Ezekieli 3
3
1 #
Ezk 2:8,9; Ciy 10:9-10 Lino wakandaambila kuti, O mwana amuntu, Kolya eco ncowajana, kolya eli ibbuku, lino koya ukaambile luzubo lwa-Israyeli, 2Mpawo ndakaasamika mulomo wangu, nkabela wakandilisika elyo ibbuku, 3wandaambila kuti, O mwana amuntu, Lisya ida lyako eli ibbuku ndindakupa, uzuzye mala aako ndilyo. Mpawo ndakalya, nkabela mukanwa lyangu lyakalwela lwee mbuli buci.
4Lino wakandaambila kuti, O mwana amuntu, koya kuluzubo lwa-Israyeli, ukabaambile majwi aangu. 5Nkaambo teensi bantu bamusyobo umbi baamba mwaambo muyumu mbowatuminwa, pe, watumwa kuluzubo lwa-Israyeli. 6Tokwe watumwa kubantu banji bamusyobo umbi baamba mwaambo muyumu, mbotakonzya kumvwa majwi aabo pe. Ncobeni nendakakutuma kulimbabo nebakakuswiilila. 7#Joh 15:20Pele luzubo lwa-Israyeli, tabakooyookuswiilila pe, nkaambo tabayandi kuswiilila ndime, nkaambo boonse baluzubo lwa-Israyeli bali ankumu injumu amyoyo miyumu nta. 8Bona! Ndayumya busyu bwako mbuli masyu aabo, ankumu yako iyooyumisigwa mbuli inkumu zyabo. 9#Jer 1:18Ndacita kuti inkumu yako iyume nta mbuli ibbweluuma, iyume kwiinda mandomba. Utabayoowi nikuba kukankama kumasyu aabo, nekuba kuti nduzubo lukataazya. 10Alimwi wakandaambila kuti, O mwana amuntu, majwi aangu oonse ngendakwaambila, koatambula mumoyo wako akwaaswiilila amatwi aako. 11Koya, ukaambile bantu bako bali mubuzike makani. Kobaambila cakwaamba kuti, Mbuboobu mbwaamba Mwami Jehova. Na baswiilila, na bakaka, taakwe makani, kobaambila buyo.
12 #
Ezk 8:3; Inc 8:39 Mpawo Muuya wakandibweza, nkabela kusule lyangu ndakamvwa ijwi lyamuzuzumina mupati, liti, Butembaulwe bulemu bwa-Jehova kubusena bwakwe! 13Ndakamvwa ijwi lyamababa aabanyama, limwi alimwi lyakali kuguma lyeenzinyina, acikwala camavili kumbali lyabo; acikwala camuzuzumina mupati. 14#2 Bam 3:15Muuya wakandisumpula, wanditola, aboobo ndakaya abuusu bulula mumoyo wangu, ajanza lya-Jehova lyakali alindime canguzu, 15#Job 2:13; Int 137:1mane lumwi ndakasika kulibasibuzike baku-Telabibu, ibakakede kumu-longa wa-Kebara, nkabela ndakakala nkukonya oko nkubakakede. Ndakakala oko akati kabo cakugamba mazuba aali musanu aabili.
Milimo yamulindizi
16Lino mazuba aali musanu aabili naakamana, ijwi lya-Jehova lyakandisikila, liti, 17#Lwi 3:3; 5:7; Is 21:6,8,11,12; 52:8; 56:10; Jer 6:17O mwana amuntu, ndakubika kuti ubede luzubo lwa-Israyeli mulindizi. Uyooswiilila majwi aakumulomo wangu, lino uleelede kubacenjezya muzina lyangu. 18#Rom 1:16; 1 Tim 4:16; Ezk 33:6Kufumbwa ciindi nindaambila sizibi kuti, Ncobeni ulafwa, na wabula kumucenjezya, na toambi ijwi lyakucenjezya oyo sizibi kuti aleke inzila yakwe yabubi akujana buumi, lino oyo sizibi uyoofwa mukati kamilandu yakwe, pele bulowa bwakwe ngumulandu wako. 19#Inc 20:26Pele na wacenjezya oyo sizibi, nekubaboobo tapiluki nikuba kuleka inzila yakwe yabubi, lino uyoofwa mukati kamilandu yakwe, pele webo tojisi mulandu. 20#Ezk 18:24; 2 Pet 2:20Alimwi muntu uululeme, na waleka bululami bwakwe akucita milimo iipilingene, aboobo ndamubikila cilebyo, lino uyoofwa. Mbuli mbotana kumucenjezya, uyoofwa muzibi zyakwe, nkabela milimo yakwe iiluleme njaakacitide tiikooyooyeeyegwa limbi, pele bulowa bwakwe ngumulandu wako. 21#Rom 2:7; Inc 18:6Pele na wacenjezya oyo mululami kuti atabisyi, aboobo tabisyi, ncobeni oyo muntu uyoojana buumi, ayebo tojisi mulandu.
22 #
Ezk 8:4
Lino ijanza lya-Jehova lyakali alindime nkukonya oko, nkabela wakandaambila kuti, Nyampuka, uinke kugundu, lino njookwaambila nkuko. 23#Ezk 1:1,28Mpawo ndakanyampuka, ndainka kugundu, nkabela ndakabona bulemu bwa-Jehova buimvwi nkuko, mbubonya mbuli bulemu mbundakabona kumulonga wa-Kebara, elyo ndakavundama ansi. 24#Ezk 2:2Pele Muuya wakanjila mulindime, wandiimikizya amaulu aangu, wandaambila, wati, Koya, ukalijalile muŋanda yako. 25#Ezk 4:8Uwe O mwana amuntu, ncobeni bayookubikila intambo akukwaanzya nzizyo, kuti utakeendeendi akati kabo. 26#Ezk 24:27; 2:5,6; Lk 1:20-22Alwalo lulimi lwako, njoolunamatizya kucilakwila cako, kuti ube syataambi uutakonzya kubacenjezya, nkaambo nduluzubo lukataazya. 27#Ezk 24:27; 33:22; 12:2,3Pele ninjooambaula ayebo, njooangununa mulomo wako, nkabela uyoobaambila kuti, Mbuboobu mbwaamba Mwami Jehova. Oyo uuyanda kuswiilila aswiilile, ayooyo uukaka akake. Nkaambo nduzubo lukataazya.
Currently Selected:
Ezekieli 3: Ibbaib63
Highlight
Share
Copy
Want to have your highlights saved across all your devices? Sign up or sign in
The Bible in Tonga (Zambia) © United Bible Societies, 1963.
