1 Korinhtuq 13

1Ngò gi, byu pé eq maumang lagyô pê é myíng pé lé sê taî é nghut kôlhang, chyitdàp myìt a bo é nghut jáng, mying hung htê bo é ut eq mying tui htê bo é chapchéng su za dùt byùq râ nghut lhê. 2Ngò gi, myìqhtoi htoî é chyûnghuq, zaú tô é hkyô pé bànshoq lé sê gyô é u-nuq, sumsé hpàqchyî bànshoq lé wó é eq, bùm pé lé wó htòt nhang é lùmjíng myìt bo é nghut kôlhang, chyitdàp myìt a bo é nghut jáng, ngò haî a nghut sû dùt berâ nghut lhê. 3Ngò gi, wó é sùtzè bànshoq myùng bang lé byî pyâm é eq, ngá é gùngdu lé nyhê pyám râ matú àp pyâm é nghut kôlhang, chyitdàp myìt a bo é nghut le gi, hai a-kyû a bò nghut ri.

4Chyitdàp myìt gi, myìt hing lhê, nú nhâm lhê. Chyitdàp myìt gi, a manôn, gyáng dang a taí, a nghutbûn é nghut lhê. 5Chyitdàp myìt gi, hpau a dàp é hkyô a kut, yhûmsing é a-kyû baú za a hô, luì za nhikjum a yo, shut é mara a xûm tô é nghut lhê. 6Chyitdàp myìt gi, agè ashop é má a gabú é za, haû tengmán hkyô má gabú nyi ri. 7Chyitdàp myìt gi, hkâ-nhám le wú mâgum ri, hkâ-nhám le lùmhkau ri, hkâ-nhám le myìt myòqbyu ri, hkâ-nhám le hkam jân ri.

8Chyitdàp myìt gi, hkâ-nhám le htûm byùq é a nghut. Myìqhtoi htoî é hkyô pé gi, byùq byùq râ nghut lhê; làklaí dang ahú hú ge taî é hkyô gi, zîm byùq râ nghut lhê; sumsé hpàqchyî hkyô gi, laî ló byùq râ nghut lhê. 9Hkâsu mù gâ le, ngá-nhúng sê é gi, ra-am rahtâng ru nghut lhê. Ngá-nhúng myìqhtoi htoî é gi, ra-am rahtâng ru nghut lhê. 10Nghut kôlhang, gúmjùp hkyô jé lé é hkûn, a gúmjùp hkyô gi, byùq byùq râ nghut lhê. 11Ngò, zoshâng nghut ashî hkûn gi, zoshâng dông dang taí, zoshâng dông myìt, zoshâng dông myìt sôn wú é nghut lhê. Ngò, sûwún nghut jáng gi, zoshâng nyì yàp hkyô pé lé tô pyám bê nghut lhê. 12Ahkuî, ngá-nhúng gi, myòqjàm hkaû mâ é rago a sân é wùpzo lé za myang é nghut lhê; nghut kôlhang, htâng má, myòqdong hkyúm wó myâng râ nghut lhê. Ahkuî, ngò gi, ra-am rahtâng za sê é ru nghut lhê; nghut kôlhang, Garai Gasang gi, ngo lé gúmjùp shoq sê é su, ngò le, htâng má, gúmjùp shoq sé râ nghut lhê.

13Ahkuî, lùmjíng myìt, myìt myòqbyù hkyô, chyitdàp myìt shî sûm lhum myìt tô ri. Nghut kôlhang, haú pé mâ é kô dik é gi, chyitdàp myìt nghut ri.

Currently Selected:

1 Korinhtuq 13: znot

Highlight

Copy

Compare