Sânghkyang 28
28
1Haû agè ashop sû gi,
ó a châng hkat kôlhang hpang ri;
nghut kôlhang, díngmán sû kúm gi,
hkanghkyi su yhang ngegáng htu ri.
2Mîngdán ralhum má gumlau toq jáng gi,
zau wuî myo myo nyi é nghut ri;
nghut kôlhang, sê gyô é u-nuq bo é eq,
hpàqchyî bo é byù yánmai,
mîngdán haû myáng myáng wó gingtîng nyi ri.
3Asho awui myùng bang lé zìk zô é zau gi,
kyôshi a dàp loshoq bàt hkyô pyâm é mau wuî eq du ri.
4Târâ lé tô pyâm é bang gi,
agè ashop bang lé hkya-on bang nghut ri;
nghut kôlhang, târâ lé châng é bang kúm gi,
haú bang lé htuqhtîng akô nghut ri.
5Agè ashop é byu pé gi,
târâ ràp-rá hkyô lé a sê gyo kó;
nghut kôlhang, haû Yhûmsîng Garai lé ho é bang gi,
haú lé bànshoq sê gyô akô nghut ri.
6Mara hûn râ hkyô a bo é myùng sû gi,
myìt goí hkyô bo é wó su htoq je ge ri.
7Târâ châng é sû gi,
sê gyô é u-nuq bo é zoshâng nghut ri;
nghut kôlhang, zo myòqnòq bang eq zùm yàp é sû gi,
yhâng wa lé hoq lhoqhpu sû nghut ri.
8A-myàt wó râ matú ngho zo ngho shuq mù,
yhûmsing sùtzè lhoqmyô yu é sû gi,
asho awui myùng bang lé shogyo su é matú,
hkong to byî é sû nghut ri.
9Târâ a gyo râ matú,
yhâng é nohkyap lé lhing pyâm é nghut jáng,
haú yùq é kyûdung dang lháng gi,
achaq achyut nghut ri.
10Haû i‑myìt díng sû lé,
agè ashop é hkyô má shuî û yu é sû gi,
yháng htung tô é dumzo má yhang,
byìt gyó wâng râ nghut lhê;
nghut kôlhang, mara hûn jang a bo é sû gi,
ge é muìzè myang hkam yù râ nghut lhê.
11Sùtzè wó sû gi, yhûmsing é myòq hí má,
hpàqchyî bò bun râ nghut lhê;
nghut kôlhang, sê gyô é u-nuq bo é myùng sû gi,
haú yùq é hkyô lé myang ròt byî ri.
12Haû díngmán sû ûngmyuq hkyô wó jáng gi,
gabú hpo mó nghut ri;
nghut kôlhang, agè ashop sû ahko ahkáng mó wó lô jáng gi,
byu pé hpang haq byùq akô nghut ri.
13Yhûmsing é mara lé nghop pyâm é sû gi,
wó lô sut lò râ a nghut;
nghut kôlhang, mara yín yû mù koi pyâm é sû gi,
shogyo nhikmyin hkyô wó yû râ nghut lhê.
14Haû Yhûmsîng Garai lé
ayang gyùq hkúnggâ é sû gi,
hkungsô wó nyi ri;
nghut kôlhang, i‑myìt lhoqhtân sû gi,
wuîhke jamjau hui zo râ nghut lhê.
15Asho awuî é bang lé ùp zô é agè ashop sû gi,
mying jón wún é hkanghkyi eq le,
sho gyám wún é wàm eq le du ri.
16Sê gyô é u-nuq a bo é zau gi,
zìk zo zìk shuq sû nghut ri;
nghut kôlhang, agè ashop é dông wó é lé,
a nguì sû gi, chyungxe hîng râ sû nghut lhê.
17Byù sat sui chyîn mara dàp sû gi,
mosumhkung má hpang wàng râ nghut lhê;
yhang lé, ó yùq le a hkúm sháng gàq.
18Yhûmsîng sô é hkyô má mara hûn jang a bo é sû gi,
yùqyò râ nghut lhê;
nghut kôlhang, yhûmsing é hkyô má,
myìt goí hkyô bo é sû gi,
byò dàn tung gyòp gyó râ nghut lhê.
19Yhûmsing é yò má mú zuî é sû gi,
zoshuq agùn agó wó râ nghut lhê;
nghut kôlhang, akôm nghut é pé lé
châng hkat wún é sû gi,
myung kyuq byùq râ nghut lhê.
20Jujúm é byù gi,
gyai yhang shimân byî é hui râ nghut lhê;
nghut kôlhang, sùtzè hân wó naû sû gi,
dam byî é a hui a dùt râ nghut lhê.
21Myòqdong hkyin é gi,
a ge é hkyô nghut lhê;
nghut kôle, mùk rajàp zo mai za lháng,
byù gi, târâ lu lai râ nghut lhê.
22Byù chûm kaî naì gi,
han za sùtzè wó naû kôle,
myung kyuq hkyô gi,
yhang lé láng tô é lé,
yhang a bûn sé nghut ri.
23Byù lé tân mhoqshit é sû gi,
chyuq zo dang taî é shô dap su htoq,
ló htáng má jeju je wó râ nghut lhê.
24“Târâ lu lai hkyô a nghut.” ga luî,
yhâng nu eq yhâng wa lé myàq zo myàq shuq sû gi,
lhoqhten lhoqhpyoq su é byìnzùm nghut ri.
25Myòqnòq sû gi, mabyòq jishûm lhoqhtoq ri;
nghut kôlhang, haû Yhûmsîng Garai lé lùmhkaû sû gi,
kô lam lò râ nghut lhê.
26Yhûmsing gùng yhûmsîng lùmhkaû sû gi,
nghâ sû nghut ri;
nghut kôlhang, hpàqchyî byéng-yá dông nyì yàp sû gi,
nguì ngón yùqyo ri.
27Myùng bang lé byi sû gi,
haî lháng a langhpyùt râ nghut lhê;
nghut kôlhang, haú bâng é hí má
myòq chûm pyâm é bang gi,
nhîng pyâm é myo myo hui zo kôrâ nghut lhê.
28Haû agè ashop bang ahko ahkáng wó lô jáng,
byu pé hpang haq byùq bum akô;
nghut kôlhang, haû agè ashop sû htên byòq jáng kúm gi,
díngmán bang myô jàt lo ri.
Currently Selected:
Sânghkyang 28: znot
Highlight
Copy
Compare
Share
Want to have your highlights saved across all your devices? Sign up or sign in
© 2025, Wycliffe Bible Translators, Inc.