Ezekela 47
47
Noqkuq Yhûm Mai Yui Htoq É Wuìlàng
1Hau htâng, yhang gi, ngo lé, noqkuq yhûm hkum má shuî taû ló é nghut mù, ngò gi, noqkuq yhûm hau é hkumtáng mai buìhtoq hkyam shut yui ló é wuì lé myang ri; noqkuq yhûm yhûmhkun gi, buìhtoq hkyam shut hu tô é nghut ri. Wuì gi, noqkuq yhum é maupyî hkyam mai yui htoq lô mù, hkungga gyàp é maupyî hkyam shut yui ló ri. 2Hau htâng, yhang gi, ngo lé, mautsûng hkum mai shuî htoq ló mù, shinggan má sô lhîng nhâng luî, buìhtoq hkyam shut hu tô é sânghî pyâm hkum má jé é hkûn, ngò gi, maupyî hkyam mai wuì yui nyi é lé myang ri.
3Yhang gi, lòq má kê é tui chûng mù, buìhtoq hkyam shut ê luî, rahkyîng dúng kê yù mù, kôchangchap jé é wuì mai ngo lé sô lai nhang ri. 4Yhang gi, gótû rahkyîng dúng dum kê yù mù, hkyîhput jé é wuì mai ngo lé sô lai nhang ri. Yhang gi, gótû rahkyîng dúng dum kê yù mù, hpyidum jé é wuì mai ngo lé sô lai nhang ri. 5Yhang gi, gótû rahkyîng dúng dum kê yu ri; nghut kôlhang, ahkuî gi, ngò a wó gû dàp é wuìlàng dùt byùq bê nghut ri; wuì gi, toq lô mù, ó yùq le a wó gû dàp é wuìlàng dùt luî, wuìli lî dàp râ é wuìlàng dùt byùq bê nghut ri. 6Haú hkûn, yhang gi, ngo lé, “Byù zo ê, nàng, haú lé myang ri lhú?” ga myî ri.
Hau htâng, yhang gi, ngo lé, wuìlàng yàm má dum shuî taû ló ri. 7Ngò gi, haú má jé ló é hkûn, wuìlàng yàm he hpoq shí hpoq shut sikgâm myo myo yùq tô bum é le myang ri. 8Haú hkûn, yhang gi, ngo lé, “Wuì shî gi, buìhtoq hkyam mau shut yui ló mù, Araba pá má yui laî ló luî, Xo Nhông má yui wang ló é nghut lhê; wuì haû Xo Nhông má yui wang ló é hkûn, xo wuî gi, nghâm byùq râ nghut lhê. 9Wuìlàng haû yui é jowò hkangmó má, kângsoq bo é dui jung ajùm ayò nyì râ nghut lhê. Wuì haû gi, yui nyì mù, xo wuî lé nghám nhang é yánmai, ngozô pé le gyai myo shoq nyì râ nghut lhê; haû mù, wuìlàng haû yui é jang má jung hkangmó kângsoq duì râ nghut lhê. 10Ngozo kóng zo bang gi, nhông yàm cháng mù yàp bùm kôrâ nghut lhê; En Gedi jowò mai En Egilim jowò jé shoq gi, gùn dú lhap jowò pé dùt râ nghut lhê. Ngozô pé a-myû myû le, Medihteri-an Wuimau mâ é ngozo su gyai myo râ nghut lhê. 11Nghut kôlhang, ga-po yò eq hkabap má gi, nghâm é wuì dùt râ a nghut; haú pé gi, xo yù râ jowò dùt shirâ nghut lhê. 12Shigâm a-myû myû gi, wuìlàng yàm hé hpoq shí hpoq má yùq râ nghut lhê; haú pê é ahaq le a nyhui, ashi le a woî byùq dùt râ nghut lhê. Wuìlàng haû gi, sân-yúng jowò mai shigâm haú pé má yui jé é nghut mù, shigâm haú pé gi, lhôhkyap hkangmó ashi asik zui byi râ nghut lhê. Ashi gi, zoshuq dùt mù, ahaq gi, nòhpyo yâ gè râ matú dùt râ nghut lhê.” ga taî ri.
Maukyo Pé
13Haû Ahko Ahkáng lhúnglháng wó Sû Yhûmsîng Garai shî su ga taî ri; “Isira-elaq a-myû up raxe í up má cháng luî, yhángmòq é silî wunlî maumyî dông núngmòq gàm râ maukyo pé gi, shí dông nghut lhê; Yosep gi, gàmbùm í gâmbùm wó yû râ nghut lhê. 14Núngmòq gi, maumyî haú lé rawuí wuí za gàm ra kôrâ nghut lhê. Núngmòq é îchyí îwâ pé lé maumyî haû byi râ nghû, Ngò lòq tû luî, dâkam to bê nghut é yánmai, maumyî haû gi, núngmòq é silî wunlî maumyî dùt râ nghut lhê.
15Maumyî hau é maukyo pé gi, a-ô mâ é eq rajung za nghut lhê; mautsûng hkyam mâ é maukyo gi, Medihteri-an Wuimau mai Hetlon hkyô dông Lebo Hamat mai lai luî Zedat jowò má jé, 16haú mai, Damasikuq eq Hamat mau gyoro má jòq é Berohta eq Sibra-im jé, haú mai, Hauran maukyo má jòq é Hazera Hatikon lháng jé shoq nghut ri. 17Haû mù, maukyo haû gi, wuìshuq lung-aû mai Damasikuq é mautsûng maukyo cháng luî, Hazara Enan jé shoq lam é nghut ri; mautsûng hkyam má gi, Hamat é maukyo jé shoq nghut ri. Haû gi, mautsûng hkyam mâ é maukyo nghut ri.
18Buìhtoq hkyam mâ é maukyo gi, Hauran eq Damasikuq gyoro mai gyó ló luî, Gile-at eq Isira-elaq mîngdán gyoro mâ é Yodan wuìlàng cháng mù, Xo Nhông má jé luî, haú mai Tamari jé shoq nghut ri. Haû gi, buìhtoq hkyam mâ é maukyo nghut ri.
19Maupyî hkyam mâ é maukyo gi, Tamari mai gyó ló luî, Meriba Kadesha mâ é wuìbúm jé mù, haú mai Egutuq ming mâ é Wuìlàng jé luî, Medihteri-an Wuimau jé shoq nghut ri. Haû gi, maupyî hkyam mâ é maukyo nghut ri.
20Buìwàng hkyam mâ é maukyo gi, Medihteri-an Wuimau maukyo nghut mù, maupyî hkyam achyûn mai Lebo Hamat tû-tap jé shoq nghut ri. Haû gi, buìwàng hkyam mâ é maukyo nghut ri.
21Haû mù, núngmòq gi, maumyî shî lé, Isira-elaq a-myû up pé má cháng luî chôm gàm ra kôrâ nghut lhê. 22Núngmòq gi, núngmòq é matú le, núngmòq chyáng bo nyì mù, yhûmhtu mù luî zoshâng wó é byù bíng pê é matú le, silî wunlî maumyî myang hkam yù shoq, hkyîn shosé shê luî haú lé gàm ra kôrâ nghut lhê. Núngmòq gi, byù bíng haú bang lé, haú ming má hku lé é Isira-elaq zodù wuì dông sôn yù ra kôrâ nghut lhê. Yhángmòq gi, Isira-elaq a-myû up bang eq rahá, silî wunlî maumyî myang hkam yù kôrâ nghut lhê. 23A-myû up hká up má nghut kôlhang, byù bíng pé bo nyi tô é nghut jáng, haú má, yhángmòq lé silî wunlî maumyî gàm byi ra kôrâ nghut lhê.” gâ ri. Haû gi, Ahko Ahkáng lhúnglháng wó Sû Yhûmsîng Garai taî pyo ri.
Currently Selected:
Ezekela 47: znot
Highlight
Share
Compare
Copy
Want to have your highlights saved across all your devices? Sign up or sign in
© 2025, Wycliffe Bible Translators, Inc.
