Hebiraio 1

1Anutungo bicngoc naso homac singa hania hania imohai yoara profete yeneac enacfu faiu, yeneng bangecfocnina yoac edeyunukecgec. 2Nga yofinenggac naso wisic wisickeau ye yoara Medahaac enacfu faiu yeng yoac edenunuec. Bangecfu nga sawau amma kurumennu wiac sasawa fekende, imoc Anutu medahaarusing yegoc meficgeoc nga maridzominga sasawa medahango meudeac desimiec. 3Anu Medac ye yengenaoc Anutuac kperagia amma yeri siricngira mocgu andape. Nga Medac ye yoara kucgoc amma imocngo wiac sasawa bangecfu nga sawau amma kurumennu fekendacde, imoc nanggedaru fede. Amma ye ngicngac sasawa nenanggac kopocsic heidzuac ua mesima kurumennu Ngictau kuhagoc yeac foiau enec tacde.

4Medac ye angero sasawa yeneac kunengngina. Amma yeng kpac kuneng maridzominggac arennu meec, kpara imocngo angero yeneac kpac sasawa feracyunuude. 5Nga Anutungo angero monggac yofi mi edeec,

“Ni yagucnoc megudua. Ge medacna nga ni geac Mangga.” (Mitiyegec 2:7)

Amma yeng angero monggac negemma yofi mi deec,

“Ni yeac Manggac nga yeng neac Medac anude.” (2 Samue 7:14; 1 Ngictau 17:13)

6Amma ye waracmedaha bangectoa bangecfu kefudeac hesicke haec, naso imohai yofi deec,

“Anutuac angero sasawa yeneng ye ngonducnemima afehebisia.” (Dedeseri 32:43 Septuaginta mitikibiunac.)

7Amma angero yeneac ine yofi deec,

“Ye angerofora sueyunuu yeneng yoara mema kenggec gerecborang uayoac edeyunuu yeneng ye kingang kpemigecde.” (Mitiyegec 104:4)

8Amma Medahaac negemma yofi deec,

“Anutu, geac ngictau tatac imoc wisic wisickea kpac amma feengkefude. Amma ngictau yasugaac kpara imoc faka dindingac. 9Ge dindingac kekecac anggengande nga singyoac kpekpe, imocac ine ubagango waannec. Imocac amma Anutugango, geac Anutungoc dema ge meisingguma sogac sogaiac kerecdokungo nadzicgenu geac sogac sogai imocngo tosofocga yeneac ferahede.” (Mitiyegec 45:6-7)

10Amma yeng monggoc Medahaac yofi deec,

“O Kebu, hanac hanaheaungoc bangecac kpesinga fainec amma kurumenga kurumenga fekende, ge imoc sasawa marigango meficgedacnec. 11Yeni kpac andacgecde nga geng ine kecbesannec. Yeni sasawango ngakpi isoc dzamema kpac anggecde. 12Geng kurumenga kurumenga fekendae, yeni ngakpi isoc kpouyununade nga ngicngac wamba mesima gboria faiandae, ge ifi isoc ine esea meicyunuma gboria fainade. Nga geng nasosoc siric mocgungoc kecnade nga geac kifanaso imoc wisic wisickea kpac.” (Mitiyegec 102:25-27)

13Anu Anutungo angero monggac yofi mi edeec,

“Ge foinaugeng tacmana ngabafocga hanigaac bageau faiyunuba yeni hanititiga anggecde.” (Mitiyegec 110:1)

14Angero sasawa yeni asuareng amma ua mema kecdae nga ngicngac memengereac maridzoming megecdeac tomai kecdae yeni yeneac kingang kpegecdeac Anutungo sueyunuande.

Currently Selected:

Hebiraio 1: dedNTpo

Highlight

Copy

Compare