Ezekieli 18
18
Muntu umwi aumwi ulijisi mulandu wazibi zyakwe mwini
1Lino ijwi lya-Jehova lyakandisikila, liti, 2#Malo 5:7; Jer 31:29Mwaba anzi nimubelesya aka kasimpi aanyika ya-Israyeli? Mulati, Bamawisi bakaiya masaansa aapapa, lino meno aabana akaba abuye. 3Ncobeni mbundi muumi, mbwamba Mwami Jehova, tamukooyoobelesya limbi aka kasimpi mucisi ca-Israyeli. 4#Zek 12:1; Heb 12:9; Rom 6:23Buntu boonse mbubwangu. Buntu bwabamawisi abuntu bwabana, boonse buyo mbubwangu, Muntu uubisya, ngonguwe uuyoofwa.
5Na, muntu uliluleme, na ulabamba milao akucita bululami, 6#Ezk 22:9; Heb 13:4; Lev 18:19na tana kulya zipaizyo atala amalundu nikuba kutambya meso aakwe kuzikozyano zyaluzubo lwa-Israyeli, na tasofwaazyi mwanakazi wamweenzinyina nekuba koona amwanakazi kuciindi cakwe cakutondwa, 7#Lev 25:14; Dt 24:12; Is 58:7; Mt 25:35na takataazyi bantu, na ulabweedezezya sizikoloto zisyomezyo zyakwe, na tasaali imbono zyabantu, na ulaabila basinzala zilyo zyakwe akuvumba basicinswe azikobela, 8#Lev 18:5; 25:36; Zek 8:16na takolotyi mali kuti ajane impindu nikuba kutambula intantiko, uukasya ijanza lyakwe kucita bubi, uubeteka kabotu makani aamuntu umwi aumwi amweenzinyina, 9#Hab 2:4; Rom 8:1; Am 5:4uuenda mumilazyo yangu akubamba imbeta zyangu cakusinizya-ngonguwe uululeme, ncobeni uyoopona, mbwaamba Mwami Jehova.
10 #
Kul 21:12
Lino oyo muntu na wazyala mwana sikubba asikutila bulowa, uucita milimo iili obo, 11#1 Kor 6:9uutacita zyeelelo ezi, uulya zipaizyo atala azilundu, uusofwaazya mwanakazi wamweenzinyina, 12#2 Bam 21:11uupenzya bacete abatengwana, uusaala imbono zyabantu, uutabweedezezya sizikoloto zisyomezyo zyakwe, uutambya meso aakwe kuzikozyano, uucita zisesemyo, 13#Kul 22:25uukolotya mali kuti ajane impindu akutambula intantiko, sa uuyoopona? Takooyoopona pe abuniini. Mbuli mbwacita zisesemyo ezi zyoonse, ncobeni uyoofwa. Mulandu wabulowa bwakwe ngumulandu wakwe mwini.
14Lino na wazyala mwana uubona zibi zyoonse wisi nzyaakacita, alimwi ulayoowa, taciti mbubonya, 15uutalya zipaizyo atala azilundu nikuba kutambya meso aakwe kuzikozyano zyaluzubo lwa-Israyeli, uutasofwaazyi mwanakazi wamweenzinyina, 16#Job 22:7; Tus 22:9; Muk 11:1,2; Is 58:7-10; Mt 25:35; Lk 11:41uutakataazyi bantu, uutanyanzyi basizikoloto cisyomezyo nikuba kusaala imbono zyabantu, uuabila basinzala zilyo zyakwe akuvumbya basicinswe zyakusama, 17#Ezk 20:18; Rom 2:7; Mt 23:29-32uukasya ijanza lyakwe kububi, uutatambuli impindu nikuba kubikilwa intantiko kuli basizikoloto, uubamba imbeta zyangu akweenda mumilazyo yangu-oyo muntu takooyoofwa nkaambo kamilandu yawisi pe, ncobeni uyoopona, 18#Ezk 3:18Pele wisi, mbwaakapenzya bantu akusaala imbono zyamweenzinyina akucita milimo iitali mibotu akati kabantu bakwe, ncobeni uyoofwa nkaambo kazibi zyakwe.
19 #
Kul 20:5; Dt 5:9 Nekubaboobo mulaamba kuti, Nkaambonzi mwana teelede kulemenwa milandu yawisi? Ma! Na mwana wabeteka kabotu akucita bululami, na wabamba imbeta zyangu akucita zyoonse, ncobeni uyoopona. 20#2 Mak 25:4; Is 3:10; Rom 2:9; Dt 24:16Muntu uubisya ngonguwe uuyoofwa. Mwana takoolemenwa milandu yawisi, awisi takoolemenwa milandu yamwana. Bululami bwauululeme mbubwakwe mwini uululeme, abubi bwasizibi mbubwakwe mwini uuzicita.
21 #
Ezk 33:12
Pele sizibi, na waleka zibi zyakwe zyoonse nzyaakacita, na watalika kubamba imbeta zyangu akubeteka kabotu akucita bululami, ncobeni uyoopona, takooyoofwa pe. 22#Ezk 33:16; Rom 8:13Zibi zyakwe zyoonse nzyaakacita tazikooyooyeeyegwa limbi, pe, uyoopona nkaambo kabululami bwakwe mbwacita. 23#2 Pet 3:9Sa cilandibotela kuti sizibi afwe? mbwaamba Mwami Jehova. Sa nsiyandi kuti aleke inzila yakwe akupona? 24#Heb 10:38; 2 Joh 1:8Pele muntu uululeme, na waleka bululami bwakwe akucita zibi, na watalika kucita zisesemyo zyoonse nzyacita sizibi, sa ulakonzya kupona? Ne! Bululami boonse mbwaakacita tabukooyooyeeyegwa limbi. Nkaambo kakupapila kwakwe azibi zyakwe nzyacita, uyoofwa.
25 #
Mal 3:14; Matl 18:25; Dt 32:4; Int 145:17 Pele mulaamba kuti, Inzila ya-Mwami tiiluleme. Amuswiilile noluzubo lwa-Israyeli, Sa inzila yangu tiiluleme? Sa teensi inzila zyanu zitaluleme? 26Na muntu uululeme waleka bululami bwakwe akucita bubi akufwa mulimbubo, uyoofwa nkaambo kabubi bwakwe mbwaakacita. 27#Is 1:18Alimwi muntu sizibi, na waleka zibi zyakwe nzyaakabisya, akucita bululami mbukweelede, uyoovuna buumi bwakwe. 28Nkaambo kakuti wayeeya akuleka zibi zyakwe zyoonse nzyaakacita, ncobeni uyoopona, takooyoofwa pe. 29Nekubaboobo luzubo lwa-Israyeli lulaamba kuti, Inzila ya-Mwami tiiluleme. Ma! Sa inzila zyangu taziluleme, O luzubo lwa-Israyeli? Sa teensi inzila zyanu zitaluleme?
30 #
Muk 12:14; Ezk 7:3; Mt 3:2; Ciy 2:5 Nkaambo kako Njoomubeteka, O luzubo lwa-Israyeli, umwi aumwi mbuli inzila zyakwe, mbwaamba Mwami Jehova. Amupiluke, muleke umwi aumwi zibi zyakwe, kuti milandu yanu itabi cilebyo cakumuwisya. 31#Ef 4:22; Jer 32:39; Ezk 11:19Amusowe zibi zyanu zyoonse nzimwandibisizya. Amusandule myoyo yanu amyuuya yanu ibe mipya! Nkaambonzi mulayanda kufwa, O luzubo lwaIsrayeli? 32#Malo 3:33; Ezk 33:11; 2 Pet 3:9Mebo nsiyandi kuti muntu naba omwe afwe, mbwaamba Mwami Jehova. Amupiluke, mube abuumi!
Currently Selected:
Ezekieli 18: Ibbaib63
Highlight
Copy
Compare
Share
Want to have your highlights saved across all your devices? Sign up or sign in
The Bible in Tonga (Zambia) © United Bible Societies, 1963.
