Htoq Ló 31

Bezalela Eq Aholi-aba

1Hau htâng, haû Yhûmsîng Garai gi, Mosheq lé, 2“Wú aq, Ngò gi, Yudaq up mâ é Hura é yhang shu, Uri é yhang zo yùqzo Bezalela lé hkyin yù bê nghut mù, 3yhang lé, Garai Gasâng é Sô lhoqpyíng byi luî, hpàqchyî byéng-yá le, sê gyô é u-nuq le, hpàqchyî le, ajung jung dàt kut é lòqmú hpàqchyî pé le wó nhâng bê nghut lhê. 4Haû gi, hîng, ngùn eq gyi pé lé ajà jà làklaí shoq dàt saî htoq râ matú le, 5lùqgòk lé dàt hkoq dàt kyung râ matú le, sik lòqmú dàt zui saí râ matú le, gótû lòqmú ajà jà dàt saî htoq râ matú le nghut lhê. 6Hau htoq agó, Ngò gi, yhang lé garúm râ matú, Dan up mâ é Ahisamak é yhang zo yùqzo Oholi-aba lé wò byî to bê nghut lhê. Haû lòqmú hpàqchyî kung bang bànshoq lé le, Ngò, nang lé hkunmó hkyô tô é lhúnglháng wó kut kôrâ matú a-tsam byî to bê nghut lhê. 7Haû mù, yhángmòq gi, zùphpong zúm, dangshikaq târâ kat tô é sàksé dò eq hau é jeju dò a-myhi, zúm má chûng râ é gótû zè pé bànshoq nghut é, 8mùkgyàp eq haú má râ é zè pé, hîng gyíng myi-kok tsûngjang eq haú má râ é zè bànshoq, namngón jung nyhé hkungga gyàp, 9myi nyhé hkungga nhong é hkungga gyàp eq haú mâ é chûngzè bànshoq, lànghkang eq hau é tsûng hkyî pé saí ra râ nghut lhê; 10haû htoq agó, hkyangjong Arun é matú wòq é chyoiyúng buhîng eq, yhang zo yùqzô pé hkyangjong mú wùn wàq é hkûn wùt râ buhîng pé, 11bùt râ namngón xû eq Chyoiyúng é Jowò má chûng râ namngón jung lé le, Ngò, nang lé hkunmó hkyô tô é eq rajung za saí ra kôrâ nghut lhê.” ga taî ri.

Bánno Buìnyì

12Hau htâng, haû Yhûmsîng Garai gi, Mosheq lé, 13“Nàng, Isira-elaq byu pé lé, ‘Núngmòq gi, Ngò tô tô é Bánno Buìnyì lé châng nyì ra râ nghut lhê. Hkâsu mù gâ le, Ngò gi, núngmòq lé lhoqchyoi lhoqyúng sû, haû Yhûmsîng Garai nghut é hkyô lé núngmòq wó sé râ matú, jé lé lô râ pyàt bán hkangmó, núngmòq eq Ngá é gyoro má masàt alhô agàn dùt nyì râ nghut lhê.

14Bánno Buìnyì gi, núngmòq é matú chyoiyúng lhê nghut é yánmai, haú lé châng nyì keq. Haú lé lhoqbyòk pyâm é sû ó yùq nghut kôle, shî ra râ nghut lhê; haú nyí má mú zui sû ó yùq nghut kôle, yhâng é a-myû mai chyung hpyit pyâm é hui râ nghut lhê. 15Hkyuq nyí yhang mú zui ji saí râ nghut lhê; nghut kôlhang, nyhit nyí nyí gi, haû Yhûmsîng Garaî é matú chyoiyúng é nghut mù, hkyak bánnô yù râ buìnyì nghut lhê. Bánno Buìnyì má mú haî zui sû nghut kôle, shî ra râ nghut lhê. 16Haû mù, Isira-elaq byu pé gi, ahtum abyùq é dangshikaq dông, jé lé lô râ pyàt bán hkangmó má, Bánno Buìnyì haú lé châng nyì ra râ nghut lhê. 17Haû gi, Ngò eq Isira-elaq byu pê é gyoro má ahtum abyùq é masàt alhô agàn dùt nyì râ nghut lhê; hkâsu mù gâ le, haû Yhûmsîng Garai gi, mauhkûng eq myigùng lé hkyuq nyí gyoro má hpân mù, nyhit nyí nyí má bánno soq htaî yu é nghut ri.’ nghû taí aq.” ga taî ri.

18Haû Yhûmsîng Garai gi, Sinaq Bùm má Mosheq lé dang ban nyò jáng, Yhang Garai Gasâng é lòqnyhuî èq htaû kâ tô é dangshikaq târâ dàp é lùqlong í long, yhang lé byî ri.

Currently Selected:

Htoq Ló 31: znot

Highlight

Compare

Copy