Mahte 22

Myiháng Poî Dangtú Pé

Luk 14:15-24

1Yesuq, dangtú pé dông yhángmòq lé dum taî é gi, 2“Mauhkûng mîngdán gi, yhûmsing yhang zô é matú myiháng poî hen lajâng to byî é hkóhkâm rayùq eq du ri. 3Hkóhkâm hpó haû gi, yhang ji tô é bang, haû poî má lé lô râ matú, yhâng é duìnhâng zoshâng wuì lé ê tsing taí nhang ri; nghut kôlhang, haú bang gi, a lé kut akô nghut ri.

4Hau htâng má, yhang gi, gótû duìnhâng zoshâng wuì lé, ‘Ngò, ngá é zoshuq poî hen to bê; ngá é no eq xu myum é gaunyhaû pé lé sat mù, jung hkangmó rì rì nghut to bê. Myiháng poî má lé lò keq hkoi nghû, haû ji tô é bang lé ê taí keq.’ ga pyîng luî, nhang kat ri.

5Nghut kôlhang, haû ji to huî é bang gi, dang haú lé haî su a gyô ngàm kômù, rayùq gi, yohtung shut, rayùq gi, wuìloq kut hkyô shut e byùq bekô nghut ri. 6Ra-am dum nghut jáng, yhâng é duìnhâng zoshâng wuì lé lhom chyup yû kômù, nhuq bàt luî, sat pyám byî akô nghut ri. 7Haû mù, hkóhkâm gi, nhikjum yo luî, yhâng é gyèzô pé lé, haû byù sat bang lé sat pyám nhâng mù, yhángmòq é wà mó lé nyhê hkyô pyám nhang ri.

8Hau htâng má, yhang gi, yhâng é duìnhâng zoshâng wuì lé, ‘Myiháng poî gi, rì rì nghut to bê; nghut kôlhang, haû ji to huî é bang gi, lé râ a gíngdán kó nghut ri. 9Haû mù, hkyô kang pé má ê luî, myang é yùq hkangmó lé, poî má lé râ matú ê jî keq.’ ga taî ri. 10Haû jáng, duìnhâng zoshâng haú bang gi, hkyô kang pé má htoq ê luî, myang é byù gè byù gang lhúnglháng lé ji tsîng yù kô é nghut mù, myiháng poî gi, bíng pé zung byíng bùm bê nghut ri.

11Nghut kôlhang, bíng haú bang lé, hkóhkâm hpó, lé wang wú é hkûn, myiháng poî wàng hking a wùt tô é byù rayùq lé, yhang byu-myang ri. 12Haû mù, yhang gi, haú yùq lé, ‘Buìnùm hpó ê, nàng gi, myiháng poî wàng hking le a wùt é nhîng, shí má hkâsu kut wang lo é lhú?’ ga myi jáng, haú yùq gi, haî le a dàt tû taí lo nghut ri.

13Haú hkûn, hkóhkâm hpó gi, yhâng é duìnhâng zoshâng wuì lé, ‘Yhâng é hkyî lòq má tui luî, haû ngaùbyi ngaùnhap eq zuì kyik kyik shoq hpuzô nyì râ nghut é shinggan mauchut hkaû má, dú htoq pyám keq.’ gâ ri.

14Hkâsu mù gâ le, byù myo myo gi, ji yu é hui kôlhang, hkyin yù huî é bang gi, shaû ri.” gâ ri.

Kehtaq Lé Hkán Kat Byî É Hkyô

Mrk 12:13-17; Luk 20:20-26

15Hau htâng má, Hparishe pé gi, htoq ló kômù, Yhâng é dang pé má mara chyup râ hpàqchyî haq htung akô nghut ri. 16Yhángmòq gi, Herot é byu pé eq rahá, yhángmòq é chángzô pé lé, Yesuq chyáng nhang kat akô. Haú bang gi, Yesuq chyáng lé jé kômù, “Sará ê, Nàng gi, tengmán sû nghut é eq, Garai Gasâng é hkyô lé, tengmán é dông mhoqshit é sû nghut é lé le, Nàng gi, ó haî ga râ lé le haî su a ngàm sû nghut é yánmai, ó yùq é myòqdong lé le a tê byi sû nghut é hkyô lé le, ngá-mòq sê lhê. 17Haû mù, hkóséng Kehtaq lé hkán kat byî le gi, ge lhê lhú? A gè lhú? Nàng, hkâsu wó myìt é hkyô taî kyô wú aq.” ga taî akô nghut ri.

18Yesuq kúm gi, yhángmòq é agè ashop hkyô lé sé byi mù, “Gègùn labyoq kut bang ê, núngmòq gi, haî mù, Ngo lé lé chyam wú akô lhú? 19Hkán kat râ ngùn htingchap rachap, Ngo lé byî wú keq.” ga taî kat ri. Haú hkûn, yhángmòq gi, denari rachap yù byî akô. 20Haû mù, Yhang gi, yhángmòq lé, “Shí má, ó yùq é alhô eq masàt laiká dàp tô ri lhú?” ga myi jáng, 21yhángmòq gi, “Kehtaq é nghut ri.” ga tû taî akô. Haû mù, Yhang gi, yhángmòq lé, “Kehtaq é lé gi, Kehtaq lé byi keq; Garai Gasâng é lé gi, Garai Gasang lé byi keq.” ga taî kat ri.

22Haû su gâ é lé, wó gyo kôjáng, haú bang gi, maú byùq kômù, Yhâng chyáng mai htoq ló byùq bekô nghut ri.

Saduke Pé, Yesuq Lé Myî Chyam É Hkyô

Mrk 12:18-27; Luk 20:27-40

23Haú nyí má yhang, haû dum dui toq hkyô a jòq gâ é Saduke pé gi, Yesuq chyáng lé jé kômù, dangmyi lé myî akô. 24Yhángmòq myi kô é gi, “Sará ê, ‘Myiwe wó é byù rayùq gi, zodù a dàp é za shi byùq é nghut jáng, yhang gu gi, yhang mâng é awùt ashín xoq byi râ matú, yhâng rhat lé chui gon ra râ nghut lhê.’ ga, ngá-nhúng lé, Mosheq taî tô é nghut lhê. 25Hí hpyang lé, ngá-mòq chyáng, gu-mang nhiktâng wuì nyhit yùq nyi akô. Lagám yùq gi, myiwe yù luî, zodù a dàp é za yhang myi lé shi lhuî pyâm to bê nghut ri. 26Haû eq rajung za, Lanóng, Lalaq mai Lahkâ jé shoq, chuimó haú lé gon luî, ó le zodù a dàp é za shi ló byùq bùm bekô nghut ri. 27Ló htáng má, myiwe myhí haû le châng shi ló byùq bê nghut ri. 28Haû mù luî, haû dum dui toq é buìnyì má, myiwe myhí haû gi, haú nhiktâng wuì nyhit yùq mâ é hká yùq é yhang myi nghut râ lhú? Hkâsu mù gâ le, yhang gi, haú nhiktâng wuì bànshoq bâng é yhang myi dùt wú bê sû nghut ri.” gâ akô.

29Haú hkûn, Yesuq gi, yhángmòq lé, “Núngmòq gi, Chyúmdang eq Garai Gasâng é wum-o a-tsam lé a sé kô é yánmai, hkyô nghoq akô nghut ri. 30Haû dum dui toq é buìnyì má gi, myi byi myi yû hkyô jòq lo râ a nghut; yhángmòq gi, mauhkûng htoq mâ é maumang lagyô pé su dùt byùq kôrâ nghut lhê. 31Shi é mai dum dui toq bang eq séng luî, 32Garai Gasang gi, ‘Ngò gi, Abraham é Garai Gasang, Isak é Garai Gasang, Yakup é Garai Gasang nghut lhê.’#Htoq Ló 3:6 ga, núngmòq lé taî tô é lé, núngmòq a nghap wú kó lhú? Yhang gi, shi to bâng é Garai Gasang a nghut; dui nyì bâng é Garai Gasang shèq ru nghut lhê.” ga taî ri.

33Byù mòqmó gi, dang haû wó gyo kôjáng, Yhang mhoqshit é hkyô lé maú byùq bum akô nghut ri.

Ahkyàk Dìk É Jep É Târâ

Mrk 12:28-34; Luk 10:25-28

34Saduke pé lé, Yesuq lhoqzîm pyâm é hkyô lé, Hparishe pé wó gyo kôjáng, yhángmòq gi, Yesuq chyáng zùp zîng lé bum akô. 35Yhángmòq má bo é târâ sará rayùq gi, Yesuq lé chyam wú é dông, 36“Sará ê, jep é târâ má, hká lhum gi, je ahkyàk dìk lhê lhú?” ga myî ri.

37Haû mù, Yesuq gi, “‘Náng é Garai Gasang nghut é, haû Yhûmsîng Garai lé náng é i-myìt nhiklhum bànshoq, náng é i-myìt sô lhum gón, nàng myìt é hkyô bànshoq èq, chyitdàp râ lhê.’#Târâ Pun 6:5 gâ é nghut lhê. 38Târâ haû gi, je hî lhum eq je ahkyàk dìk é lhum nghut lhê. 39Hau htang lhum le haû eq du é nghut mù, ‘Náng gûng lé nàng chyitdàp é su, náng é chyáng nâm mâ é bang lé le chyitdàp àq.’#Nhông 19:18 gâ é nghut lhê. 40Târâ haû í lhum gi, jep é târâ bànshoq eq myìqhtoi laiká bànshoq é dangchyûng nghut lhê.” ga, yhang lé taî kat ri.

Hkrisidùq Gi, Ó Yùq É Yhang Zo?

Mrk 12:35-37; Luk 20:41-44

41Hparishe pé zùp zîng to kô é hkûn, Yesuq gi, yhángmòq lé, 42“Núngmòq gi, Hkrisidùq eq séng luî hkâsu myìt ngam akô lhú? Yhang gi, ó yùq é yhang zo nghut lhê lhú?” ga myi jáng, yhángmòq gi, “Dawiq é yhang zo nghut ri.” ga tû taî akô.

43Haû mù, Yhang gi, yhángmòq lé, “Haú hkûn, Dawiq gi, Sô dông mai, Yhang lé, ‘Yhûmsîng’ ga, haî mù wùt lhê lhú? Hkâsu mù gâ le, Dawiq taî é gi,

44‘Haû Yhûmsîng Garai gi, ngá é Yhûmsîng lé, “Ngò, náng é gumlau gye pé lé, náng é hkyîwa ô má tô pyâm é hkyíng jé shoq,

Ngá é lòqyo hkyam shut zung nyì shi aq.” ga taî ri.’#Hkya-on 110:1

gâ ri. 45Haû mù, Dawiq yhang lháng, Hkrisidùq lé, ‘Yhûmsîng’ gâ é nghut le gi, yhang zo za hkâsu ge nghut râ lhú?” ga taî ri. 46Haû mù, ó yùq le, dang rahkun lháng a wó tû taí lo kô é nghut mù luî, haú nyí mai, ó yùq lháng Yhang lé dangmyi a wám myi lo kó nghut ri.

Currently Selected:

Mahte 22: znot

Highlight

Copy