Zahkariq 3

Hkyangjong Mó É Mèbu Pé Lhoq Sân-yúng Byî É Hkyô

1Hau htâng, Yhang gi, ngo lé, haû Yhûmsîng Garaî é maumang lagyô é hí má yàp tô é hkyangjong mó Yoshuq lé le, Yoshuq lé mara hûn râ matú yhâng é lòqyo hkyam má yàp tô é Tsádán lé le, tûn shit ri. 2Haû Yhûmsîng Garai gi, Tsádán lé, “Tsádán ê, haû Yhûmsîng Garai gi, nang lé tan sháng gàq! Yerusalem wà mó lé hkyin yu é, haû Yhûmsîng Garai gi, nang lé tan sháng gàq! Byù shí yùq gi, myi mai she htoq yu é myizó nghut lhê, a nghut lhí?” ga taî ri.

3Yoshuq gi, agòt a-u é mèbu wùt mù, maumang lagyô é hí má yàp tô ri. 4Haú hkûn, maumang lagyo gi, yhâng é hí má yàp tô bum é bang lé, “Yhâng é agòt a-u é mèbu lé hkyut pyám byi keq.” ga taî ri.

Hau htâng, yhang gi, Yoshuq lé, “Wú aq, ngò gi, náng é yubàk mara lé hkyut pyám byi bê nghut mù, sân-yúng é mèbu pé hut râ nghut lhê.” ga taî ri.

5Haú hkûn, ngò gi, “Yhang lé sansêng é uhtup htup byi keq.” nghû taî é nghut lhê. Haû mù, yhángmòq gi, yhâng é ulhum má sansêng é uhtup htup byi mù, mèbu hut byî akô nghut ri; haú u, haû Yhûmsîng Garaî é maumang lagyo gi, ayàm má yàp tô ri.

6Haû Yhûmsîng Garaî é maumang lagyo gi, Yoshuq lé dang sidìq byî ri; haû gi, 7“Haû Wum-o a-tsam dìk shoq bò Sû Yhûmsîng Garai shî su ga taî ri; ‘Nàng gi, Ngá é jì-no gyô nyì mù, Ngò sang é dang pé lé châng kut é nghut jáng, Ngá é yhûm lé wó ùp mù, Ngá é wâng pé lé wú gon sû dùt râ nghut lhê; hau htoq agó, Ngò gi, shî má yàp to bâng chyáng nang lé jowò wó nhâng râ nghut lhê.

8Hkyangjong mó Yoshuq ê, nàng eq náng é hí má zung bum é luzúm wuî, gyo keq; náng é luzúm wuî gi, jé lé lô râ nghut é zè pê é azòng nghut akô. Ngò gi, Ngá é duìnhâng zoshâng nghut é, hkûngxoq Akoq lé htoq nhâng râ nghut lhê. 9Wú aq; Ngò gi, Yoshuq é hí má lùqgòk tô to bê nghut lhê! Lùqgòk haú cham má myòqjí nyhit cham dàp ri; Ngò gi, lùqgòk haú má masàt laiká kyûng tap to mù, ra-nyí má za mîngdán shî mâ é yubàk mara lé huî sêng pyám râ nghut lhê.’ gâ ri; haû gi, Wum-o a-tsam dìk shoq bò Sû Yhûmsîng Garai taî ri.

10‘Haú buìnyì má, núngmòq yùq hkangmó gi, yhûmsing é tsibyiq nuî eq hkohúm gâm ô má, yhûmkyo pé lé ji nyhi to kôrâ nghut lhê.’ ga, haû Wum-o a-tsam dìk shoq bò Sû Yhûmsîng Garai taî pyo ri.” gâ é nghut ri.

Currently Selected:

Zahkariq 3: znot

Highlight

Copy