Gyung So 22
22
Balam Lé Balak Èq Ji Yu É Hkyô
1Hau htâng, Isira-elaq byu pé gi, Moba pá má sô jé luî, Yerihko wà tû-tap, Yodan làng yàm cháng luî wàp xuq akô nghut ri.
2Zipora é yhang zo Balak gi, Amori byu pé lé Isira-elaq byu pé mai kut é hkyô bànshoq lé myàng bê nghut ri. 3Haû mù, Moba byu pé gi, Isira-elaq byu pé gyai myô é yánmai, gyai yhang gyùq chiq bum akô; hau htoq agó, yhángmòq gi, Isira-elaq byu pê é yánmai, myìt gyùq myìt chiq dùt nyi bum akô nghut ri.
4Haû mù, Moba byu pé gi, Midi-an mâ é zaugun sûwún wuî lé, “Byù ajùm ayò shí bang gi, yò mâ é mhan lé nô èq chyuí kut pyâm é su, ngá-nhûng é lhînghkyùq má nyì mî-nyî lé chyuí kut pyám kôrâ nghut lhê.” ga taî akô nghut ri.
Haû mù, haú u Moba byu pê é hkóhkâm nghut sû, Zipora é yhang zo Balak gi, 5Be-ori é yhang zo Balam lé ê jî râ matú, yhâng é yhummau mâ é Uhprat Wuìlàng nàm má jòq é Pehtora wà shut lagyô pé nhang kat luî, dang châng pying kat é gi,
“Egutuq ming mai htoq lo é byù rahú nyi ri; yhángmòq gi, ra-mau gón byíng zan to bekô nghut mù, ngá é nàm má wàp xuq tô akô nghut ri. 6Byu shí bang gi, ngá htoq wum-o a-tsam lûm bò kô é yánmai, ahkuî, nàng yhángmòq lé lé nhing aq; haú hkûn, ngò gi, yhángmòq lé wó zân ûng mù, shî ngá mau mai wó hkat htoq pyám râ nghut lhê âbe. Hkâsu mù gâ le, nàng shimân byî é sû gi, shimân jeju wó é hkyô lé le, nàng nhîng pyâm é sû gi, nhinghkun zùq é hkyô lé le, ngò sê lhê.” gâ ri.
7Moba zaugun sûwún wuî eq Midi-an zaugun sûwún wuî gi, bo nhing hpau yu chûng mù, e ló kôluî, Balam chyáng ê jé kôjáng, Balak pying kat é dang lé taî kyô akô nghut ri.
8Haú hkûn, Balam gi, “Hkû-myîn shi má nô yù keq; haû Yhûmsîng Garai mai ngo lé taî kyô é eq rajung za, ngò, núngmòq lé shit kyo râ nghut lhê.” ga yhángmòq lé taî ri. Haû mù, Moba zaugun sûwún wuî gi, Balam chyáng bíng bekô nghut ri.
9Garai Gasang gi, Balam chyáng lé mù, “Náng chyáng nyi tô é byù shí bang, ô pé nghut ri lhú?” ga myî ri.
10Balam gi, Garai Gasang lé, “Moba byu pê é hkóhkâm nghut sû, Zipora é yhang zo Balak mai ngo lé îsu ga pying kat ri; 11‘Egutuq ming mai htoq lo é byù rahú gi, ra-mau gón byíng zan to bekô nghut ri; ahkuî, nàng, ngá é matú yhángmòq lé lé bo nhing byi aq; haú hkûn, ngò gi, yhángmòq lé wó zân ûng mù, shî ngá mau mai wó hkat htoq pyám râ nghut lhê âbe.’ gâ ri.” ga taî ri.
12Nghut kôlhang, Garai Gasang gi, Balam lé, “Nàng, yhángmòq eq hkâbo ló. Byù shí bang lé nàng ge nhing râ a nghut; hkâsu mù gâ le, yhángmòq gi, shimân jeju wó é bang ru nghut lhê.” ga taî ri.
13Htang nàpkyó, Balam gi, toq mù, Balak é zaugun sûwún wuî lé, “Núngmòq é mau má taû ló lo keq; hkâsu mù gâ le, haû Yhûmsîng Garai gi, ngo lé, núngmòq htâng cháng râ ahkáng a byi nghut ri.” ga taî ri.
14Haû mù, Moba zaugun sûwún wuî gi, Balak chyáng taû ló mù, “Balam gi, ngá-mòq htâng a cháng nghut ri.” ga taî akô nghut ri.
15Haú hkûn, Balak gi, hî dam lhê htoq je myo shoq, hpung je bo é gótû zaugun sûwún wuî lé dum nhang kat ri. 16Yhángmòq gi, Balam chyáng lé jé kômù,
“Zipora é yhang zo Balak taî le, ‘Ngá chyáng lé râ matú hai èq le nang lé hkâhkûm zing to nhâng; 17haî mù gâ le, ngò gi, nang lé chyûnghuq mó byi râ nghut é htoq agó, nàng taî é haî le kut byi râ nghut lhê. Ngá é matú, byù shí bang lé za lé bo nhing aq.’ gâ ri.” ga taî akô nghut ri.
18Nghut kôlhang, Balam gi, yhángmòq lé, “Balak gi, yhâng é hkóhkâm wâng mâ é ngùn hîng bànshoq ngo lé byî é nghut kôlhang, ngò gi, ngá é Garai Gasang nghut é, haû Yhûmsîng Garaî é hkunmó lé lu lai luî, haí jung mú zo mú mó le a ge kut. 19Nghut kôle, haû Yhûmsîng Garai mai ngo lé haî taî kyo shirâ lé ngò wó sé râ matú, núngmòq hkû-myîn shî má no shi keq.” ga taî ri.
20Haú myîn, Garai Gasang gi, Balam chyáng lé mù, “Byù shí bang gi, nang lé lé jî râ matú lé bekô nghut lhê mù, yhángmòq htâng bo châng ló aq; nghut kôlhang, nang lé ngò taî kyô é dông za kut àq.” ga taî ri.
Balam Eq Lozê É Hkyô
21Htang nàpkyó, Balam gi, yhâng é loze lé buí mù, Moba zaugun sûwún wuî eq bo châng ló bê nghut ri. 22Nghut kôlhang, Garai Gasang gi, yhang bo châng e ló é hkûn gyai yhang nhikjum yô é nghut mù, haû Yhûmsîng Garaî é maumang lagyo gi, yhang lé htuqhtíng râ matú hkyô má yàp tô ri. Balam gi, yhâng é loze má ji mù, yhâng é duìnhâng zoshâng í yùq eq e ló ri. 23Haû Yhûmsîng Garaî é maumang lagyo gi, yhâng é shâm wìng mù, hkyô má yàp tô é lé, loze haû myàng luî, hkyô yàm shut lhîng mù, yò hkaû shut lhing wang ló ri. Haú hkûn, Balam gi, hkyô shut tau râ matú loze haú lé bàt ri.
24Haú hkûn, haû Yhûmsîng Garaî é maumang lagyo gi, í shut kyâm tô é tsibyiq hkyâm gyoro mâ é hkyô chyap zo má yàp tô ri. 25Loze haû gi, haû Yhûmsîng Garaî é maumang lagyo lé dum myàng jáng, hkyâm yàm shut nghe jau ló mù, Balam é hkyî lé záng nyham byî ri. Haû mù, Balam gi, loze haú lé dum bàt bê nghut ri.
26Haú hkûn, haû Yhûmsîng Garaî é maumang lagyo gi, hí shut huî ê mù, lòqyò lòqpai le a wó lhing é hkyô chyap é jáng má yàp tô ri. 27Loze haû gi, haû Yhûmsîng Garaî é maumang lagyo lé myàng jáng, Balam jî to gu má up byùq ri; haû mù, Balam gi, nhikjum yo luî, yhâng é dumbáng èq loze haú lé bàt ri. 28Haú hkûn, haû Yhûmsîng Garai gi, loze hau é nhuthkum hpóng byî é nghut luî, loze haû gi, Balam lé, “Nàng, ngo lé sum dâm bàt shoq gi, ngò, nang lé haî kut é lhú?” ga taî ri.
29Balam gi, loze lé, “Nàng, ngo lé nyaú nyi ri! Ngá é lòq má shâm chung tô é ru nghut le gi, ahkuî yhang, nang lé sat pyám râ nghut lhê.” ga tû taî ri.
30Haú hkûn, loze haû gi, Balam lé, “Ngò gi, hkû-nyí jé shoq nàng jî nyi é, náng é loze nghut lhê, a nghut lhú? Ngò, nang lé shí dông hkâ-nhám kut wú é lhú?” ga myî ri.
Yhang gi, “A kut wú.” ga taî ri.
31Haú hkûn, haû Yhûmsîng Garai gi, Balam é myòq hpóng byî é nghut luî, yhang gi, haû Yhûmsîng Garaî é maumang lagyo yhâng shâm wìng mù, hkyô má yàp tô é lé myàng bê nghut ri. Haû mù, yhang gi, ulhum ngóm gòp to bê nghut ri.
32Haû Yhûmsîng Garaî é maumang lagyo gi, yhang lé, “Nàng gi, haî mù, náng é loze lé sum dâm bàt lhê lhú? Nàng e ló é hkyô gi, ngò eq shut shai é yánmai, nang lé hkûm tâng râ matú ngò lé jé é nghut lhê. 33Loze gi, ngo lé myàng luî, shî sum dâm lhing pyâm é nghut lhê. Yhang a lhing pyâm é ru nghut le gi, ngò, ahkuî yhang nang lé sat pyám luî, yhang lé chyungxe lhut to râ nghut lhê.” ga taî ri.
34Haú hkûn, Balam gi, haû Yhûmsîng Garaî é maumang lagyo lé, “Ngò shut bê. Ngò gi, nàng, ngo lé hkûm tâng râ matú hkyô má yàp tô é lé a sê kat é nghut lhê. Nàng a gyô é nghut jáng gi, ngò, ahkuî taû ló râ nghut lhê.” ga taî ri.
35Haû Yhûmsîng Garaî é maumang lagyo gi, Balam lé, “Byù shí bâng htâng bo châng ló aq; nghut kôlhang, nang lé ngò taî kyô é dông za taí aq.” ga taî ri. Haû mù, Balam gi, Balak é zaugun sûwún wuî eq bo ló bê nghut ri.
36Balak gi, Balam lé lo é hkyô lé wó gyo jáng, yhang lé ê tê râ ga, yhâng é maukyo mâ é Arinon Wuìlàng yàm mâ é Moba byu pê é wà shut htoq e ri. 37Balak gi, Balam lé, “Ngò gi, byù hân nhang kat mù, nang lé lé jî nhang é a nghut lhí? Haî mù luî, ngá chyáng hân za a lé lo é lhú? Ngò, nang lé chyûnghuq a wó byi râ nghut lhê lhú?” ga taî ri.
38Haû jáng, Balam gi, “Ahkuî, ngò, náng chyáng jé bê nghut lhê. Nghut kôlhang, ngò gi, ngá myìt dông ge taî é a nghut. Ngò gi, Garai Gasang mai ngá é nhut má kat byî é lé za taí ra râ nghut lhê.” ga tû taî ri.
39Haû mù, Balam gi, Balak eq rahá Kiri-at Huzot má ê jé akô nghut ri. 40Balak gi, nojûng eq sau pé lé nhông byi mù, ra-am lé, Balam lé le, yhang eq rahá nghut é zaugun wuì lé le byî ri. 41Htang nàpkyó, Balak gi, Balam lé, myhang é Bamot Balaq hparà má shuî dòq ló é nghut mù, Balam gi, Isira-elaq byu pé xuq tô é wàp ra-am lé byu myang kat ri.
Currently Selected:
Gyung So 22: znot
Highlight
Copy
Compare
Share
Want to have your highlights saved across all your devices? Sign up or sign in
© 2025, Wycliffe Bible Translators, Inc.