Mahte 8

Yàpjèq Dàp É Byù Rayùq

Mrk 1:40-45; Luk 5:12-16

1Yesuq gi, bùm htoq mai gyó lo é hkûn, byù mòqmó gi, Yhâng htâng châng bum akô nghut ri. 2Haú hkûn, yàpjèq nòlì dàp é byù rayùq gi, Yhâng é hí má, lé mù, hkyîhput htuq luî, “Yhûmsîng ê, Nàng gyô é nghut le gi, ngo lé Nàng wó lhoq sân-yúng byi râ nghut lhê.” ga taî ri.

3Yesuq gi, lòq lhâm kat mù, haú yùq lé ê záng luî, “Ngò dóng lhê, sân-yúng àq hkoi.” ga taî kat ri. Haú hkûn jáng, haú yùq é yàpjèq nòlì gi, ge byùq bê nghut ri. 4Haú hkûn, Yesuq gi, “Nàng, shí hkyô ó lé le hkâtaî kyo. Nghut kôlhang, náng é gùngdu lé, hkyangjong hpô chyáng ló tûn shit mù, yhángmòq é matú sàksé dùt sháng gàq, Mosheq taî tô é eq rajung za, hkungga ló nhông byi aq.” ga haú yùq lé taî kat ri.

Gyèzau Hpô É Lùmjíng Myìt

Luk 7:1-10; Yhn 4:43-54

5Yesuq, Kaperina‑um wà má wang e ló le, Romaq gyèzau hpó rayùq gi, Yhâng chyáng lé jé mù, 6“Yhûmsîng ê, ngá é duìnhâng zoshâng gi, gùngjum shi é htoq agó, yhûm má gyaí no jamjaû lèq tô ri.” ga garúm lé dûng ri.

7Haú hkûn, Yesuq gi, yhang lé, “Ngò, lé lhoqgê byi râ.” ga taî kat ri.

8Gyèzau hpó haû, Yhang lé dum tû taî é gi, “Yhûmsîng ê, Nàng, ngá é laìshînhtâng má, lé nang râ lháng ngò má a gíngdán. Nàng, dang rahkun za taî kat laq; haú hkûn, ngá é duìnhâng zoshâng ge ló râ nghut lhê. 9Hkâsu mù gâ le, ngò le ahkáng ayá wó é zau rayùq é a‑ô mâ é zau nghut lhê; ngá é a‑ô má le gyèzô pé nyi lhê; rayùq lé, ‘Ê àq!’ nghu le, yhang e ló lhê; góyùq lé, ‘Lò àq!’ nghu le, yhang lo lhê; ngá jûn lé le, ‘Shî kut àq!’ nghu le, yhang kut lhê.” gâ ri.

10Yesuq gi, dang haú lé wó gyo jáng, maú byùq luî, Yhâng htâng cháng bang lé, “Ngò, núngmòq lé teng za taí kôlé, Isira-elaq a-myû má lháng, shî í lùmjíng é sû lé, Ngò, rayùq lé le a myang wú é nghut lhê. 11Ngò, núngmòq lé taí kôlé, buìhtoq buìwàng hkyam mâ é byu pé myo myo gi, mauhkûng mîngdán má, Abraham, Isak, Yakup pé eq rahá, zoshuq poî mó má myang zùng kôrâ nghut lhê. 12Nghut kôlhang, mîngdán haú má wàng âng é bang kúm gi, shinggan mauchut hkaû shut dú pyâm é hui luî, haú jowò má ngaùbyi ngaù nhap eq zuì kyik kyik shoq hpuzô nyi bùm bekô râ nghut lhê.” ga taî ri.

13Hau htâng, Yesuq gi, gyèzau lé, “Ló aq hkoi! Nàng lùmjíng é eq rajung za, dùt râ nghut lhê.” ga taî ri. Haú u má yhang, haû duìnhâng zoshâng gi, ge byùq bê nghut ri.

Byù Myo Myo Lé Lhoqgê Byî É Hkyô

Mrk 1:29-34; Luk 4:38-41

14Yesuq gi, Petiruq é yhûm má jé wang e é hkûn, Petiruq é yhâng aûmó gyai yhang no lèq tô é lé, ê myang ri. 15Yesuq gi, yhâng é lòq má ê záng kat é hkûn, Petiruq yhâng aûmó gi, nòhpyo ge byùq mù, toq luî, Yhang lé wó gaí tso gaí huq bê nghut ri.

16Myínhtâng mauchut lô jáng, nàt gang wang júng nyi é bang myo myo lé, Yhâng chyáng shuî lé lo akô. Yhang gi, agè ashop é nàt gâng pé lé dâng èq hkat htoq pyám mù, nòhpyo huî é bang bànshoq lé lhoqgê byî ri. 17Haû gi,

“Yhang gi, ngá-nhûng é nòlì nòjàng lé yu pyám byi mù, ngá-nhûng é nòlì nòjàng lé, wùn wàq pyám byi bê nghut ri.”#Esai 53:4

ga, myìqhtoi Esai-a taî tô é dang lhoqdìk râ matú nghut ri.

Yesuq Htâng Cháng Râ Bang

Luk 9:57-62

18Yesuq gi, Yhâng é lhînghkyùq má byù mòqmó zùp míng nyi é lé myàng jáng, Yhâng é chángzô pé lé, nhông hé hpoq shut gû dàp ê sháng gâ ri. 19Haú hkûn, târâ sará rayùq gi, lé lô mù, “Sará ê, ngò gi, Nàng hká e le hká cháng râ nghut lhê.” ga Yhang lé lé taî ri.

20Haû jáng, Yesuq gi, “Wàmhkuî pé gi, hkyûng wó akô; nghoq pé le, nghoqsut wó akô. Nghut kôlhang, haû Byu Yhangzo gi, u nghê jowò lháng a wó nghut ri.” ga lhom taî kat ri.

21Haú hkûn, chángzo rayùq gi, “Yhûmsîng ê, ngá wa lé ló yhûm pyám râ ahkáng hí byi shilaq.” ga taî kat ri.

22Nghut kôlhang, Yesuq gi, “Shî bê bang gi, shî bê bang yhangchang yhûm lhum kó sháng gàq, nàng gi, Ngá htâng cháng aq.” ga dum taû taî ri.

Laìdun Lhoqzîm É Hkyô

Mrk 4:35-41; Luk 8:22-25

23Hau htâng, Yesuq lhaî hkaû má wàng mù, Yhâng é chángzô pé le, Yhâng htâng châng wàng bekô nghut ri. 24Haú hkûn, nhông má byò dàn htik laìdun mó lò mù, wuìlhêng pé gi, lhaî má bàt ûm lò bê nghut ri. Nghut kôlhang, Yesuq gi, yhup myhî tô ri. 25Chángzô pé gi, Yhâng chyáng jé ê mù, Yhang lé nhaû pun luî, “Yhûmsîng ê, hkyi yù làq ô! Ngá-nhúng myùp ló nyi ri.” ga taî akô.

26Yhang gi, “Lùmjíng myìt shaû é bang ê! Haî mù, haû í gyùq bum akô lhú?” ga taî kat ri. Hau htâng, Yhang gi, toq luî, laìdun eq wuìlhêng pé lé tân kat jáng, bànshoq zîm byùq bê nghut ri.

27Byù haú bang gi, maú hong byùq kômù, “Shí yùq gi, hkâsû é byù lhà? Laì eq wuìlhêng pé lháng gi, Yhâng é dang lé gyo byî ri myhî-nhung!” ga luî, rayùq eq rayùq myî lhûm bum akô nghut ri.

Nàt Wang Júng Su Nhik Lé, Lhoqgê Byî É Hkyô

Mrk 5:1-20; Luk 8:26-39

28Yesuq gi, Gadare byu pê é mau hpoq má jé dàp ló jáng, nàt gang wang júng é byù í yùq gi, lùpdùng mai htoq lé lô kômù, Yhang lé lé huî akô. Haú nhik gi, haú hkyô mai ó lháng a wám lai loshoq wuî é su nhik nghut akô. 29Yhángnhik gi, Yesuq lé, “Garaî Yhangzo ê, Nàng, ngá-mòq eq haî sêng lhê lhú? Ahkyíng a jé shi-má, ngá-mòq lé zing-ri râ matú jé lé lo é nghut lhê lhú?” ga taî garû akô.

30Haú mai a lûm wê é jowò má, wàq rajùm mó gi, myì dû but zô nyi bum akô nghut ri. 31Nàt gâng pé gi, Yesuq lé, “Nàng, ngá-mòq lé hkat htoq râ nghut jáng, hê wàq pê chyáng wàng nhâng laq.” ga dûng akô.

32Yesuq gi, “Htoq ló keq!” ga taî kat ri. Haû mù, yhángmòq gi, htoq ló luî, wàq pê chyáng wàng mù, wàq haú jûm gi, gampyoq mai nhông hkaû shut din yán wang ló kôluî, wuì hkaû má myùp shi byùq bekô nghut ri. 33Wàq zúng bang gi, wà mó hkaû shut hpang din wang ló kômù, dùt laî lo é hkyô bànshoq lé le, nàt gang wang júng huí su nhik hkâsu dùt é hkyô lé le, ló taî kyô akô nghut ri. 34Haû mù, rawa bang gi, Yesuq lé hui râ matú htoq lé lo bùm kômù, Yhang lé myàng jáng, yhángmòq é mau mai htoq ló byùq râ matú, chôm dûng tôngbán akô nghut ri.

Currently Selected:

Mahte 8: znot

Highlight

Copy