Obadi-a 1
1
Obadi-a Myang É Shing-rán
1Obadi-a myang é shing-rán.
Haû Ahko Ahkáng lhúnglháng wó Sû Yhûmsîng Garai gi, Edom mau eq séng luî shî su ga taî ri;
haû Yhûmsîng Garaî chyáng mâ é mungdang lé ngá-mòq wó gyo bê nghut lhê;
Yhang gi, gótû byù myû wui chyáng lagyo nhang kat mù,
“Toq keq; yhang lé gyè zan râ matú ngá-nhúng toq sháng.” ga taí nhang kat ri.
2“Wú keq; Ngò gi, Edom nang lé gótû byù myû wui chyáng lhoqtiq pyám râ nghut lhê;
nàng gi, bànshoq èq gyai yhang wú tiq pyâm é hui râ nghut lhê.
3Lùq-ú hkaû má nyì mù, myhang é jowò má yhûm saî lúng luî,
‘Ngo lé, myigùng má ó yùq wó lhoqhkyó râ lhú?’ ga,
yhûmsing gùng yhûmsîng taî é sû ê,
nàng nghutbûn é myìt gi, nang lé mhaú zo bê nghut ri.
4Nàng gi, zùn su wó dâng myhâng mù,
kyî pê é gyoro má sut saí kôlhang,
Ngò gi, nang lé haú mai lhoqhkyó râ nghut lhê.” ga,
haû Yhûmsîng Garai taî pyo ri.
5“Hkau bang náng chyáng jé mù,
myín lé da-myàq pé jé kô é nghut jáng,
yhángmòq gi, nhik shî shoq hkaû yù kôrâ nghut lhê, a nghut lhí?
Tsibyiq shi hpyoq bang náng chyáng jé é nghut jáng,
yhángmòq gi, shigyó ra-tsuí tô to kôrâ nghut lhê, a nghut lhí?
Nghut kôlhang, dìk shoq hpu zo hkyô gi, náng chyáng jé to bu-nhung!
6Eso lé gi, jíhkúm nùqgùq ho gôn wú râ nghut mù,
yhang haq tô é hpaudap zè pé lé myang ho htoq yû râ nghut ri myhî-nhung!
7Nàng eq dangshikaq tô é bang bànshoq gi,
náng é maukyo jé shoq nang lé hkat pyám kôrâ nghut lhê;
náng é luzúm wuî gi, nang lé mhaú zo luî,
nang lé ung pyám kôrâ nghut lhê;
náng é mùk zo bang gi, náng é matú dumzo htûng kôrâ nghut lhê;
nghut kôlhang, nàng gi, u-nuq a bò nghut ri.” le gâ ri.
8Haû Yhûmsîng Garai taî pyo é gi,
“Haú buìnyì má, Ngò gi, Edom mau mâ é hpàqchyî byéng-yá bò bang lé le,
Eso é bùm pé mâ é sê gyô é u-nuq bò bang lé le, lhoqhtûm pyám râ nghut lhê.
9Teman wà ê, náng é sârhe pé gi, kyuq ngha tô é hui kôrâ nghut lhê;
Eso é bùm pé mâ é yùq hkangmó gi,
sat htûm pyâm é hui kôrâ nghut lhê.
10Nàng gi, nunggu Yakup lé ashop é dông kut pyám bê nghut é yánmai,
hoq hpû é hui zo râ nghut lhê;
nàng gi, ahtum abyùq lhoqhtûm pyâm é hui zo râ nghut lhê.
11Byù bíng pé gi, Yakup é sùtzè lé lú yu ló mù,
maigan byu pé gi, yhâng é hkum pé má wàng luî,
Yerusalem wà mó é matú hkyîn shosé shê kô é buìnyì má,
nàng gi, yhángmòq hkyam shut bo yàp mù,
yhángmòq eq rahpúng za su dùt byùq bê nghut ri.
12Nàng gi, nunggu hpu zô é buìnyì má,
myìt hkâwú lôm;
Yudaq byu pé htên byòq huî é buìnyì má,
hkâwú gabú;
yhángmòq wuîhke jamjau huî é buìnyì má,
gyáng é dang hkâtaí.
13Nàng gi, Ngá é byu pé byò dàn byò sho hui zô é buìnyì má,
yhángmòq é hkyô hkum pé mai hkâlai;
yhángmòq byò dàn byò sho hui zô é buìnyì má,
yhángmòq wuîhke jamjau hpu zô é lé myìt hkâwú lôm;
yhángmòq byò dàn byò sho hui zô é buìnyì má,
yhángmòq é sùtzè lé hkâlú yû.
14Wó hpang lùt é bang lé lhom sat kyop râ matú,
hkyô kang má hkâyàp to;
yhángmòq byò dàn byò sho hui zô é buìnyì má,
wó nyi myìt tô é bang lé hkâ-ap byî pyám.
15Hkâsu mù gâ le, haû Yhûmsîng Garaî é buìnyì gi,
byù myû chângjup é matú chyáng bê nghut ri.
Nàng kut bê é eq rajung za, nang lé le taû kut byi râ nghut lhê;
náng é nyì yàp sâmlai gi, náng é ulhum htoq má jé râ nghut lhê.
16Ngá é byu pé gi, Ngá é chyoiyúng bùm má dàm byî é wuì lé shuq é su,
byù myû wuì bànshoq gi, xoq xoq shuq kôrâ nghut lhê;
yhángmòq gi, dum shuq dum shuq kut mù,
a nyi wú é bang su dùt byùq kôrâ nghut lhê.
17Nghut kôlhang, Zi-un Bùm má hkyi xe yù hkyô jòq râ nghut lhê;
haû gi, chyoiyúng jowò dùt râ nghut mù,
Yakup gi, yhang sing yù âng é silî wunlî maumyî lé sing yù râ nghut lhê.
18Yakup é a-myû gi, myi dùt mù,
Yosep é a-myû gi, myishâm dùt râ nghut lhê;
Eso é a-myû gi, kyuq huî é hkówá dùt byùq râ nghut mù,
yhángnhik gi, yhang lé myi tap kat luî,
yhang lé lhoqhtên pyám râ nghut lhê.
Eso chyáng mai nyi myìt gyó tô é byù nyì râ a nghut lo.” ga,
haû Yhûmsîng Garai taí bê nghut ri.
19Maupyî Mau mâ é bang gi,
Eso é bùm pé lé sing yù mù,
bùmhkyî pá pé mâ é bang gi,
Hpilisiti mau lé sing yù kôrâ nghut lhê.
Yhángmòq gi, Ehprim mâ é yò pé eq Samariq mau mâ é yò pé lé sing yù râ nghut mù,
Ben-yamin gi, Gile-at maumyî lé sing yù râ nghut lhê.
20Hkanan byu pê chyáng shúm zûng huî nyi é,
Isira-elaq byu pé ajùm ayò gi, Zarehpat wà jé shoq wó sing yù râ nghut mù,
Sehparat wà má Yerusalem wà mó mai shúm zung é bang gi,
Maupyî Mau mâ é wà pé lé sing yù râ nghut lhê.
21Eso é bùm pé lé ùp râ matú,
hkyi xe yu é bang gi, Zi-un Bùm má dòq ê kôrâ nghut mù,
mîngdán haû gi, Yhûmsîng Garaî é mîngdán dùt byùq râ nghut lhê.
Currently Selected:
Obadi-a 1: znot
Highlight
Share
Copy
Want to have your highlights saved across all your devices? Sign up or sign in
© 2025, Wycliffe Bible Translators, Inc.
