Lagyo 11

Petiruq, Yhang Kut É Múzó Lé Shit Kyô É Hkyô

1Tûngbaù pé le, Garai Gasâng é mungdang lhom yù bê gâ é hkyô lé, lagyô pé eq Yuda mau pé mâ é gu-mang wuì wó gyô akô. 2Haû mù, Petiruq, Yerusalem wà mó má dòq ló é hkûn, ahpyo-kuq hpyit hkyô lé myìt zùq é lùmjíng bang gi, 3“Nàng gi, ahpyo-kuq a hpyit é bâng é yhûm má wàng mù, yhángmòq eq razo rashuq kut ri.” ga luî, yhang lé mara lhom taî hun bum akô.

4Haú hkûn, Petiruq gi, haû dùt lò bê hkyô lé awang mai ahpyo hpyot, yhángmòq lé taî sân kyô hi kat é má, 5“Ngò gi, Yopa wà mó má kyûdûng nyi le, mòq byùq ló mù shing-rán myang é gi, mauhkûng mai hpajóng mó sû é myi chyûn má zui luî, ngá shut lhoqhkyô kat é zè gyó jé lo é lé, myang ri. 6Haû lé rago za saî wú le, myigùng htoq mâ é hkyî myi hkyî dàp é jung gaunyhaú, yòsô zè, dô yê é jung eq, maulat nghoqzô pé bo tô é lé, ngò myàng luî, myìt wú nyi é hkûn, 7‘Petiruq ê, toq mù, sat zo aq.’ gâ é danghtê lé, ngò wó gyô ri.

8Ngò kúm gi, ‘Yhûmsîng ê, haû gi, a wó dùt, achaq achyut é eq a sansêng é zè, ngá é nhut má hkâ-nhám le a wang wú.’ nghû taî kat é nghut lhê.

9Haú hkûn, ‘Garai Gasang lhoqsan lhoqyúng bê zè lé, a sanséng hkâ-nghû.’ ga luî, mauhkûng mai dum taî kat ri. 10Haû su ga sum dâm taî é htâng má, haú pé bànshoq lé mauhkûng shut dum wùp yu ló bê nghut ri.

11Haú hkûn jáng, Kesare wà mó mai, ngá chyáng nhang kat é byù sum yuq gi, ngò nyi é yhûm hkúmtot má jé nyi tô akô. 12Chyoiyúng Sô gi, ngo lé, a uq-ô é za yhángmòq htâng châng ê àq ga taî ri; shî gu-mang hkyuq yùq le ngò eq rahá ê mù, Koneli é yhûm má ngá-mòq wang é. 13Haú hkûn, haú yùq gi, yhâng é yhûm má maumang lagyo lé htoq shit é hkûn, yhang hkâsu myang é hkyô lé le; maumang lagyô èq yhang lé, ‘Yopa wà mó shut byù nhang kat mù, Petiruq gâ é sû Simun lé ê jî nhâng àq; 14nàng eq náng yhûmbyù lhúnglhâng bang hkyi yù hui râ danglù, yhang, náng chyáng wun lé lô byi râ nghut lhê.’ ga taî é hkyô lé le, ngá-mòq lé taî kyô ri.

15Ngò dang taî hi ló nyi é u lé, Chyoiyúng Sô gi, sânghi lé ngá-mòq é ahtoq má gyó lé é su, yhángmòq ahtoq má le gyó lé bê nghut ri. 16Haú hkûn shèq, ngò gi, ‘Yohan gi, wuì èq wuìmyhup hkám byî ri; núngmòq kúm gi, Chyoiyúng So èq wuìmyhup hkám byî é hui kôrâ nghut lhê.’ ga luî, Yhûmsîng taî é dang lé bûn kat ri. 17Haû mù luî, Yhûmsîng Yesuq Hkrisidùq lé lùmjíng é hkûn, ngá-mòq lé Garai Gasâng jeju chyûnghuq byî é su, Yhang, yhángmòq lé le byî é nghut le gi, ngò gi, hkâsû é byù nghut luî, Garai Gasang lé wó lhom hkûm pyám râ lhú?” ga taî ri.

18Yhángmòq gi, haú hkyô lé wó gyo kôjáng, taí jang a jòq lo kômù, “Ó! Nghut bê, Garai Gasang gi, tûngbaù pé lé le, chyungxe duì râ matú myìt lhîng hkyô byi bu‑nhung!” ga luî, Garai Gasang lé chôm hkya-ôn akô nghut ri.

Anti-oku Wà Mó Mâ É Noqkuq Hpúng

19Ahkuî, Sitehpan lé sat pyám kô é htâng má, zing-ri hui kô é yánmai, byo myín ló é bang gi, Hpinisi mau, Kupru zinlóng eq Anti-oku wà mó jé shoq byo ló kômù, Yudaq byu pé lé baú za, mungdang haû hko kyô akô nghut ri. 20Nghut kôlhang, yhángmòq mâ é Kupru byù eq Kuruni byù ra-am gi, Anti-oku wà mó má châng jé ló kômù, Yhûmsîng Yesuq é gabú danglù lé, Grik pé lé le taî kyô bum akô. 21Haû Yhûmsing é lòq gi, yhángmòq eq rahá nghut nyî mù luî, byù myo myo gi, lùmjíng mù, Yhûmsing chyáng lhing wang lo bùm bekô nghut ri.

22Haú bâng é hkyô lé, Yerusalem noqkuq hpûng é no má hkyang jé ló é nghut mù luî, yhángmòq gi, Baranaba lé Anti-oku wà mó jé shoq nhang kat akô. 23Yhang jé é hkûn, Garai Gasâng jeju bo nyi é lé myàng jáng, yhang gi, gabú luî, yhángmòq é myìt nhiklhum bànshoq èq haû Yhûmsîng má lhumzuî nyì râ matú, lhúnglhâng bang lé myìt wum byî ri. 24Hkâsu mù gâ le, Baranaba gi, byù gè nghut mù, Chyoiyúng Sô le, lùmjíng myìt le byíng tô é sû nghut nyi ri. Haû mù, byù myo myo gi, haû Yhûmsing chyáng jàt wang lo bùm bekô nghut ri.

25Hau htâng, Baranaba gi, Sholuq lé ê hô râ ga Tashu wà mó shut ê mù, yhang lé myàng jáng, Anti-oku wà mó má shuî lo ri. 26Haû mù, yhángnhik gi, razàn gón noqkuq hpúng haû eq rahá zum nyì kô é nghut mù luî, byù myo myo lé wó mhoqshit akô. Chángzô pé gi, Hkrisitan gâ é myìng lé, Anti-oku wà mó má sânghi wó yù bekô nghut ri.

27Haú u lé, myìqhtoî pé ra-am gi, Yerusalem wà mó mai, Anti-oku wà mó má lé jé bum akô. 28Haú bang mâ é Agabu gâ é sû gi, toq yàp mù, Romaq mingkan gón má mùtmó gyó lô râ nghut é hkyô lé, So èq tûn shit é dông taî kyô ri. (Haû gi, hkóhkâm Kilodi é pyàt má dùt bê nghut lhê.) 29Haû mù luî, chángzô pé gi, Yuda mau mâ é gu-mang wuì lé, ó le ó wó dùt é myhó garúm kat râ ga, myìt hpyit yu bum akô. 30Haû eq rajung za kut kômù, yhángmòq gi, chyûnghuq haú pé lé Baranaba eq Sholuq nhik é lòq mai sûwún wui pê chyáng hun kat bekô nghut ri.

Currently Selected:

Lagyo 11: znot

Highlight

Copy