1 Korinhtuq 9

Lagyo Rayùq É Ahko Ahkáng

1Ngò gi, lùt sû a nghut lhú? Ngò gi, lagyo rayùq, a nghut lhú? Ngò gi, ngá-nhûng é Yhûmsîng Yesuq lé myang wú bê sû, a nghut lhú? Núngmòq gi, haû Yhûmsîng má, ngò zui saî é múzó é ashi pé chyat, a nghut kô lhú? 2Ngò gi, góbâng é lagyo a nghut kôlhang, núngmòq chyáng gè gè yhang nghut lhê! Hkâsu mù gâ le, núngmòq gi, haû Yhûmsîng má, ngò lagyo nghut é hkyô sàksé dizìk nghut bum akô.

3Ngá ahtoq má jéyáng bang lé, ngá gûng ngò taî hung kat kôlé. 4Ngá-mòq gi, zo râ shuq râ ahko ahkáng a wó é bang nghut lhê lhú? 5Gótû lagyô pé eq Yesuq é yhang gu yùqzô pé eq Kehpa kut é su, lùmjíng sû nghut é yhûmsîng myhí shuî chûng râ, ngá-mòq, ahko ahkáng a wó é nghut lhê lhú? 6Ngò eq Baranaba baú za, chyungxe duì hkyo é matú mû zui ra râ lhú?

7Ó yùq wá, yhûmsing zoshuq wùn luî, gyè mû wùn wàq râ lhú? Ó yùq wá, tsibyiq hkyâm saí mù, haú mâ é tsibyiq shi a zo kut râ lhú? Ó yùq wá, sau rém mù, sau naú a shuq kut râ lhú? 8Ngò gi, shí hkyô pé lé xângzo hkyam dông za taî é nghut lhê lhú? Haû târâ má le, rajung za taî tô lhê, a nghut lhú? 9Hkâsu mù gâ le, haû Mosheq é târâ má, “Gùq nâng nyi é no lé nhuttsung hkâ-tsûng to byi.”#Târâ Pun 25:4 ga kâ tô ri. Garai Gasang gi, no eq séng luî za chiq é nghut lhê lhú? 10Gè gè yhang, yhang gi, ngá-nhûng é matú taî é a nghut kô lhú? Nghut lhê, haû gi, ngá-nhûng é matú kâ to byî é nghut lhê. Haî mù gâ le, yò hpuq sû, yò hpuq é eq, gùq bàt sû, gùq bàt é gi, kyô chôm shû yù râ lé myòqbyù luî, kut kô é nghut lhê. 11Ngá-mòq gi, núngmòq chyáng sô a-myui sân kat bê nghut mù, núngmòq chyáng mâ é mingkan zè lé shû yu é nghut jáng, lûm myô é dùt byùq bekô lhú? 12Góbang gi, núngmòq chyáng mai garúm é ahko ahkáng wó kô é nghut jáng, ngá-mòq gi, haú lé je wó râ lhê a nghut kó lhú?

Nghut kôlhang, ngá-mòq gi, ahko ahkáng haú lé a yu é nghut lhê. Haû yù râ malaî, Hkrisidùq é gabú danglù gi, hkûm zing pyâm é a hui râ matú shèq, jung hkangmó lé ngá-mòq hkam jân nyi lhê. 13Haû noqkuq yhûm má mû zuî é bang gi, yhángmòq é zoshuq lé haû noqkuq yhûm mai wó é hkyô eq, hkungga gyàp má dójaú é bang gi, hkungga gyàp má nhông byî é ra-am lé myàng zô é hkyô lé, núngmòq a sé kô lhú? 14Haû eq rajung za, gabú danglù hko kyô é bang gi, gabú danglù hkyô mai yhángmòq é chyungxe baú râ lhê ga, haû Yhûmsîng hkunmó hkyô to bê nghut ri.

15Nghut kôlhang, ngò gi, ahko ahkáng haú pé haî lé le a yu é nghut lhê. Núngmòq, ngo lé haû su lhom kut byi râ lé myòqbyù mù, ngò, shí hkyô lé kâ é a nghut. Hkâsu mù gâ le, ngò haû su taî nghutbûn é hkyô lé, rayùq yùq lhoqhtên pyám byi râ htoq má, ngò shi byùq le lháng je ge ri. 16Nghut kôlhang, gabú danglù lé ngò hko kyô é hkûn, ngò taî nghutbun jang a jòq; hkâsu mù gâ le, haû gi, ngò a kut a ge é ngá wô nghut lhê. Haû gabú danglù lé ngò a hko kyô é nghut le gi, ngò dingnyé wó râ nghut lhê. 17Yhûmsîng nau é myìt mai ngò hko é nghut jáng, shigyaú chyûnghuq wó râ nghut lhê; yhûmsîng nau é myìt mai a nghut jáng gi, ngo lé lùm luî àp tô é lé, agon za wùn wàq nyi é dùt râ nghut lhê. 18Haû mù luî, ngá é shigyaú chyûnghuq gi, haî nghut lhê lhú ga jáng, haû gabú danglù lé hko kyô é hkûn, ngò gi, ahpau a yu é za wó àp nhông luî, gabú danglù hko kyo hkyô mâ é ngá é ahko ahkáng pé lé ngò a yu é a-myàt nghut lhê.

19Ngò gi, ó yùq é a‑ô má le a nyi é za, lùt sû nghut kôle, byù wó myô é myhó shuî lhing yù râ matú, ngá gûng ngò, yùq hkangmó é jùn kut nyi lhê. 20Ngò gi, Yudaq byu pé lé shuî lhing yù râ matú, Yudaq byu pê chyáng nghut nyi é hkûn, Yudaq byù rayùq dông dùt nyi lhê. Ngò gi, târâ hkaû má nyì sû a nghut kôlhang, târâ hkaû mâ é bang lé shuî lhing yù râ matú, târâ hkaû má nyì bâng chyáng nghut nyi é hkûn, târâ hkaû mâ é byù rayùq dông dùt nyi lhê. 21Ngò gi, târâ a wó bang lé shuî lhing yù râ matú, târâ a wó bâng chyáng nghut nyi é hkûn, târâ a wó sû rayùq dông dùt nyi lhê. Nghut kôlhang, gè gè ga jáng, Garai Gasâng é târâ mai a lùt htoq é za, Hkrisidùq é târâ hkaû má nyì sû nghut lhê. 22Ngò gi, wum nyhóm bang lé shuî lhing yù râ matú, wum nyhóm bâng chyáng nghut nyi é hkûn, wum nyhóm sû rayùq dông dùt nyi lhê. Ngò gi, wó dùt é hkyô dông mai byù ra-am lé wó hkyî sháng gàq nghû, byù lhúnglhâng bâng chyáng, byù ajà jà dông nyi nyi lhê. 23Ngò gi, gabú danglù mai wó é shimân jeju pé lé wó chôm hkam yù sháng gàq nghû, gabú danglu é yánmai haú pé bànshoq lé kut é nghut lhê.

24Dìn wum hî lhum poî má dìn râ bang bànshoq dìn kôlhang, rayùq za shigyaú chyûnghuq wó é hkyô lé, núngmòq a sé kó lhú? Chyûnghuq wó râ matú dìn keq. 25Sùp poî má wum hî lhûm é bang yùq hkangmó gi, yhûmsing gùng yhûmsîng târâ htan é dông lhoqmhân yù râ lhê. Yhángmòq gi, gîng nyì râ a nghut é jánmaú wó râ matú, haû su kut é nghut akô; nghut kôlhang, ngá-nhúng gi, ahtum abyùq gingtîng nyì râ nghut é jánmaú wó râ matú shi-kùt é nghut lhê. 26Haû mù luî, ngò gi, jum dîn din é byù rayùq su din é sû a nghut. Ngò gi, laì lé bàt é byù rayùq su, akôm má bàt é sû le a nghut. 27Ngò gi, góbâng chyáng mungdang hko é htâng má, ngá gûng ngò, shigyaú chyûnghuq eq a gíngdán sû a dùt sháng gàq nghû, ngá gûng lé gyai yhang lhoqmhân yù mù, ngá gûng lé jùn kut yu nyi lhê.

Currently Selected:

1 Korinhtuq 9: znot

Highlight

Compare

Copy