1 Samuele 13
13
Ba-Israyeli mbubakalwana aba-Filisti
1Saulo wakali amyaaka iili makumi otatwe yakuzyalwa naakasaanguna kupegwa bwami, nkabela wakeendelezya ba-Israyeli myaka yobile. 2Lino Saulo wakalisalila bantu bali zyuulu zyotatwe ba-Israyeli, nkabela zyuulu zyobile zyakali a-Saulo mu-Mikimasi amucilundu ca-Beteli, abamwi bali cuulu kabali a-Johatani mu-Gibeya mucisi ca-Benjamini, elyo bantu bamwi boonse wakababweedezya kumaanda aabo. 3#1 Sam 10:5; Matl 34:30Lino Johatani wakauma basinkondo baba-Filisti ibakali mu-Geba nkabela ba-Filisti bakamvwa impuwo. Mpawo Saulo wakasiba mweembo mucisi coonse, wakaamba wati, Baswiilile ba-Hebrayo. 4Nkabela ba-Israyeli boonse bakaswiilila kuti, Saulo wauma basinkondo baba-Filisti, alimwi ba-Israyeli baba cisesemyo kuba-Filisti. Lino bantu bakayoboloka kuyootobela Saulo kuGiligala. 5#Jos 18:12Nkabela ba-Filisti bakabungana kuyoolwana aba-Israyeli, bakali aŋola zili zyuulu zili makumi otatwe abasimbizi bali zyuulu zili musanu acimwi abantu banjibanji mbuli musenga uuli ankomwe yalwizi, elyo bakatanta kuyoobamba malabba aabo ku-Mikimasi kujwe kuzwa ku-Betaveni. 6#Bab 6:2Mpawo bantu ba-Israyeli bakabona kuti bali amafwabi nkaambo kakuti bantu kababindeene, nkabela bantu bakayuba mumapangala amuzyoonde amumandomba amumalyango amuzilindi. 7Lino bamwi ba-Hebrayo bakainkide kuyoolanduka Jordano kuya kucisi ca-Gadi a-Gileadi, pele Saulo kacili ku-Giligala nkabela bantu boonse bakali kumutobela cakukankama.
Saulo mbwaakapaila cipaizyo. Samuele mbwaakamunyemena
8 #
1 Sam 10:8
Lino wakalindila mazuba aali musanu aabili mbuli ciindi ncaakamubambila Samuele, pele Samuele teewakasika ku-Giligala, nkabela bantu bakamumwaika. 9#Dt 12:5-14; 1 Sam 15:22; 1 Bam 3:4; 2 Mak 26:16; Tus 15:8; 21:3,27; Heb 5:4Mpawo Saulo wakaamba wati, Amundiletele zituuzyo azipaizyo zyakutontozya, elyo wakatuula cituuzyo. 10#Rut 2:4Lino naakamana kutuula cituuzyo kwakasika Samuele, nkabela Saulo wakazwa kuyoomucinga akumujuzya. 11Mpawo Samuele wakaamba wati, Ino ncinzi ncowacita? Nkabela Saulo wakaamba wati, Nkaambo ndakabona kuti bantu bandimwaika, ayebo teewasika kuciindi ceelede, nkabela ba-Filisti bakalibungene ku-Mikimasi, 12lino ndakaamba kuti ba-Filisti inga baleza kulindime kuGiligala, nkabela mebo teendatontozya busyu bwa-Jehova, nkikaako nkindakalisinikizya kutuula cituuzyo. 13#2 Sam 12:7-9; 1 Bam 18:18; 2 Mak 16:9; Job 34:18; Tus 19:3; Mt 14:3,4; 1 Sam 15:11; Lev 17:1; My 18:7Lino Samuele wakaambila Saulo wati, Wacita cabufubafuba. Teewatobela mulao wa-Jehova Leza wako ngwaakakulailila. Nkaambo Jehova naakiimya bwami bwako bwaku-Israyeli lyoonse. 14#Inc 13:22; 1 Sam 2:30; 15:28; 2 Sam 7:15; Int 78:70; 89:20Pele sunu bwami bwako tabukonzyi kwiimikwa pe. Jehova walisalila kale muntu mbuli moyo wakwe, nkabela Jehova wamwaamba kuti abe mweendelezi wabantu bakwe, nkaambo kakuti uwe teewacita mbuli mbwaakalailila Jehova.
15 #
1 Sam 14:2
Lino Samuele wakanyampuka, wakatanta kuzwa ku-Giligala kuya kuGibeya wa-Benjamini, nkabela Saulo wakabala bantu mbaakali abo, kabali mbuli myaanda iili musanu aumwi. 16Nkabela Saulo a-Jonatani mwanaakwe abantu mbibakali abo kabakede ku-Geba wa-Benjamini, aba-Filisti kababambide malabba aabo ku-Mikimasi. 17#Jos 18:23Lino basaali bakazwa kumalabba aaba-Filisti, kabali inkamu zyotatwe, nkabela inkamu imwi yakatola inzila iiya ku-Ofra mucisi ca-Syuali, 18#Jos 16:3; 18:13; 1 Mak 6:68; 2 Mak 8:5imwi yakatola inzila yakuya ku-Betihoroni, aimwi yakatola inzila yamunyinza iisondelelwa kukuti lya-Zeboimu kufwaafwi kunkanda.
19 #
2 Bam 24:14; Jer 24:1 Lino teekwakajanwa mufuzi naba omwe mucisi coonse caba-Israyeli, nkaambo ba-Filisti bakaamba bati, Ba-Hebrayo inga balacita mapanga na masumu. 20Pele ba-Israyeli boonse bakali kuseluka kuya kuba-Filisti umwi umwi kuyookwengya mulomo wapulau lyakwe ajamba lyakwe akaa-nkuni kakwe apanga lyakwe. 21Nkabela milomo yamapulau yakalifumpide, amaamba amafoloko atwaankuni amapanga. 22#Bab 3:31; 5:8; 1 Sam 17:47,50; Zek 4:6Lino mubuzuba bwankondo teekwakajanwa ipanga niliba lyomwe nanka isumo mumaanza aabantu boonse mbaakali abo Saulo a-Jonatani, cita Saulo a-Jonatani mwanaakwe balike mbibakajisi. 23#1 Sam 14:5; Is 10:28Nkabela basinkondo baba-Filisti bakazwa akuya kucito ca-Mikimasi.
Currently Selected:
1 Samuele 13: Ibbaib63
Highlight
Share
Copy
Want to have your highlights saved across all your devices? Sign up or sign in
The Bible in Tonga (Zambia) © United Bible Societies, 1963.
