Htoq Ló 39

Hkyangjong Mèbu Pé

1Haû sân-yúng jowò má dójaú é hkûn wùt râ matú, yhángmòq gi, mauhkûng nyuì nyui é, mê é eq zam zam ne é hkyîng pé lé mèbu pé wòq akô. Hau htoq agó, yhángmòq gi, haû Yhûmsîng Garai mai Mosheq lé hkunmó hkyô tô é eq rajung za, Arun é matú chyoiyúng mèbu le wòq byî akô nghut ri.

Hkyangjong Bu-kó

2Yhángmòq gi, hîng hkyîng, mauhkûng nyuì nyui é, mê é eq zam zam ne é hkying èq wáng dui tô é nú nhâm é jihkyîng pé chûng mù, hkyangjong bu-kó hkyup akô. 3Yhángmòq gi, haû hîng lé bàt pyên yu é along lé hkyîng yâm yù mù, mauhkûng nyuì nyui é, mê é eq zam zam ne é hkyîng eq nú nhâm é jihkyîng pé lé, lòqmú kûng é byu pé dông nyhô saî akô. 4Yhángmòq gi, haú lé tuî xoq lhum râ matú, hau é í chyûn shut gòqsân má tui râ tui tsing saî tap tô akô. 5Haú lé hit to râ lòqmú bo é hpyihit lé gi, hkyangjong bu-kó eq ralong za kut luî, hîng hkyîng, mauhkûng nyuì nyui é, mê é eq zam zam ne é hkying èq wáng dui tô é nú nhâm é jihkyîng pé chûng mù, haû Yhûmsîng Garai mai Mosheq lé hkunmó hkyô tô é eq rajung za wòq tô akô nghut ri.

6Yhángmòq gi, nyhaú myòqjí su dùt jung lungsêng í cham lé yù mù, hîng lànghkang zo má kat luî, Isira-elaq é yhang zo yùqzô pê é myìng pé lé, dizìk lé su kyûng kâ tô akô. 7Hau htâng, yhángmòq gi, haû Yhûmsîng Garai mai Mosheq lé hkunmó hkyô tô é eq rajung za, lùqgòk haû í cham lé, Isira-elaq é yhang zo yùqzô pê é matú, myìtbun masàt lùqgòk dông hkyangjong bu-kó í chyûn shut gòqsân tui má tuî tap tô akô nghut ri.

Wànggò Long

8Yhángmòq gi, lòqmú kúng su é lòq dông wànggò long saî akô. Haû hkyangjong bu-kó lé saî é su, hîng hkyîng, mauhkûng nyuì nyui é, mê é eq zam zam ne é hkying èq wáng dui tô é nú nhâm é jihkyîng pé chûng mù, haú lé wòq akô nghut ri. 9Wànggò long haû gi, myí chyun é rawuí wuí za bo mù, í pyâm dùt luî, hîng hpyang rahto èq í shi, làm hpyang rahto èq í shi bò ri. 10Hau htâng, yhángmòq gi, haú má gù bò lungsêng pé myi yán tap akô. Sânghî yán má gi, ne jung lungsêng, huî muí muí é su dùt jung lungsêng eq myek-yoi gâ é wuimau nyuì su dùt jung lungsêng pé tap tô akô; 11í yán yán nghû râ má gi, mhan-haq nyuî su dùt jung lungsêng, mauhkûng nyuì lungsêng eq jòqtoq wum bo é lungsêng pé tap tô akô; 12sum yán yán nghû râ má gi, mhan-haq nyuî eq mauhkûng nyuì nyhô tô é su dùt jung lungsêng nghut é wakintu, hpyu é eq myi-tse isâm nyhô tô é su dùt jung lungsêng eq me me dùt jung lungsêng nghut é htihtu-nila pé tap tô akô; 13myi yán yán nghû râ má gi, bó huî hui é jung lungsêng nghut é utohpaya, nyhaú myòqjí su dùt jung lungsêng eq huhpé lungsêng pé tap tô akô. Haú pé bànshoq lé, hîng lànghkang zo má kat tô akô. 14Haú pé gi, Isira-elaq é yhang zo yùqzô pé raxe í yùq é myìng má cháng mù, lungsêng raxe í cham nghut luî, dizìk dông, byùhú raxe í hû é myìng lé racham má rahú kut kyûng tap tô akô nghut ri.

15Wànggò long hau é matú, tui kut râ dông, hîng gyíng lé tuijâng saî akô nghut ri. 16Yhángmòq gi, hîng lànghkang zo í lhum eq hîng góng í lhum saí kômù, hîng góng haû í lhum lé, wànggò long hau é achyûn í chyûn má tap tô akô. 17Yhángmòq gi, hîng tuijâng haû í hkat lé, wànggò lông é achyûn í chyûn mâ é hîng góng má tuî tap to kômù, 18tuijâng haû í hkat é ahtâng lé, haû lànghkang zo í lhum má kat kôluî, hí shut mâ é hkyangjong bu-kô é gòqsân tui má lhâng tô akô nghut ri. 19Yhángmòq gi, hîng góng í lhum saí kômù, hkyangjong bu-kó eq záng é wànggò long ahtê pyâm mâ é a-ô chyûn í chyûn má tap tô akô. 20Hau htâng, yhángmòq gi, hîng góng í hkat saî jàt kômù, hkyangjong bu-kô é hpyihit ahtoq, hkyup xoq lhûm tô é a-nàm, haû hkyangjong bu-kó hí mâ é tui htâng má tap tô akô. 21Yhángmòq gi, haû Yhûmsîng Garai mai Mosheq lé hkunmó hkyô tô é eq rajung za, hkyangjong bu-kó mai wànggò long làp làp a lhâng htoq byùq râ matú, wànggò long mâ é agóng í góng lé hpyihit eq xoq lhum luî, hkyangjong bu-kó mâ é agóng í góng má, mauhkûng nyuì isâm htoq é tuî èq tuî tap tô akô nghut ri.

Gótû Hkyangjong Buhîng Pé

22Yhángmòq gi, hkyangjong bu-kó eq sêng é bumó buhîng lé, wòqgan wòq su é lòqmú dông, mauhkûng nyuì isâm pân èq wòq kômù, 23agùng má dong htong kôluî, dong haû a jèq byùq râ matú, dong hau é lhînghkyùq má wòq dúng tô akô. 24Yhángmòq gi, buhîng hau é ahtâng lhînghkyùq má, mauhkûng nyuì nyui é, mê é eq zam zam ne é hkyîng èq wáng dui tô é nú nhâm é jîhkying èq lungshi cham pé saî tap akô. 25Hau htoq agó, yhángmòq gi, hîng gyíng chyû zo saî yù kômù, lungshi cham haú pê é gyoro ro lhînghkyùq má tap tô akô nghut ri. 26Chyû zo haú pé eq lungshi cham haú pé gi, haû Yhûmsîng Garai mai Mosheq lé hkunmó hkyô tô é eq rajung, dójaú é hkûn wùt râ matú, rachâm htâng má rajung racham kut, buhîng hau é ahtâng lhînghkyùq má tap tô akô nghut ri.

27Yhángmòq gi, Arun eq yhang zo yùqzô pê é matú, wòqgan wòq lòqmú dông, nú nhâm é jihkyîng lé bu wòq kômù, 28nú nhâm é jihkyîng uhtup lé le, gótû nú nhám uhtup lé le saí kôluî, wáng dui tô é nú nhâm é jihkyîng lho-tot lé le hkyup akô. 29Haû hpyihit lé gi, Yhûmsîng Garai mai Mosheq lé hkunmó hkyô tô é eq rajung za, zá htau su é lòqmú dông, wáng dui tô é nú nhâm é jihkyîng, mauhkûng nyuì nyui é, mê é eq zam zam ne é hkyîng pê èq htaû tô akô nghut ri.

30Yhángmòq gi, chyoiyúng mùqsháng along ralong lé, hîng gyíng èq saí kômù, dizìk dông, “Haû Yhûmsîng Garaî é matú chyoiyúng ri.” ga kyûng kâ tap tô akô. 31Hau htâng, yhángmòq gi, haû Yhûmsîng Garai mai Mosheq lé hkunmó hkyô tô é eq rajung za, mauhkûng nyuì isâm nghut é tui lé haú má tap kômù, htup hí má tuî tap tô akô nghut ri.

Sàksé Zúm Ban Saî É Hkyô

32Haû mù, zùphpong zúm le nghut é sàksé zúm eq sêng é múzó bànshoq bàn bê nghut ri. Isira-elaq byu pé gi, haû Yhûmsîng Garai mai Mosheq lé hkunmó hkyô tô é jung hkangmó lé roq kut bekô nghut ri. 33Yhángmòq gi, sàksé zúm lé Mosheq chyáng wàq lé byi kô é hkûn, zúm eq haú mâ é chûngzè bànshoq le, gòknghe pé, siklong pé, pyî râ sik yang pé, zìng pé eq hkoq pé lé le; 34nghop râ matú lhoqnhe tô é saulo sho-kuq, hau é ahtoq má puq nghop râ gótû gîng é sho-kuq ralong eq kyô râ pán-gyang; 35dangshikaq târâ kat tô é sàksé dò eq haú lé wàq é sik yang pé, jeju dò a-myhi; 36mùkgyàp, haú mâ é chûngzè bànshoq, haú má Tô Shit é mùk; 37hîng gyíng myi-kok tsûngjang eq haú má tsung yán tô é myibung, haú mâ é chûngzè bànshoq, myi tuq râ tsanlun xû; 38hîng hkungga gyàp, bùt râ namngón xû eq namngón shôm hkungga, zùphpong zúm hkum má lhang râ pán-gyang; 39gyi hkungga gyàp eq hau é gyi zuî long, haú lé wàq râ sik yang eq haú mâ é chûngzè bànshoq, lànghkang eq hau é zìng; 40wânghkaû gò râ pán-gyang pé eq hau é zìng pé hkoq pé, wâng hkum má lhang râ pán-gyang; wâng mâ é matú tui pé eq sangchyam pé, zùphpong zúm, sàksé zúm mâ é chûngzè bànshoq; 41hkyangjong Arun é matú chyoiyúng buhîng pé eq yhang zo yùqzô pé hkyangjong dông mú wùn wàq é hkûn wùt râ matú buhîng pé nghut é, sân-yúng jowò má dójaú é hkûn wùt râ wòq ge tô é buhîng pé lé le wàq lé lo akô nghut ri.

42Isira-elaq byu pé gi, haû Yhûmsîng Garai mai Mosheq lé hkunmó hkyô to bê eq rajung za yhang, múzó bànshoq lé kut bekô nghut ri. 43Mosheq gi, múzó haú pé lé jep wú é hkûn, haû Yhûmsîng Garai hkunmó hkyô tô é eq rajung za, yhángmòq kut to kô é lé myàng ri. Haû mù, yhang gi, yhángmòq lé shimân byî ri.

Currently Selected:

Htoq Ló 39: znot

Highlight

Compare

Copy