Lukaq 19

Yesuq Eq Zake

1Yesuq gi, Yerihko wà má wàng mù, sô laî ló nyi ri. 2Haú hkûn, haú wâ má, Zake gâ é hkán hkyuî agyì rayùq nyi ri; haú yùq gi, sùtzè wó sû nghut ri. 3Yhang gi, Yesuq hká yùq nghut é lé myàng naù kôlhang, nyhûm sû nghut é htoq agó, byù rajùm rayò chyîn chyap tô é yánmai, a wó myâng nghut ri. 4Haû mù, yhang gi, Yesuq lé wó myâng shoq ga, Yesuq laî ló râ hkyô hí shut din ê mù, hkohúm gâm htoq má ê dòq zung tô ri.

5Yesuq gi, haú jowò má jé jáng, tu wú kat luî, “Zake ê, hân gyó lô àq; hkû-nyí ngò náng yhûm má bíng râ nghut lhê.” ga taî ri. 6Haû jáng, Zake gi, hân hân gyó ló mù, gabú dìk é èq Yesuq lé lhom hkûlum yu ri.

7Haû má nyì bang bànshoq gi, haû lé myàng jáng, “Yhang gi, yubàk dàp sû rayùq chyáng bíng kut râ ga wang e ló bê.” ga luî, mara hûn dang taî nyi bum akô.

8Zake kúm gi, toq yàp mù, “Yhûmsîng Yesuq ê, ngò wó é sùtzè rawuí gû myùng bang lé gàm byî pyám râ; ngò záng mop zô pyâm é byù rayùq yùq nyi le gi, myi tú dum tau byi râ.” ga Yhûmsîng Yesuq lé taî ri.

9Haú hkûn, Yesuq gi, “Shí yùq le, Abraham é yhang zo#19:9 Abraham é yhang zo gâ é gi, Abraham su Garai Gasang lé lùmjíng é sû lé taî é nghut lhê. rayùq nghut é yánmai, hkû-nyí shí yhûm má hkyi yù hkyô jé bê, 10hkâsu mù gâ le, haû Byu Yhangzo gi, byùq byùq bê bang lé, hkat hô mù hkyi yù râ matú, jé lé sû nghut lhê.” ga luî, Zake lé taî ri.

Hkóhkam É Duìnhâng Zoshâng Raxê Yùq

Mht 25:14-30

11Haú hkyô lé, yhángmòq gyô nyi bùm kô é hkûn, Yesuq gi, Yerusalem wà mó má jé râ chyâng lò bê nghut é yánmai le, Garai Gasâng é mîngdán gi, radá dâm htoq shit lô berâ ga, byu pé myìt ngam tô bùm kô é yánmai le, dangtú ralhum dông dum taî jàt é gi, 12“Aróng wó sû byù rayùq gi, hkóhkâm ayá ê hkam yù luî, dum taû lò râ ga, wê é ming shut ê râ matú hen nyi ri. 13Haû mù, yhang gi, Yhâng é duìnhâng zoshâng raxê yùq lé wùt yù mù, rayùq lé ngùn rajoí joí àp byi luî, ‘Ngò dum taû jé lô shoq, shi èq wuìloq kut nyî láng keq.’ ga luî, yhángmòq lé pying tô ri.

14Yhâng é mingbyû wuì kúm gi, yhang lé a ngui bum é nghut mù luî, yhang e ló é htâng má, ‘Shí yùq ngá-mòq ahtoq má ùp nyì râ lé, ngá-mòq a ô naù.’ ga luî, ê taí râ matú lagyo châng nhang kat akô.

15Nghut kôlhang, yhang kúm gi, hkóhkâm ayá wó hkam yù luî, dum taû jé lô jáng, yhang ngùn àp byî tô é duìnhâng zoshâng wuì lé, wuìloq kut luî, a-myàt hkâ-myhó wó ho jàt bê hkyô lé sé naû luî, yhángmòq lé wùt nhang kat ri.

16Haú hkûn, sânghî yùq gi, lé mù luî, ‘Yhûmsîng ê, ngò, náng é ngùn rajoí mai, a-myàt raxê joí wó ho jàt yù bê.’ ga taî ri.

17Haú hkûn, yhûmsîng hpó gi, ‘Arà! Nghut bê, kyèt é duìnhâng zoshâng ê, nàng gi, je tiq é mû má lháng wó lum é sû nghut é yánmai, wà raxê lé ùp zo lo àq hkoi.’ ga luî, yhang lé taî ri.

18Htang yùq le, lé mù luî, ‘Yhûmsîng ê, ngò, náng é ngùn rajoí mai, a-myàt ngo joí wó ho jàt yù bê.’ gâ ri.

19Yhûmsîng gi, haú yùq lé, ‘Nàng gi, wà ngo wâ lé up lo àq hkoi.’ ga taî ri.

20Dum rayùq le, lé mù luî, ‘Yhûmsîng ê, náng é ngùn rajoí lé a byùq shoq, ngò pánchoq èq htup tô lhê; wú aq, shî nghut lhê. 21Nàng gi, yhûmsîng yhang a tô tô é zè pé lé yù nau é eq, yhûmsîng yhang a hô tô é yò mai yâm yù nau é sû, byù wui nghut é yánmai, nang lé ngò gyùq ri.’ ga taî ri.

22Haú hkûn, yhûmsîng gi, ‘Agè ashop é duìnhâng zoshâng ê, náng nhut mâ é dang eq rajung za, ngò, nang lé jéyáng râ nghut lhê. Ngò gi, yhûmsîng yhang a tô tô é zè pé lé yù nau é eq, yhûmsîng yhang a hô tô é yò mai yâm yù nau é sû, byù wuì nghut é hkyô lé, nàng sê to gù nghut le nhîng, 23ngá ngûn lé, ngò dum taû jé lô jáng, aráng eq a-myàt wó yû shoq, ngùn hpún kat jang má, haî mù a kat tô é lhú?’ ga yhang lé taî ri.

24Hau htâng, yhûmsîng hpó gi, ayàm má yàp tô é bang lé, ‘Haû ngùn rajoí lé yhâng chyáng mai taû yù luî, raxê joí wó sû lé jàt byi keq.’ ga taî ri.

25Haú bang gi, ‘Yhûmsîng ê, yhang gi, raxê joí wó to bê lé nhîng.’ gâ akô.

26Haû jáng, yhang gi, ‘Ngò, núngmòq lé taí kôlé, wó sû#19:26 Wó sû gâ é gi, yhûmsing a-tsam lé rago dàt chûng sû lé taî é nghut lhê. ó yùq le, jàt byî é hui shirâ nghut lhê; a wó su chyáng mai kúm gi, yhang wó tô é lé lháng, yu pyám byi shirâ nghut lhê. 27Ahkuî, yhángmòq ahtoq má ngò hkóhkâm kut râ lé a ô nau é, ngá é gyè pé lé, shí má shuî lé mù, ngá hí má sat pyám keq.’ ga hkunmó hkyô kat ri.” gâ ri.

Yesuq Loze Ji Mù, Yerusalem Wà Mó Shut Wang E Ló É Hkyô

Mht 21:1-11; Mrk 11:1-11; Yhn 12:12-19

28Yesuq gi, shí hkyô pé lé ban taí jáng, hí má so luî, Yerusalem wà mó shut dòq ló nyi ri. 29Yesuq gi, Yhâng é chángzô pé eq Tsanlun bùm mâ é Bet-hpage wà eq Behtani wà má jé ló kôjáng, Yhâng é chángzo í yùq lé, 30“Núngnhik, hí mâ é wà má ê keq; wà haú má wang é hkûn jáng, ó le a jî wú shî é loze zo tuî tô láng é lé, ê myâng kôrâ nghut lhê; haû lé hpyi yù mù, Ngá chyáng she lò keq. 31Byù rayùq yùq mai, ‘Haû haî mù hpyi nyi akô?’ ga núngnhik lé myi kôjáng, ‘Shí du lé, haû Yhûmsîng râ ri gâ.’ nghû tû taí keq.” ga pyîng luî, nhang kat ri.

32Nhang kat é su nhik ê jé le, Yesuq taî kat é dông yhang, dùt to láng é lé ê myang akô. 33Yhángnhik loze zo haú lé hpyi nyì kô é hkûn, yhûmsîng wuì gi, “Haû loze zo lé, haî mù hpyi nyi akô lhú?” ga luî, yhángnhik lé myî akô.

34Haû jáng, yhángnhik gi, “Shí du lé haû Yhûmsîng râ ri gâ.” ga taî akô.

35Yhángnhik gi, haû loze zo lé Yesuq chyáng she lò mù, yhángmòq é buhîng pé lé loze ahtoq má zùngnhe kut byi luî, Yesuq lé dòq ji nhang akô. 36Haû su kut, Yhang jî e ló nyi le, byu pé gi, yhángmòq é buhîng pé lé hkyô má hkang byî akô.

37Ahkuî, Tsanlun bùm hkêgyó gyó ló é jowò eq chyâng lo é mai gi, chángzô pé bànshoq bang, yhángmòq myang é làklaí alhô agàn pê é yánmai, gabú myìt mai htê mó o mó èq Garai Gasang lé hkya-on kô é dang gi,

38“Haû Yhûmsing é myìng mai jé lé lo é hkóhkâm gi, hkungsô wó nyî sháng gàq ô!#Hkya-on 118:26 Mauhkûng htoq má, nguì ngón nyî sháng gàq ô!

Htoq tsáng myhâng má, Garai Gasang gi, hpungwup shingkang bo nyì sháng gàq ô!”

gâ akô.

39Haû mù luî, haû byù hpûng hkaû má bo é Hparishe pé ra-am gi, “Sará ê, náng é chángzô pé lé tân pyám aq.” ga luî, Yesuq lé taî akô.

40Haú hkûn, Yesuq gi, “Ngò, núngmòq lé taí kôlé, shí bang zim za nyì kó é nghut le gi, lùqgòk pé garû lô râ nghut lhê.” ga tû taî ri.

41Ahkuî, Yesuq, Yerusalem wà mó eq chyâng lò luî, wà mó haû lé myàng jáng, haû wà mó é matú ngaù mù, taî é gi, 42“Wà nàng ê! Hkû-nyí lhê é buìnyì má, nguì ngón é hkyô lé nàng bûn sé tô é nghut le gi, gè râ wá! Ahkuî kúm gi, haú hkyô lé nghop to bê nghut mù luî, nàng a sé lo nghut ri. 43Hkâsu mù gâ le, náng chyáng Garai Gasang lé jé kûm é hkûn, nàng a bun a sé wú kat é yánmai, náng é gyè pé gi, awui ayàm má gyèwap xuq mù, náng é lhînghkyùq mai nang lé lom tô é buìnyì jé lô râ nghut lhê. 44Haú hkûn, nang lé lhoqhtên pyám luî, nungzô pé lé le, haú ahkaû má yhang dûn nhê pyet sat pyám bekô râ; nàng gi, lùqgòk racham htoq má racham lháng a kê lhum loshoq, dùt byùq râ nghut lhê.” gâ ri.

Yesuq, Noqkuq Yhûm Lé Sêng Pyâm É Hkyô

Mht 21:12-17; Mrk 11:15-19; Yhn 2:13-22

45Ahkuî, Yesuq gi, Yerusalem noqkuq yhûm má wàng mù, ung zo ung shuq é bang lé, “‘Ngá yhûm gi, kyûdung yhûm dùt râ nghut lhê.’#Esai 56:7 ga kâ to kôlhang, 46núngmòq gi, jowò shî lé ‘da-myàq hkyûng’#Yer 7:11 kut akô.” ga taí uchyang, hkat htoq pyâm ri.

47Yhang gi, nyí wuî noqkuq yhûm má mhoqshit nyi ri. Hkyangjong agyi pé, târâ sará pé eq, byu pê é sûwún wuî kúm gi, Yhang lé wó sat pyám râ hkyô ho nyi akô. 48Nghut kôlhang, byù bànshoq bang gi, Yhang mhoqshit é dang lé gyô nau nyì kô é yánmai, wó sat râ hkyô lé, a myang hô kó nghut ri.

Currently Selected:

Lukaq 19: znot

Highlight

Copy