Marikuq 16

Dum Dui Toq Lo É Hkyô

Mht 28:1-8; Luk 24:1-12; Yhn 20:1-10

1Bánno Buìnyì lai jáng, Magadalaq wà mâ é Mariq, Yakuq é yhâng nu Mariq eq Salome pé gi, Yesuq é gùng má, ê bùt byi râ matú namngón jung ê wui akô. 2Bánno Buìnyì htang nàpkyó buì htoq lo é hkûn yhang, yhángmòq gi, lùp shut e ló akô. 3Yhángmòq gi, “Lùphkum mâ é lùqgòk lé, ó yùq chyûn lhêng pyám byi râ lhú?” ga, rayùq eq rayùq taî lhûm akô.

4Nghut kôlhang, yhángmòq tu wú kat kô é hkûn, lùqlong haû gi, lhoqlhêng to láng é lé, myang akô nghut ri; lùqlong haû gi, gyai kô é nghut lhê. 5Yhángmòq gi, lùp hkaû má wang ê kô é hkûn, hpyu é buhîng wùt é zorâm rayùq, lòqyo hkyam má zung tô é lé, myàng kôjáng, gyùq dan bum akô.

6Haú hkûn, haú yùq gi, “Hkâgyùq dàn kó! Núngmòq gi, haû tapzîng má jén sat huî é, Nazaret wà byù Yesuq lé ho akô, a nghut lhú? Yhang dui toq ló bê! Yhang gi, shí má a nyì lo. Yhang lé, lheq tô é jowò lé wú wú keq. 7Ahkuî, núngmòq gi, ló mù, ‘Yesuq gi, núngmòq hí má, Galile mau shut so láng râ nghut lhê. Núngmòq lé, Yhang taî tô é eq rajung za, núngmòq gi, Yhang lé haú má ló myâng kôrâ nghut lhê.’ nghû, Yhâng é chángzô pé eq Petiruq lé ló taî kyo keq.” ga lhom taî kat ri.

8Haû mù, myiwe myhí haú bang gi, byò dàn gyùq nán é eq, lùp mai hpang htoq ló akô; yhángmòq gi, lûm gyùq byùq kô é yánmai, ó yùq lé le, haî le a taí kó nghut ri.

(Bun zo 9 mai 20 jé shoq gi, chyúmding axau ra-am pé má a bo é nghut lhê.)

Yesuq Htoq Shit É Hkyô

Mht 28:9-10, 16-20; Luk 24:13-53; Yhn 20:11-23; Lagyo 1:6-11

9Yesuq gi, Bánno Buìnyì htang nàpsûn lé, Yhang dui toq é htâng, Yhang mai nàt gang nyhit du hkat htoq pyám byi bê sû, Magadalaq wà mâ é Mariq lé hí htoq shit ri. 10Mariq haû gi, ló mù, haû Yesuq eq nyi laî lò bê bang, yón ngau nyì kô é hkûn, haú hkyô lé ló taî kyô ri. 11Yhángmòq gi, Yesuq dum duì bê gâ é hkyô lé le, Yhang lé, Mariq myang é gâ é hkyô lé le, wó gyo kôlhang, a jíng kó nghut ri.

12Hau htâng má, Yesuq gi, yòsô wà shut htoq e ló nyi é chángzo í yùq lé, gótû gùnghkyâng dông htoq shit ri. 13Haú nhik gi, taû lò mù, gótû chángzô pé lé haú hkyô lo shit kyô akô; nghut kôlhang, yhángmòq gi, haû lé le a jíng byi kó nghut ri.

14Hau htâng má, Yesuq gi, haû chángzo raxe rayùq baú za zang zô nyì kô é hkûn, yhángmòq chyáng lé htoq shit ri. Yhángmòq chyáng lùmjíng myìt a bò kô é yánmai le, Yhang dui toq é htâng má, Yhang lé myang é bang taî kyo kô é dang lé, a jíng é za myìt htan to kô é yánmai le, Yhang gi, yhángmòq lé tân ri.

15Hau htoq agó, Yesuq gi, yhángmòq lé, “Mingkan jàm shoq htoq ê mù, waxâng zo wuî lhúnglháng lé, haû gabú danglù hko kyo keq. 16Lùmjíng mù, wuìmyhup hkâm yu é sû ó yùq nghut kôle, hkyi yu é hui râ nghut lhê. Nghut kôlhang, a lùmjíng é sû ó yùq nghut kôle, mara byî é hui râ nghut lhê. 17Lùmjíng é bang wó kut shit râ alhô agàn pé gi, Ngá é myìng lé lang luî, nàt gâng pé lé wó hkat htoq kôrâ eq làklaí é myíng pé lé dàt nyò kôrâ nghut lhê; 18yhángmòq gi, lhângmuì pé lé le, wó kui zui kôrâ nghut lhê; muî shi jung dùq lé, shuq kôlhang, haî dùt kôrâ a nghut. Nòhpyo hui bâng é htoq má, yhángmòq é lòq ke byi jáng, haú bang ge byùq kôrâ nghut lhê.” ga taî ri.

19Haû Yhûmsîng Yesuq gi, yhángmòq lé dang ban taî é htâng má, mauhkûng shut shuî toq yu é hui luî, Garai Gasâng é lòqyo hkyam má zung to bê nghut ri. 20Hau htâng, haû chángzô pé gi, htoq ê mù, jowò hkangmó má mungdang ê hko kyô akô nghut ri; haû Yhûmsîng gi, yhángmòq eq rahá nghut nyî mù luî, Yhâng é mungdang têng é hkyô lé tûn shit râ matú, yhángmòq lé, alhô agàn pé wó kut é a-tsam byî é nghut ri. Amen.

Currently Selected:

Marikuq 16: znot

Highlight

Copy