Ezekieli 20
20
Ezekieli mbwaakakambaukila bapati ibakeza kuzoobuzya makani kuli-Jehova
1 #
Ezk 8:1
Lino mumwaka wamusanu aibili, mumwezi wasanu, mubuzuba bwakumi bwamumwezi, kwasika bamwi babapati ba-Israyeli kuzoobuzya makani kuli-Jehova, nkabela bakakala kubusyu bwangu. 2Lino ijwi lyaJehova lyakandisikila, liti, 3#1 Sam 28:6; Int 50:15; Tus 15:8; Mt 15:8O mwana amuntu, ambila bapati ba-Israyeli. Kobaambila kuti, Mbuboobu mbwaamba Mwami Jehova. Sa kubuzya makani kulindime ncemwazida? Ncobeni mbundi muumi, ndakaka kubuzigwa makani andinywe, mbwaamba Mwami Jehova. 4#Ezk 16:2; Mt 23:32Sa tokonzyi kubabeteka, O mwana amuntu, sa tokonzyi kubabeteka? Kobazibya milimo iisesemya bamawisaabo njibakacita. 5#Kul 6:2-8; 3:8; 20:2; Dt 4:34; Matl 17:7Kobaambila kuti, Mbuboobu mbwaamba Mwami Jehova. Mubuzuba obo nindakasala Israyeli, ndakakonkezya lunyungu lwaluzubo lwa-Jakobo akulizibya kulimbabo munyika ya-Egepita. Ndakabakonkezya kuti, Ndime Jehova Leza wanu. 6#Kul 3:8,17; Jer 32:22; Int 48:2Mubuzuba obo mbubonya ndakabakonkezya kubagwisya munyika ya-Egepita akubaleta kunyika njindakabasalilide, nyika iikunka malili abuci, nyika imbotu kwiinda nyika zyoonse. 7#2 Mak 15:8; Dt 29:16; Jos 24:14Lino ndakabaambila kuti, Amusowe umwi aumwi zisesemyo zyameso aakwe, alimwi mutalisofwaazyi azikozyano zya-Egepita, Ndime Jehova Leza wanu. 8Pele bakandipapila, bakaka kundiswiilila. Tabakwe nibakasowa umwi aumwi zisesemyo zyameso aakwe, nikuba kuleka zikozyano zya-Egepita,
Mpawo ndakaamba kubatilila bukali bwangu akukutya lunyemo lwangu kulimbabo mukati kanyika ya-Egepita. 9#Kul 32:12; My 14:13Nekubaboobo ncindakacita ndakacicita nkaambo kazina lyangu kuti litasampaulwi mumeso aabamasi mobakakede akati kabo. Ndakalizibya kulimbabo mumeso aabaabo bamasi mukubagwisya munyika ya-Egepita. 10Ndakabagwisya munyika ya-Egepita, ndabasisya munkanda. 11#Dt 4:8; Neh 9:13; Rom 10:5; Lev 18:5Ndakabapa milazyo yangu akubazibya imbeta zyangu, nzenzizyo ziletela muntu buumi kufumbwa uuzicita. 12#Kul 31:13-17; 20:8; Dt 5:12; Neh 9:14Alimwi ndakabapa masabata aangu kuti abe citondezyo akati kesu ambabo, bazibe kuti ndime nde-Jehova ndabasalazya. 13#Tus 1:25Pele luzubo lwa-Israyeli lwakandipapila nkukonya oko kunkanda. Tabakwe nibakeenda mumilazyo yangu, ambeta zyangu teebakali kuzibamba, nzenzizyo ziletela muntu buumi kufumbwa uuzicita. Aalo masabata aangu bakaasofwaazya loko.
Lino ndakaamba kubatilila bukali bwangu nkukonya oko kunkanda akubamanisya. 14Pele ncindakacita ndakacicita nkaambo kazina lyangu kuti litasampaulwi mumeso aabamasi, nkaambo ndakabagwisya mumeso aabo. 15#Int 95:11; My 14:26-35Ndakabakonkezya munkanda cakwaamba kuti, Nsikooyoomusisya munyika eyo njendamusyomezya, nyika iikunka malili abuci, nyika imbotu kwiinda nyika zyoonse. 16#My 15:39; Int 78:37; Ezk 14:3,4; Am 5:25,26; Inc 7:42,43Ndakacita obo nkaambo kakuti bakasampaula imbeta zyangu akukaka kweenda mumilazyo yangu akusofwaazya masabata aangu, nkaambo myoyo yabo bakaibikide kuzikozyano zyabo. 17#1 Sam 24:10; Int 78:38; Neh 9:19Nekubaboobo liso lyangu lyakabafwida luzyalo. Teendakabanyonyona nikuba kubamanisya oko kunkanda pe.
18Lino ndakaambila bana babo mumonya munkanda kuti, Muteendi mumilao yabamauso nekuba kubamba imbeta zyabo nekuba kulisofwaazya azikozyano zyabo. 19Ndime Jehova Leza wanu, Amweende mumilazyo yangu, amubambe imbeta zyangu akuzicita. 20#Kul 20:11; Neh 13:17-19Alimwi amusalazye masabata aangu, abe citondezyo akati kesu, mebo anywebo, muzibe kuti ndime Jehova Leza wanu. 21#My 25:1,2; Dt 9:23,24Pele bana bakandipapila. Kabateendi mumilazyo yangu, kabatabambi imbeta zyangu nekuba kuzicita, nzenzizyo ziletela muntu buumi kufumbwa uuzicita, aalo masabata aangu bakaasofwaazya.
Mpawo ndakaamba kubatilila bukali bwangu akukutya lunyemo lwangu kulimbabo oko kunkanda. 22#Int 78:38Nekubaboobo ndakakasya ijanza lyangu akucita mbukweelede kucitilwa izina lyangu, kuti litasampaulwi mumeso aabamasi, nkaambo ndakabagwisya mumeso aabo. 23#Dt 28:64; Int 106:27; Lev 26:33Alimwi ndakabakonkezya munkanda kuti njoobamwaisya akati kabamasi akubapalanganya munyika zyoonse, 24#Ezk 6:9; Mk 7:22nkaambo kabataciti milazyo yangu, kabasampaula imbeta zyangu akusofwaazya masabata aangu, alimwi meso aabo kaalangide zikozyano zyabamawisaabo. 25#Int 81:12; Rom 1:24Nkabela ndakabapa milazyo iyatakali mibotu ambeta zitaleti buumi. 26#2 Bam 17:17; 2 Mak 28:3; Jer 32:35; Ezk 16:20,21Ndakabasofwaazya azipo zyabo kukupaizya bana babo bataanzi, nkabayoosye, kuti bazibe kuti ndime Jehova.
27 #
Rom 1:23
Lino ambila luzubo lwa-Israyeli, O mwana amuntu. Kobaambila kuti, Mbuboobu mbwaamba Mwami Jehova. Bamausowanu bakandisampaula mucintu eci acalo: bakandicitila cakweena. 28#Is 57:5; Ezk 16:19Nkaambo ndakabanjizya munyika eyo njindakabakonkezya kubapa, pele ndilyonya, kufumbwa ciindi ncibakabona cilundu cilamfu amusamu mutete uuvovwene, kabapaila zipaizyo zyabo nkukonya azituuzyo zyabo zyakundikalazya, kabalundumuna bweema bwatununkilizyo twabo ukutila zipaizyo zyabo zyakunywa. 29(Ndakababuzya kuti, Nkutyeni cipaizyo cakucilundu nkumuya kulincico. Aboobo cakaulikwa kuti ngu-Bama, mbuicicaambwa asunu.) 30Lino koambila luzubo lwa-Israyeli kuti, Mbuboobu mbwaamba Mwami Jehova, Sa mulayanda kulisofwaazya mbubakacita bamausowanu akuya butobela zisesemyo zyabo? 31#Tus 1:27,28; Zek 7:13; Mt 25:11,12Ciindi cakuleta zipo zyanu akupaizya bana banu mumulilo, mulalisofwaazya azikozyano zyanu zyoonse. Mucicita obo asunu, Lino sa ndakonzya kuzumina kubuzigwa makani andinywe, O luzubo lwa-Israyeli? Ncobeni mbundi muumi, mbwamba Mwami Jehova, ndakaka kubuzigwa makani andinywe,
32 #
Ezk 11:5
Muyeeyo wamumyoyo yanu ncobeni tuukooyooba. Mulaamba kuti, Tuyooba mbubonya mbuli bamasi, mbuli misyobo yoonse yamunyika, bakomba zisamu amabwe.
33 #
Jer 21:5
Ncobeni mbundi muumi, mbwaamba Mwami Jehova, njoomweendelezyalezya ajanza ijumu akuboko kutandabikidwe abukali butilidwe. 34Nkabela njoomugwisya mukati kabamasi, akumuyobolola kuzwa kunyika zyoonse nkumwakamwaikilide, ajanza ijumu akuboko kutandabikidwe abukali butilidwe. 35#Ezk 17:20Lino njoomusisya kunkanda yabamasi, nkabela tuyoobetekana nkukonya oko kubusyu abusyu. 36#My 14:21Mbuli mbutwakabetekana abamausowanu munkanda yanyika ya-Egepita, tuzoobetekana anywebo mbubonya, mbwaamba Mwami Jehova. 37#Lev 27:32; Jer 33:13Njoomuumya mufunko, elyo njoomwaanzya zyaanzyo zyacizuminano. 38#Ezk 34:17; 13:9; Mt 3:12; Int 95:11; 1 Kor 10:5; Heb 4:6Nkabela njoosansamuna basicinguni akati kanu abaabo bandipapila. Njoobagwisya munyika yabusibutuntuli bwabo, pele tabakooyoosika kunyika ya-Israyeli pe, aboobo muyooziba kuti ndime Jehova.
39 #
Int 81:12; Am 4:4; Tus 21:27; Is 1:13; Jer 7:9-11; Ezk 23:38 Lino nywebo, O luzubo lwa-Israyeli, mbuboobu mbwaamba. Mwami Jehova, Mbubo, kamuya, mukakombe umwi aumwi zikozyano zyakwe. Pele musule lyayaaya, na mwakaka kundiswiilila-we! Izina lyangu lisalala talikooyoosofwaazigwa limbi azipo zyanu azikozyano zyanu pe.
40 #
Is 2:2; 56:7; Ezk 17:23; Zek 8:20; Mal 3:4; Rom 12:1 Nkaambo atala lyacilundu cangu cisalala, cilundu cilamfu ca-Israyeli, mbwaamba Mwami Jehova, mpoonya awo luzubo loonse lwa-Israyeli mpoluyoondikombela munyika, Mpoonya awo mponjoobatambwida, mponjooyandila zituuzyo zyanu akabalwebalwe kazipaizyo zyanu azintu zyanu zyoonse zisalala. 41Njoomutambula mbuli bweema bwatununkilizyo kuciindi eco ninzoomugwisya akati kabamasi akumuyobolola kuzwa kunyika zyoonse nkumwakamwaikilide, aboobo kusalala kwangu kuyoobonwa mulindinywe mumeso aabamasi. 42#Jer 24:7; Joh 17:3; Ezk 36:23; 11:17Lino muyooziba kuti ndime Jehova ninjoomusisya kunyika ya-Israyeli, kunyika eyo njiyonya njindakakonkezya kupa bamausowanu. 43#Ezk 16:61; Lev 26:39; Hos 5:15Oko muyooibaluka inzila zyanu amilimo yanu yoonse njimwakasofwaazigwa njiyo, nkabela muyoolisesemya nubeni nkaambo kabubi boonse mbumwakacita. 44#Ezk 24:24; 36:22Lino muyooziba kuti ndime Jehova, nkaambo ncinjanda kucita njoocicita nkaambo kazina lyangu; nsikooyoocita mbuli bweelede inzila zyanu zibi amilimo yanu yakubisya, O luzubo lwaIsrayeli, mbwaamba Mwami Jehova.
45Lino ijwi lya-Jehova lyakandisikila, liti, 46O mwana amuntu, tambya meso aako kumusanza cankayikayi, tuntumwida cisi cakumusanza majwi aako, sinsima cakukalalila lusaka lwaku-Negebi. 47#Jer 21:14; Lk 23:31; Ezk 21:4Ambila lusaka lwaku-Negebi kuti, Swiilila ijwi lya-Jehova. Mbuboobu mbwaamba Mwami Jehova. Ncobeni njookunka mulilo muli nduwe, nkabela uyootenta misamu yoonse mitete amisamu yoonse miyumu iili mulinduwe. Mabangabanga aayakisya taakooyoozima, amasyu oonse aabantu ayoopya kuzwa kumusanza akusikila kunyika. 48Bantu boonse bayoobona kuti ndime nde-Jehova ndakaudukula. Tuukooyoozimika pe. 49Mpawo ndakati, Akaka, Mwami Jehova! Balaamba aandime kuti, Sa taambi tulabi buyo mukwaamba kwakwe?
Currently Selected:
Ezekieli 20: Ibbaib63
Highlight
Share
Copy
Want to have your highlights saved across all your devices? Sign up or sign in
The Bible in Tonga (Zambia) © United Bible Societies, 1963.