Mahte 3

Wuìmyhup Sará Yohan Shuî Hen É Hkyô

Mrk 1:1-8; Luk 3:1-18; Yhn 1:19-28

1Haú yòq má, Wuìmyhup Sará Yohan htoq lô mù, Yuda mau mâ é yòso má hko kyô é gi, 2“Myìt lhîng keq; hkâsu mù gâ le, mauhkûng mîngdán gi, chyâng lò bê#3:2 Mauhkûng mîngdán gi, chyâng lò bê gâ é gi, Garai ùp râ ahkyíng chyâng lò bê gâ é nghut lhê. nghut ri.” gâ ri. 3Haú yùq gi,

“Haû yòso má, byù rayùq garû taî é htê gi,

‘Haû Yhûmsing é matú, hkyô hen to keq; Yhâng é matú, hkyô lhoqnyhang to keq.’ gâ ri.”#Esai 40:3

ga myìqhtoi Esai-a taî tô é sû yùq nghut ri.

4Yohan gi, gola-uk sho-maú èq saî é mèbu wùt mù, yhâng é hpyidum má gi, sho-kuq hpyihit hit ri. Yhâng é zoshuq gi, dinggám eq yòsô byo-î pé nghut ri. 5Yerusalem wà mó mâ é bang, Yuda mau bànshoq mâ é bang eq Yodan làng awui ayàm lhúnglháng mâ é bang gi, yhâng chyáng htoq e bum akô. 6Yhángmòq gi, yhûmsing é mara lé yín yû kôluî, yhâng chyáng mai Yodan làng má wuìmyhup hkâm yu bum akô nghut ri.

7Nghut kôlhang, yhang gi, yhang wuìmyhup hkám byî é jang má, Hparishe pé eq Saduke pé myo myo lé lo nyì kô é lé myàng jáng, yhángmòq lé taî é gi, “Dùq htân lhângmuì a-myû pé ê, jé lô râ yubàk dam mai wó hpang lùt kó sháng gàq ga, núngmòq lé ó yùq taî pûn é lhú? 8Myìt lhîng hkyô eq gíngdán é ashi zui keq. 9‘Ngá-mòq gi, Abraham é yhang zo yhang shû pé nghut lhê.’ nghû luî, yhûmsing é i‑myìt ûnghkaû má hkâlum to kó. Hkâsu mù gâ le, ngò, núngmòq lé taî kyo kôlé, Garai Gasang gi, lùqgòk shí pé mai, Abraham é matú yhang zô pé wó hpan htoq kat lhê. 10Ahkuî lháng, Garai Gasang gi, Yhâng é wazung lé haû sikgâm wang pé má tô to bê nghut ri; haû mù, ge é ashi a zuî é agàm hkangmó lé gi, htuq lhêng pyám mù, myi má dú kat pyám râ nghut lhê.

11Ngò gi, núngmòq myìt lhîng kó sháng gàq nghû, wui èq za wuìmyhup hkám byî lhê. Nghut kôlhang, ngá htoq má wum-o a-tsam je bo é sû rayùq, ngá htâng má jé lé lô shirâ nghut luî, ngò gi, Yhâng é hkyî-tsung chûng byi râ lháng a gíngdán; Yhang gi, Chyoiyúng Sô má le, myi má le, núngmòq lé wuìmyhup hkám byi râ nghut lhê. 12Yhang gi, lòq má byò chung to mù, gùq chyârâng mâ é gùq bùm lé hik sân pyám luî, já é gùqcham lé gi, gùqchyî má tsîng kat to mù, gùqsôm lé kúm gi, hkâ-nhám le shi byùq a sê é myî èq nyhê hkyô pyám râ nghut lhê.” gâ ri.

Yesuq, Wuìmyhup Hkâm Yu É Hkyô

Mrk 1:9-11; Luk 3:21-22

13Haú hkûn, Yesuq gi, Yohan chyáng wuìmyhup hkâm yù râ ga, Galile mau mai Yodan làng má jé lé lo ri. 14Nghut kôlhang, Yohan gi, “Ngò shèq Náng chyáng wuìmyhup hkâm yù râ sû ru nghut lhê nhîng! Nàng shèq ngá chyáng lé lo lhê lhú?” ga luî, lhom taî hkûm ri.

15Haú hkûn, Yesuq gi, “Díngmán hkyô bànshoq lé, ngá-nhúng lhoqdìk râ é yánmai, Ngo lé wuìmyhup hkám byi laq.” ga tû taî ri. Haû mù, Yohan le, gyo byi bê nghut ri.

16Yesuq gi, wuìmyhup hkâm yù eq yhang, wuì mai htoq lo ri. Haú hkûn, mauhkûng bóng lô mù, Garai Gasâng é Sô gi, hpûngkyui gùnghkyâng sû é dông mai, Yhâng ahtoq má lé gyó nô tô é lé, Yhang myang kat ri. 17Haú hkûn, “Shí yùq gi, Ngò chyitdàp é Ngá zo nghut lhê; Yhâng é ahtoq má Ngò gabú myìt ngón nyi lhê.” ga mauhkûng mai danghtê htoq lo ri.

Currently Selected:

Mahte 3: znot

Highlight

Copy