Habakuk 3
3
Habakuk É Kyûdung Dang
1Jihkyang dang dông, myìqhtoi Habakuk kyûdûng é dang.
2Yhûmsîng Garai ê, ngò gi, Náng é hkyô hû é lé wó gyô é nghut mù,
Nàng kut é múzó pé lé gyùq hong nyi ri.
Yhûmsîng Garai ê, ngá-mòq é i-pyàt má haú pé dum kut htoq àq;
ngá-mòq é buìnyì pé má haú pé lé sê gyo nhâng àq;
nhikmó-yo kôlhang, shogyo nhikmyin hkyô lé myìtbun aq.
3Garai Gasang gi, Teman mau mai lé lô mù,
Chyoiyúng Sû gi, Paran Bùm mai htoq lô bê nghut ri. Sela#3:3 Shi é lichyúm haî nghut é gi, ó a sé. Nghut kôlhang, htêyung eq sêng é dang nghut râ nghut lhê.
Yhâng é hpungwup shingkang gi, mauhkûng má nghop mù,
Yhang lé hkya-on kúngton é hkyô gi, myìdàm htoq má byíng zan tô ri.
4Yhâng é hkìkhkâm hkyô gi, buì su tso htoq lô mù,
Yhâng é lòq mai buìloq htoq lo ri;
hau é a-ô má Yhâng é hpungwup a-tsam jòq tô ri.
5Wúm gi, Yhâng é hí má e ló mù,
nòlì nòjàng gi, Yhâng é hkyîbyè má châng tô ri.
6Yhang gi, yàp mù, myìdàm htoq lé lhoqnhûn ri;
Yhang gi, wú mù, byù myû wuì lé gyùq nán nhang ri.
A-nham lhê é bùm pé gi, gyòp byùq mù,
ru joq gîng nyi é kong pé gi, lêng ngòp byùq bê nghut ri;
nghut kôlhang, Yhang gi, ahtum abyùq rajung za ru kut nyi ri.
7Ngò gi, Hkushan ming mâ é zúm pé myìt myo ûng wôm é hkyô lé myang ri;
Midi-an mâ é pán-gyang gi, gyùq nán nyi ri.
8Yhûmsîng Garai ê, Nàng gi, wuì mó lâng pé lé nhikjum yô nyì bê lhú?
Nàng gi, wuì zo làng pé lé nhikmó-yô nyì bê lhú?
Nàng gi, ûngmyuq hkyô wó râ matú,
Náng é myang pé eq Náng é gyèlhêng pé má jî é hkûn,
wuìshuq lung-aû lé nhikmó-yô lhê lhú?
9Nàng gi, Náng é lai yu htoq shit mù, myoshi myo myo bìk râ hen ri. Sela
Nàng gi, myìdàm htoq lé, wuìlàng pé eq gam hkoq bê nghut ri.
10Bùm pé gi, Nang lé myàng mù gyùq nán bum akô.
Wuìgyùn mó pé laî ló bê nghut ri;
nìk dik é jowò gi, mying hum mù,
wuìlhêng pé lé myhâng shoq lhoqtoq ri.
11Náng é lhâm, lam lam dùq wìk nyì mù,
Nàng bìk htoq é myoshi pé wìk wìk dùq nyi é yánmai,
buì eq lha-mó gi, mauhkûng má jâng nô tô ri.
12Nàng gi, nhikmó-yô é mai myìdàm htoq má sô yông wún mù,
nhikjum yô é mai byù myû wuì lé nâng pyeq pyâm ri.
13Nàng gi, Náng é namngón xû but sû lé le,
Náng é byù myû lé le, hkyi xe yù râ matú htoq lé bê nghut ri.
Nàng gi, agè ashop bâng é maumyî mâ é ushuq lé lhoqhkyop pyám mù,
yhâng é ulhum mai hkyî jé shoq de de dùt nhang to bê nghut ri. Sela
14Nàng gi, ngá-mòq lé lhoqpyo pyám râ matú,
yhâng é sârhe pé laìdun mó su htoq lé kô é hkûn, yhâng é lham èq yhang,
yhâng é gyèzô pê é ulhum lé htaû ròt byi bê nghut ri;
yhángmòq gi, asho awui haq nyi tô é bang lé myui pyám râ ga,
gabú myìt tuî nyi bum akô nghut ri.
15Nàng gi, Náng é myang pé dông,
wuìshuq lung-aû mâ é wuìlhêng mó pé lé nâng pyeq lai bê nghut ri.
16Ngò gi, haú hkyô lé wó gyo jáng, ngá é singguq htûng ri;
myìng htê hau é yánmai, ngá é nhutwuî gi, kòk kòk nán bê nghut ri;
ngá é showui showang pé gi, wôm ló byùq mù,
ngá é hkyî pé gi, nán byùq bê nghut ri;
nghut kôlhang, ngò gi, ngá-mòq lé majan lé zan râ nghut é byù myû chyáng,
wuîhke jamjau hpu zo hkyô jé é buìnyì lé myìt hîng hîng láng nyî râ nghut lhê.
17Hkohúm gâm gi, abu a bu,
tsibyiq nuî pé gi, ashi a zui,
tsanlun gàm gi, akôm za yùq to,
yò pé le gùq a htoq,
sau hkup má sau a lúng,
no hkup má no a nyì dùt kôle,
18ngò gi, haû Yhûmsîng Garaî chyáng gabú byam chyu râ nghut lhê;
ngò gi, ngo lé Hkyi yù Sû Garai Gasâng chyáng gabú myìt ngón râ nghut lhê.
19Haû Ahko Ahkáng lhúnglháng wó Sû Yhûmsîng Garai gi, ngá é wum-o nghut ri;
Yhang gi, ngá é hkyî lé, xat hkyî su dùt nhâng mù,
ngo lé, myhang é jowò pé má wó yàp nhang ri.
Htêyung ushuq kut su é matú; ngá é tíng pé má wó bàt é jidang.
Currently Selected:
Habakuk 3: znot
Highlight
Share
Copy
Want to have your highlights saved across all your devices? Sign up or sign in
© 2025, Wycliffe Bible Translators, Inc.
