongo uukonzya kumvwisya aya makani? Nguni muntu mulomo wa-Jehova nguwakalwiida kuti akanane? Ino nkaambonzi nyika yanyonyooka? Nkaambonzi ilipide mbuli inkanda, alimwi taakwe muntu uuinda mulinjiyo?
13Jehova wati, Mbuli mbubasoowede mulao wangu ngundakababikila, alimwi tabana kuswiilila ijwi lyangu nikuba kweenda mbulyakabalailila, 14#Gal 1:14pele beenda muzinguni zyamyoyo yabo akutobela mizimu yamawisaabo mbubakabaiyiisya, 15#Int 80:5; Malo 3:15lino mbuboobu mbwaamba Jehova wamakamu Leza wa-Israyeli. Amubone! Njoosanizya bantu aba kabindaula akubanywisya maanzi aamululwe. 16#Lev 26:33; Dt 28:64; Ezk 5:2Njoobamwaisya akati kabamasi mbobatana kuziba, nibaba beni nibaba bamawisaabo, nkabela njoobatandya ipanga mane lumwi nkabamanisye.
17 #
Muk 12:5; Am 5:16; Mt 9:23 Mbuboobu mbwaamba Jehova wamakamu. Amuyeeye. Amwiite banakazi basikutunganyimbo, bazoolile. Amutumine banakazi bacenjede, basike, 18#Jer 14:17; Malo 1:16bafwambaane kutoomokela, kuti meso esu akunke misozi, azikoye zyesu zivuzye maanzi. 19#Lev 18:28Nkaambo mu-Zioni mulamvwigwa ijwi lyakoomoka lyakuti, Maawe! Twafwa! Insoni yatujaya loko, nkaambo nyika twasiya, nkaambo batumwayila makalilo esu. 20Pele amuswiilile ijwi lya-Jehova nubanakazi, Matwi aanu atambule majwi aamulomo wakwe. Amwiisye bana banu basimbi kulila; umwi aumwi aiisye mweenzinyina lwiimbo lwadilwe. 21Nkaambo lufu lwatanta mumpulungwizyo zyesu, lwanjila mumaanda esu; lwatumanina bana mumigwagwa abakubusi besu mumasa-mbalilo. 22Amba kuti, Mbuboobu mbwaamba Jehova. Mitunta yabantu iyooloka mbuli bufumba avu lyamyuunda, ambuli zifunte zyamaila mutebuzi nzyasia, zibula sikuzibungika.
23 #
Int 33:16; Muk 9:11; Is 5:21; Rom 1:22 Mbuboobu mbwaamba Jehova. Musongo atalikankaizizyi busongo bwakwe, asinguzu atalikankaizizyi inguzu zyakwe, alakwe muvubi atalikankaizizyi buvubi bwakwe. 24#Int 20:7; Mik 6:8; 1 Kor 1:31; 2 Kor 10:17Pele oyo uulikankaizya alikankaizizye cintu eci cakuti ulamvwisya akuziba ndime, nkaambo ulizi kuti ndime Jehova sibuuya uubeteka kabotu aku cita cakululama moonse munyika, nkaambo nzenzizyo zintu zindibotela, mbwaamba Jehova.
25 #
Am 3:2
Ncobeni mumazuba aaboola, mbwaamba Jehova, njoouma boonse bapalwidwe batapalwidwe mumoyo, 26#Lev 26:41; Inc 7:51; Rom 2:28nkukuti ba-Egepita, ba-Juda, ba-Edomu, bana ba-Amoni, aba-Moabu, amisyobo yoonse yamunkanda balinyoola mumpanza, nkaambo misyobo eyo yoonse tabapalwidwe, aluzubo loonse lwa-Israyeli abalo tabapalwidwe mumyoyo yabo.
Currently Selected:
Jeremiya 9: Ibbaib63
Highlight
Share
Copy
Want to have your highlights saved across all your devices? Sign up or sign in
The Bible in Tonga (Zambia) © United Bible Societies, 1963.