Lagyo 13

Baranaba Eq Sholuq, Hkyin Nhang Kat Huî É Hkyô

1Ahkuî, Anti-oku wà mó mâ é noqkuq hpúng má, myìqhtoî pé eq sará pé le lom nyi akô. Haú bang gi, Baranaba, Nigeri#13:1 Grik dông Nigeri gâ é gi, byù noq gâ é nghut lhê. gâ é Sime-on, Kuruni byù Luki, (Herot zau hpó eq zum kô lò sû) Mana‑en eq Sholuq pé nghut akô. 2Yhángmòq gi, zoshuq túm luî Yhûmsîng lé noqkuq dójaú nyi é hkûn, Chyoiyúng Sô gi, “Ngá é mû wùn wàq râ matú ji tô é Baranaba eq Sholuq nhik lé, hkyin to keq.” ga taî ri. 3Haû mù luî, yhángmòq gi, zoshuq túm luî kyûdung mù, yhángnhik ahtoq má lòq ke byi kô é htâng, yhángnhik lé nhang htoq kat akô nghut ri.

Kupru Zinlóng Má Dùt É Hkyô

4Haû mù, yhángnhik gi, Chyoiyúng So èq nhang kat é eq rajung za, Seluki wà shut gyó ló mù, haû mâ é lhaî ji luî, Kupru zinlóng má jé ló mù, 5Salami wà mó má nyi nyi é hkûn, Yudaq byu pê é târâjong pé má, Garai Gasâng é mungdang hko kyô akô. Marikuq gâ é Yohan le yhángnhik lé htuqlùq htuqbáng kut nyi ri.

6Yhángmòq gi, haû zinlóng mai laî byìt e ló mù Pahpu wà mó jé ló kô é hkûn, myìqhtoi pyoq nghut sû Bara-Yesuq gâ é Yudaq byù myòqheq sará rayùq eq htûng huî akô. 7Haú yùq gi, Serigi Poluq gâ é, myìt hpàqchyî kûng é ginwáng zau hpô é byù rayùq nghut lhê. Minggyì hpó haû gi, Garai Gasâng é mungdang gyô yù naù mù, Baranaba eq Sholuq nhik lé ji yu ri. 8Haú hkûn, myòqheq sará gâ é lichyúm dông myhîng é Eluma le gâ é Bara-Yesuq kúm gi, ginwáng zau hpó lé haû lùmjíng hkyô má a jau ló nhâng nau é nghut mù luî, yhángnhik lé lhom he tang pyâm ri. 9Haú hkûn, Poluq le gâ é Sholuq gi, Chyoiyúng Sô byíng mù, yhang lé wú tsuq to luî, 10“Myìt goí é hkyô eq hpuq lô lhik lo é hkyô bànshoq byíng tô é, nàt é yhang zo nghut sû, tengmán hkyô hkangmó é gyè hpó ê, Yhûmsing é tengmán hkyô lé a lhoqhpyoq é a wó nyî lhú? 11Ahkuî, wú aq, Yhûmsing é lòq gi, náng chyáng jé mù, nàng gi, rayòq zo buìloq a wó myang é za, myòqjìt byùq râ nghut lhê.” ga taî ri.

Haú hkûn jáng, yhâng é myòq gi, myhì-myhà ga luî mauchut tuq dùt ló byùq ri; haû mù, yhang lé shê râ byù ho sop lhing wún ri. 12Haú hkyô lé ginwáng zau hpó myàng jáng, Yhûmsîng eq sêng é mhoqshit é hkyô lé wú maú luî lùmjíng bê nghut ri.

Anti-oku Wà Mó Má Dùt É Hkyô

13Hau htâng, Poluq eq yhâng luzúm wuî gi, Pahpu wà mó mai lhaî ji mù, Pamhpuli mau mâ é Periga wà má jé ló akô. Marikuq gâ é Yohan kúm gi, yhángmòq eq gang luî, Yerusalem wà mó shut taû ló byùq bê nghut ri. 14Dum, yhángmòq gi, Periga mai toq e ló le, Pesidi ginwáng mâ é Anti-oku wà mó má jé ló akô. Bánno Buìnyì má, yhángmòq gi, târâjong má wang zung tô akô. 15Haú hkûn, Mosheq é târâ laiká eq myìqhtoi laiká pé lé ban nghap jáng, târâjong má ùp bang gi, “Gu-mang wuì ê, mingbyû wuì lé myìt wum byi dang jòq kô é nghut le gi, ahkuî taí lo keq.” ga luî, yhángmòq chyáng taí nhang kat ri.

16Haú hkûn, Poluq gi, toq yàp mù, zîm byùq kó sháng gàq ga lòq tû luî, “Isira-elaq byu pé eq Garai Gasang lé gyùq hkúnggâ é byu pé ê, chôm gyô yù keq. 17Isira-elaq byu pê é Garai Gasang gi, ngá-mòq é îchyí îkê pé lé hkyin yù bê nghut mù luî, Egutuq ming má byù bíng dùt nyi tô ashî hkûn, yhángmòq lé kô myhâng nhâng mù, hpungwup a-tsam bo é lòq èq haú mau mai shuî htoq ló ri. 18Dum, myi xê zàn kô, yòso pé má yhángmòq é a-kyang lé jân pyám byi mù, 19Hkanan ming mâ é byùhú nyhit hú lé lhoqhtên pyám luî, haú bâng é mîngdán mâ é silî wunlî yhángmòq lé gàm byî ri. Haû gi, myí sho ngo xê zàn kô myáng ri.

20Hau htâng má, Garai Gasang gi, myìqhtoi Samu-elaq é pyàt jé shoq târâ agyì pé lé to byî ri. 21Hau htâng má, yhángmòq mai hkóhkâm dung kômù, Garai Gasang gi, yhángmòq lé, Ben-yamin a-myû mâ é, Kisha é yhang zo Sholuq lé byi luî, yhang gi, myi xê zàn ùp bê nghut ri. 22Hau htâng, Sholuq lé lhoqhkyô pyám mù, Dawiq lé, yhángmòq é hkóhkâm kut nhang ri. Dawiq é hkyô lé Yhang sàksé hkâm é gi, ‘Ngò nhik dìk é Yese é yhang zo Dawiq lé myàng bê; yhang gi, ngò kut nhang é hkyô bànshoq lé kut râ nghut lhê.’ gâ ri.

23Garai Gasang gi, Yhang danghtum htûm tô é eq rajung za, Isira-elaq byu pê é matú, haú yùq é awùt ashín mai, hkyi yù Sû Yesuq lé, nyi htoq nhâng bê nghut ri. 24Yesuq a jé lé shi-má, Yohan gi, Isira-elaq byu pé bànshoq lé myìt lhîng hkyô eq sêng é baptisima hkyô lé hko kyo bê nghut ri. 25Dum Yohan gi, yhang zuî é múzó ban ló é u lé, ‘Ngo lé ó nghut é su ngam tô akô lhú? Ngò gi, haú yùq a nghut, wú keq, ngá é htâng má rayùq jé râ nghut lhê, haú yùq é hkyî-tsung tui hpyî râ lháng ngò a gíng.’ ga taî ri.

26Abraham é yhang zo yhang shû pé eq Garai Gasang lé gyùq hkúnggâ é tûngbaù, gu-mang wuì ê, shî hkyi yù hkyô mungdang lé, ngá-nhûng chyáng byî kat bê nghut ri. 27Yerusalem wà mó mâ é bang eq, yhángmòq é zau sûwún wuî gi, Yhang hkyi yù sû nghut é lé le, Bánno Buìnyì hkangmó nghap é myìqhtoî pê é dang lé le, a sê gyo kô é yánmai, Yesuq lé sat râ dòqdân é hkûn, myìqhtoî pê é dang lé lhoqdìk pyám bekô nghut ri. 28Yhâng chyáng shî gíng é mara a myàng kôlhang, Yhang lé sat pyám nhâng râ matú, Pilat chyáng dûng akô. 29Yhángmòq gi, yhang eq séng luî, kâ to má kâ to ban lhoqdìk kôjáng, Yhang lé tapzîng mai yu hkyó mù, lùp má kat tô akô nghut ri. 30Garai Gasang kúm gi, Yhang lé shi é mai lhoqdui toq yû bê nghut lhê. 31Yhang gi, Galile mau mai Yerusalem wà mó jé shoq, hí lé Yhâng htâng châng é bâng chyáng buìnyì tsómra myáng shoq htoq shit shit kut ri. Haú bang gi, ahkuî, ngá-nhúng Isira-elaq byu pê é hí má, Yhâng é sàksé dùt bekô nghut ri.

32Haû mù, í dam lhê é Hkya-on Kúngtôn Laiká má,

‘Nàng gi, Ngá zo nghut ri. Hkû-nyí, Ngò gi, Náng Wa dùt bê nghut lhê.’#Hkya-on 2:7

ga luî, kâ tô é eq rajung za, 33Garai Gasang gi, îchyí îwâ pé lé danghtum htûm tô é lé, Yesuq lé lhoqdui toq byî é dông, yhángmòq é yhang zo yhang shu ngá-mòq é matú, lhoqdìk byî é gabú danglù lé, núngmòq chyáng ngá-mòq wun lé byi bê. 34Hau htoq agó, Yhang htên byòq é hkâ-nhám a hui shoq, shi é mai lhoqdui toq yû râ hkyô eq séng luî, Garai Gasang taî é gi,

‘Dawiq lé danghtum htûm tô é eq rajung za, chyoiyúng é eq lùm gíng é jeju lé, ngò núngmòq lé byi râ nghut lhê.’#Esai 55:3

gâ ri. 35Hkya-on Kúngtôn Laiká gó wô má le,

‘Náng é Chyoiyúng Sû lé, Nàng htên byòq nhâng naù râ a nghut.’#Hkya-on 16:10

ga taî tô ri.

36Ahkuî, Dawiq gi, yhâng é pyàt bànshoq má Garai Gasang ô nau é dông ban wùn wàq jáng, shi byùq luî, îchyí îwâ pé eq rahá myhup pyám hui mù, htên byòq byùq é hui bê nghut ri. 37Garai Gasang lhoqdui toq yu é sû kúm gi, htên byòq huî é a nghut.

38Haû nghut é yánmai, gu-mang wuì ê, haú yùq mai yubàk wó hkyut pyám byî é hkyô lé, núngmòq lé hko kyô nyi é nghut é le, sê nyì keq. 39Hau htoq agó, Mosheq é târa èq mara hkyut san byî é a hui kôlhang, haú yùq lé lùmjíng é bang gi, hkyô lhumjup má mara hkyut san byî é hui râ nghut lhê. 40Hau é yánmai,

‘Wú keq, jihpoî é bang ê, maú mù luî htûm byùq keq;

núngmòq é buìnyì pé má ngò rajung jung kut htoq râ nghut lhê;

41haú hkyô lé, rayùq yùq, núngmòq lé hkaî kyo kôlhang, jíng kôrâ a nghut.’#Hbk 1:5

ga luî, myìqhtoî pé taî é dang, núngmòq má a ang sháng gàq, sidìq nyì keq.” ga hko kyô nyi ri.

42Ahkuî, Poluq eq Baranaba nhik târâjong mai htoq ló le, htâng lhê é Bánno Buìnyì má le, haú pé lé dum hkaî kyo râ matú yhángmòq chôm dûng akô. 43Chôm byo htoq ló kô é hkûn, Yudaq byu pé eq Yudaq noqkuq htûng má lhing wang lo é târâ hkúnggâ é byù myo myo gi, yhángnhik é htâng má châng bùm kô é nghut mù luî, Garai Gasâng jeju má gîng nyì râ matú, yhángnhik gi, yhángmòq lé lhoqpun lhoqkyîng akô nghut ri.

Tûngbaù Pê Chyáng Lhing Lo É Hkyô

44Hau htang lhê é Bánno Buìnyì má, Garai Gasâng é mungdang gyô yù râ matú, rawa bang alùq shoî bànshoq, lé zùp zîng tô bum akô. 45Yudaq byu pé kúm gi, byù mòqmó haú lé myàng jáng, mânon myìt baú byíng bûm kômù luî, Poluq taî é dang lé taî htîng é eq nhîng pyâm akô.

46Poluq eq Baranaba le gyùq myìt a bo é dông taî é gi, “Garai Gasâng é mungdang lé, núngmòq lé hí taî kyo râ dùt é yánmai, ngá-nhik taí bê nghut lhê. Nghut kôlhang, núngmòq gi, haû lé lhom he-ngìk pyám kômù, ahtum abyùq é chyungxe eq gíngdán é dông yhûmsing gùng lé a myìt yù kô é yánmai, wú keq, ahkuî, ngá-nhik gi, tûngbaù pê shut lhing ló berâ nghut lhê. 47Hkâsu mù gâ le, haû Yhûmsîng gi,

‘Hkyi yù hkyô lé maumyî htum shoq wó chung jé râ matú, Ngò, nàng lé tûngbaù pê é maubó dùt nhâng bê.’#Esai 49:6

ga luî, ngá-mòq lé hkunmó hkyô kat bê.” gâ ri.

48Tûngbaù pé gi, dang haû lé wó gyo kôjáng, gabú é eq Yhûmsing é mungdang lé hkya-on kúngtôn nyi bum akô. Ahtum abyùq é chyungxe lé wó râ matú hkyin to huî é lhúnglhâng bang le, lùmjíng bum akô nghut ri.

49Yhûmsîng é mungdang gi, haú ming gón jam ló bê nghut ri. 50Yudaq byu pé kúm gi, Poluq eq Baranaba nhik lé zing-ri râ matú, xânghpoq nge wó é myiwe wuì mâ é târâ hkúngga bang eq, haú wà mâ é sûwún wuî lé, nhik lhoqyo kôluî, yhángnhik lé maukyo mai chôm hkat htoq pyâm akô. 51Yhángnhik gi, yhángmòq lé a nau é hkyô tûn shit é dông, yhûmsing é hkyî mâ é hpuílhaû lé yhángmòq chyáng ko hkyô pyâm to kômù, Ikoni wà mó shut ló byùq bekô nghut ri. 52Chángzô pé kúm gi, gabú é htoq agó, Chyoiyúng Sô byíng nyi bum akô nghut ri.

Currently Selected:

Lagyo 13: znot

Highlight

Copy