Dani-elaq 12

Ló Htâng Byùq Râ Ahkyíng Pé

1Haú ahkyíng má, náng é byu pé lé mâgum nyi é maumang lagyo zau mó Mihka-elaq htoq lô râ nghut lhê. Haû mù, byù myû wuì, lé nyi hi é hkûn mai ahkuî jé shoq hkâ-nhám le a dùt htoq wú é, myìt myo ûng wôm é ahkyíng jé râ nghut lhê. Nghut kôlhang, jihpán bùk má myìng bo é, náng é byu pé yùq hkangmó gi, haú ahkyíng má hkyi xe yu é hui râ nghut lhê. 2Myìdàm htoq mâ é hpuílhup yô má yhup nân byùq é ajùm ayò gi, bûn htoq lô kôrâ nghut lhê; ra-am gi, ahtum abyùq é chyungxe wó yû mù, ra-am gi, ahtum abyùq hoq hpû é eq xânghpoq nge wó hkyô hpoî byùq é hui zo kôrâ nghut lhê. 3Hpàqchyî bò bang gi, mauhkûng dùq bang é su dùq bàng râ nghut mù, byù myo myo lé díngmán hkyô má shuî wang é bang gi, kyî pé su, ahtum abyùq dùq bang nyì râ nghut lhê. 4Nghut kôlhang, Dani-elaq ê, nàng gi, ahkyíng haû htûm byùq é hkûn jé shoq, laiká lé dîng lhûm pyám mù, dang shí pé lé dizìk htûng tap pyám aq. Byù myo myo gi, hpàqchyî wó jàt yù râ matú hê ló mhô ló kut bûm kôrâ nghut lhê.” ga taî ri.

5Haú hkûn, ngò, Dani-elaq gi, wú kat le, ngá é hí má, gótû byù í yuq, wuìlàng shí hpoq shut rayùq, hé hpoq shut rayùq kut yàp tô é lé myang ri. 6Yhángnhik mâ é rayùq gi, “Maúhpo hkyô shî ban dìk byùq râ matú, hkâ-myháng myáng râ lhú?” ga, nú nhâm é mèbu wùt mù, wuìlàng htoq má yàp tô é sû lé taî ri.

7Haú hkûn, nú nhâm é mèbu wùt mù, wuìlàng htoq má yàp tô é sû gi, mauhkûng shut lòqyò lòqpai tu toq mù, ahtum abyùq dui nyì Su é myìng lang luî, “Haû gi, ahkyíng ralhum, ahkyíng í lhum, ahkyíng rawuí gû #12:7 Ahkyíng ralhum, ahkyíng í lhum, ahkyíng rawuí gû gâ é gi, razàn, í zân, lha-mó hkyuq hkyap lé gâ é nghut lhê. myáng râ nghut lhê. Haû chyoiyúng é byu pê é wum-o a-tsam lé wó lhoqhkyop pyâm é hkûn, haú hkyô pé ban dìk byùq râ nghut lhê.” ga dâkam é lé ngò wó gyô ri.

8Ngò gi, wó gyo kôlhang, a sê gyô byùq é nghut mù, “Ngá yhûmsîng ê, haú pé bànshoq é yánmai, haî dùt htoq râ lhú?” nghû myî é nghut lhê.

9Haú hkûn, yhang gi, “Dani-elaq ê, náng é hkyô shut xoq e ló aq; hkâsu mù gâ le, ahkyíng haû htûm byùq é hkûn jé shoq, laiká lé dîng lhûm pyám mù, dang shí pé lé dizìk htûng tap pyám aq. 10Byù myo myo gi, lhoq sân-yúng é hui mù, a sansêng é a bò nhang é eq jên yúng yu é hui kôrâ nghut lhê; nghut kôlhang, agè ashop bang gi, agè ashop dùt nyì kôrâ nghut lhê. Agè ashop sû gi, sê gyo râ a nghut, nghut kôlhang, hpàqchyî bò bang gi, sê gyo kôrâ nghut lhê.

11Haû nyí wuî nhông byî é myi nyhé hkungga lé hkûm pyám mù, haû lhoqhten lhoqhpyoq é achaq achyut hkyô lé shap tô é hkûn mai, buìnyì 1290 nyí myáng râ nghut lhê. 12Haû buìnyì 1335 nyí jé shoq láng mù, wó jân é sû gi, hkungsô wó nyi ri.

13Nàng gi, ahkyíng haû htáng shoq, náng é hkyô shut xoq e ló aq. Nàng gi, myang bánno râ nghut mù, buìnyì haú pé ló htâng é hkûn, toq yàp mù, náng é gàmbùm silî wunlî lé myang hàp yù râ nghut lhê.” ga tû taî ri.

Currently Selected:

Dani-elaq 12: znot

Highlight

Copy