SAN JUAN 6
6
Jesús omongaru cinco mil vae reta
(Mt 14.13-21; Mc 6.30-44; Lc 9.10-17)
1Kuae jaɨkue rupi Jesús ojo Ɨguasu Galilea jovaicho pe. Jókuae ɨguasu jee vi Tiberias. 2Jare jeta vae yogüɨraja jaɨkue, echa oecha reta mɨakañɨ oyapo ombogüera imbaerasɨ vae reta yave. 3Jayave Jesús oyeupi ɨvɨtɨ re, jare oguapɨ joko pe jemimboe reta ndive. 4Jare köiño ma ou Pascua, judío reta iarete. 5Jesús iñäka omopüa omae yave, oecha jeta vae yogüeru ikotɨ. Jayave oparandu Felipe pe:
—¿Kia pe pa yaguata mbɨyape kuae reta jou vaerä?
6Jesús jei kuae oikuaa vaerä mbae ra jeita Felipe. Echa Jesús oikuaa ma mbae oyapota vae. 7Felipe jei chupe:
—Dosciento denario pegua mbɨyape vae ave ngaraa oupitɨ kuae reta jou vaerä kërai yepe.
8Jare metei Jesús jemimboe Andrés jee vae, Simón Pedro tɨvɨ jei Jesús pe:
9—Oime kuae pe metei kunumi pandepo mbɨyape cebada pegua güɨnoi vae jare mókoi jevae raɨ. Ërei jókuae mbaeä ko kuae jeta vae reta jou vaerä.
10Jayave Jesús jei:
—Peyókuai oguapɨ reta vaerä kapiiata re.
Jayave jókuae oguapɨ vae reta, oupitɨ cinco mil rupi kuimbae reta. 11Jayave Jesús oipɨɨ jókuae mbɨyape jare omee yasoropai Tumpa pe, jare omee jemimboe reta pe. Jare jemimboe reta omee oguapɨ vae reta pe. Jaeramiño vi omee jevae chupe reta, jae reta oyúe rupi. 12Jare yangapɨɨ reta ma yave, Jesús jei jemimboe reta pe:
—Pemboatɨ jembɨre vae, agüɨye vaerä oyemombo kërai ave.
13Jare jókuae pandepo mbɨyape vae güi jembɨregüe, omboatɨ reta doce kanata, opa ma okaru reta yave. 14Jare joko pe ñogüɨnoi vae reta oecha ma yave kuae mɨakañɨ Jesús oyapo vae, jei reta:
—Añetete, jae kuae jókuae ñeemombeúa outa kuae ɨvɨ pe vae.
15Jare Jesús oikuaa yogüeruta oipɨɨ reta oñono vaerä juvicha guasurä yave, ojo chugüi reta ɨvɨtɨ guasu kotɨ jaeño.
Jesús oguata ɨguasu iárambo
(Mt 14.22-27; Mc 6.45-52)
16Jare pɨ̈tu ma yave, Jesús jemimboe reta ogüeyɨ yogüɨraja ɨguasu pe. 17Oyeupi reta barco raɨ pe oasa reta vaerä ɨguasu rupi Capernaum kotɨ. Echa pɨtumimbi ma oï, jare Jesús ndeiño ou ye jae reta ñogüɨnoia pe. 18Jayave omboɨpɨ täta oyepeyu ɨvɨtu jare ɨ oyemboɨaparúa rúa. 19Jare güɨroguata reta ma yave barco raɨ pandepo kilómetro rupi, oecha Jesús oguata ou ɨ iárambo jare ou barco raɨ kotɨ. Jayave okɨɨye reta. 20Ërei Jesús jei chupe reta:
—Che ko. Agüɨye pekɨɨye.
21Jayave jae reta oyerovia reve omboyeupi Jesús barco raɨ pe, jare jupiveiño barco raɨ ojo oväe ɨvɨ jókuae yogüɨrajaa pe.
Jeta vae reta oeka Jesús
22Pɨareve pe jeta vae reta ɨguasu jovaicho peño ñogüɨnoi vae, imaendúa meteiño ko barco raɨ oï joko pe vae, jare oecha reta Jesús mbaetɨ ojo pɨpe jemimboe reta ndive. Jemimboe retaño opa yogüɨraja. 23Ërei ïru barco raɨ reta yogüeru oväe tëta guasu Tiberias güi, jókuae mbɨyape jou reta yandeYa omee yasoropai jese Tumpa pe güirea iyɨpɨ pe. 24Jare oecha reta Jesús jare jemimboe reta mbaetɨ joko pe ñogüɨnoi yave, oyeupi reta jókuae barco raɨ reta pe jare yogüɨraja Capernaum kotɨ, Jesús oeka vaerä.
Jesús, mbɨyape tekove pegua
25Jare opa oasa reta ɨguasu yave, oväe Jesús jare jei reta chupe:
—Oporomboe vae, ¿yerae ma pa reyu kuae kotɨ?
26Jayave Jesús jei chupe reta:
—Añetete che jae peve, pe reta chereeka mbɨyape peu jare peyemoangapɨɨ pɨpe ramoño, mbaetɨ chereeka mɨakañɨ peecha ramo. 27Agüɨye peparavɨkɨ tembíu mbaetɨta ɨma oiko peve vae reño. Ërei peparavɨkɨ tembíu opambae vae pegua re, jae ko tekove opambae che Kuimbaerä ayeapo vae ameeta peve vae. Echa cheRu Tumpa jaerä ko chembou.
28Jayave oparandu reta Jesús pe:
—¿Mbae pa royapota? ¿Kërai pa orepuere royapo mbaravɨkɨ reta Tumpa oipota royapo vae?
29Jayave Jesús jei:
—Tumpa oipota peyapo vae jae ko, perovia vaerä cheré. Echa jae ko chembou.
30Jayave jei reta chupe:
—¿Mbae nunga mɨakañɨ pa reyapo, roecha vaerä jare rogüɨrovia vaerä nderé? ¿Mbaembae pa reyapo? 31Oreñemuñagüe reta jou maná ñuu pe.#Ex 16.4,15. Echa Tumpa Iñee pe oyekuatía oï: “Omee jou reta mbɨyape ara pegua.”#Sal 78.24.
32Jesús jei chupe reta:
—Añetete che jae peve, Moisés eteiä ko omee peve mbɨyape ara pegua. CheRu ko añave omee peve mbɨyape añetete pegua ara güi ou vae. 33Echa mbɨyape Tumpa omee vae, jae ko jókuae ara güi ou vae. Jae omee tekove ɨvɨ pegua reta pe.
34Jare jei reta:
—OreYa, emee oreve jókuae nunga mbɨyape.
35Jesús jei chupe reta:
—Che ko jae mbɨyape tekove pegua. Oipotagüe ou chekotɨ vae ngaraa ye ma iyɨmbɨaɨ; jare oipotagüe cheré güɨrovia vae ngaraa ye ma iɨuve. 36Ërei che jae ma peve körai: Mbaetɨ perovia, yepe tëi chereecha ma. 37Opaete cheRu omee cheve vae reta yogüeruta chekotɨ; jare oipotagüe ou chekotɨ vae ngaraa amombo. 38Echa agüeyɨ ara güi ayapo vaerä chembou vae jemimbota. Mbaetɨ ayu ayapo vaerä cheremimbota. 39Jare cheRu chembou vae jemimbota ko jae, mbaetɨ vaerä amokañɨ metei ave jae omee cheve vae reta, jare amoingove ye vaerä omanogüe vae ara taɨkuegua pe. 40Jare kuae ko jae chembou vae jemimbota: Opaete omae cheré jare güɨrovia cheré vae, güɨnoi vaerä tekove opambae vae; jare che amoingove yeta ara taɨkuegua pe.
41Jayave judío reta iñeenguru Jesús re. Echa jei: “Che ko jae mbɨyape ara güi ou vae.” 42Jei reta:
—¿Jaeä pa kuae Jesús, José taɨ? Yaikuaa katu ko tu jare ichɨ. ¿Kërai pa ipuere jei: “Ara güi ko ayu”?
43Jayave Jesús jei chupe reta:
—Agüɨye peñeenguru chekotɨ. 44Ngaraa kia ou chekotɨ, cheRu chembou vae mbaetɨ güeru chekotɨ yave. Jare che amoingove yeta ara taɨkuegua pe. 45Ñeemombeúa reta jembikuatía jei körai: “Tumpa omboeta opaete vae.”#Is 54.13. Jayave, opaete oyeapɨsaka cheRu re vae, jare jae omboe vae, ou chekotɨ.
46Mbaetɨ kia oecha cheRu, jaeño che ayu Tumpa güi vae. Che aecha cheRu. 47Añetete che jae peve, cheré güɨrovia vae güɨnoi tekove opambae vae. 48Che ko jae mbɨyape tekove pegua. 49Peñemuñagüe reta jou maná ñuu pe, ërei opa omano reta. 50Che ko jae mbɨyape ara güi ou vae. Kuae mbɨyape jou vae ngaraa omano. 51Che ko jae mbɨyape oikove vae ara güi ogüeyɨ vae. Kia nunga jou kuae mbɨyape vae oikoveta jekuae avei pegua. Jare jókuae mbɨyape ameeta vae cherete ko, jae ameeta ɨvɨ pegua reta jekove re vae.
52Jayave judío reta oyoaka oyoupii:
—¿Këraita ra kuae kuimbae jouka jete yandeve?
53Jayave Jesús jei chupe reta:
—Añetete che jae peve, mbaetɨ peu che Kuimbaerä ayeapo vae jete jare jugüɨ yave, ngaraa penoi tekove opambae vae. 54Cherete jare cherugüɨ jou vae, güɨnoi tekove opambae vae, jare amoingove yeta ara taɨkuegua vae pe. 55Echa cherete jare cherugüɨ tembíu añetete vae ko. 56Cherete jare cherugüɨ jou vae oiko che ndive jare che aiko jae ndive. 57CheRu oikove vae ko chembou, jare che aikove jese. Jökoraiño vi jókuae cherete jou vae oikoveta cherupi. 58Che ko jae mbɨyape ara güi ou vae. Kuae mbɨyape mbaetɨ ko maná peñemuñagüe reta jou ñuu pe vae rami, echa jeseve jae reta opa omano. Ërei oipotagüe kuae mbɨyape jou vae, oikoveta jekuae avei pegua.
59Kuaekuae jei Jesús judío reta itupao pe, Capernaum pe oporomboe yave.
Ñee reta tekove opambae vae pegua
60Kuae oendu reta yave, jeta Jesús jemimboe reta jei oyoupe:
—Yavai yae ko kuae ñee. ¿Kia pa ikɨ̈reɨta oendu?
61Jesús oikuaa jupiegua reta iñeenguru ko jókuae ñee re yave, jei chupe reta:
—¿Jaekaviä pa peve kuae jae vae? 62¿Mbae pa peyapota che Kuimbaerä ayeapo vae chereecha yave ayeupi tenonde aikoa pe? 63Jaeño ko Espíritu omee tekove. Yanderete ipuereä omee yandeve kuae nunga tekove. Kuae amombeu peve vae Tumpa iEspíritu pegua ko jare tekove omee vae ko. 64Ërei amogüe pegüi reta mbaetɨ perovia cheré.
Echa Jesús oikuaa iyɨpɨ güive kia reta mbaetɨ güɨrovia jese jare kia ko omeeta jovaicho reta pe vae. 65Jayave jei chupe reta:
—Jáeramo amombeu ma peve ngaraa kia ou chekotɨ cheRu güi oñemeeä yave chupe.
66Jayave güive jeta jupiegua reta oyerova ye Jesús güi, mbaetɨ ma oguata reta jupíe. 67Jayave Jesús oparandu jókuae doce jemimboe reta pe:
—¿Pe reta pekɨ̈reɨ vi pa opa peo?
68Jare Simón Pedro jei chupe:
—OreYa, ¿kia re pa rojota royemboya? Ndeño ko renoi ñee tekove opambae vae pegua. 69Rogüɨrovia ma nderé jare roikuaa nde ko jae Cristo, Tumpa oikove vae Taɨ.#Mt 16.16; Mc 8.29; Lc 9.20.
70Jayave Jesús jei chupe reta:
—Che ko poparavo pe doce vae reta. Ërei oime metei pepɨte pe aña pe oyeokuai vae.
71Körai jei Judas re. Judas ko jae Simón Iscariote taɨ. Echa jae ko omboeterenga jovaicho reta pe vae; Judas ko, doce vae reta güi metei.
Currently Selected:
SAN JUAN 6: GUABD
Highlight
Share
Copy
Want to have your highlights saved across all your devices? Sign up or sign in
Biblia DC Guaraní Bolivia © Bolivian Bible Society, 2001.
SAN JUAN 6
6
Jesús omongaru cinco mil vae reta
(Mt 14.13-21; Mc 6.30-44; Lc 9.10-17)
1Kuae jaɨkue rupi Jesús ojo Ɨguasu Galilea jovaicho pe. Jókuae ɨguasu jee vi Tiberias. 2Jare jeta vae yogüɨraja jaɨkue, echa oecha reta mɨakañɨ oyapo ombogüera imbaerasɨ vae reta yave. 3Jayave Jesús oyeupi ɨvɨtɨ re, jare oguapɨ joko pe jemimboe reta ndive. 4Jare köiño ma ou Pascua, judío reta iarete. 5Jesús iñäka omopüa omae yave, oecha jeta vae yogüeru ikotɨ. Jayave oparandu Felipe pe:
—¿Kia pe pa yaguata mbɨyape kuae reta jou vaerä?
6Jesús jei kuae oikuaa vaerä mbae ra jeita Felipe. Echa Jesús oikuaa ma mbae oyapota vae. 7Felipe jei chupe:
—Dosciento denario pegua mbɨyape vae ave ngaraa oupitɨ kuae reta jou vaerä kërai yepe.
8Jare metei Jesús jemimboe Andrés jee vae, Simón Pedro tɨvɨ jei Jesús pe:
9—Oime kuae pe metei kunumi pandepo mbɨyape cebada pegua güɨnoi vae jare mókoi jevae raɨ. Ërei jókuae mbaeä ko kuae jeta vae reta jou vaerä.
10Jayave Jesús jei:
—Peyókuai oguapɨ reta vaerä kapiiata re.
Jayave jókuae oguapɨ vae reta, oupitɨ cinco mil rupi kuimbae reta. 11Jayave Jesús oipɨɨ jókuae mbɨyape jare omee yasoropai Tumpa pe, jare omee jemimboe reta pe. Jare jemimboe reta omee oguapɨ vae reta pe. Jaeramiño vi omee jevae chupe reta, jae reta oyúe rupi. 12Jare yangapɨɨ reta ma yave, Jesús jei jemimboe reta pe:
—Pemboatɨ jembɨre vae, agüɨye vaerä oyemombo kërai ave.
13Jare jókuae pandepo mbɨyape vae güi jembɨregüe, omboatɨ reta doce kanata, opa ma okaru reta yave. 14Jare joko pe ñogüɨnoi vae reta oecha ma yave kuae mɨakañɨ Jesús oyapo vae, jei reta:
—Añetete, jae kuae jókuae ñeemombeúa outa kuae ɨvɨ pe vae.
15Jare Jesús oikuaa yogüeruta oipɨɨ reta oñono vaerä juvicha guasurä yave, ojo chugüi reta ɨvɨtɨ guasu kotɨ jaeño.
Jesús oguata ɨguasu iárambo
(Mt 14.22-27; Mc 6.45-52)
16Jare pɨ̈tu ma yave, Jesús jemimboe reta ogüeyɨ yogüɨraja ɨguasu pe. 17Oyeupi reta barco raɨ pe oasa reta vaerä ɨguasu rupi Capernaum kotɨ. Echa pɨtumimbi ma oï, jare Jesús ndeiño ou ye jae reta ñogüɨnoia pe. 18Jayave omboɨpɨ täta oyepeyu ɨvɨtu jare ɨ oyemboɨaparúa rúa. 19Jare güɨroguata reta ma yave barco raɨ pandepo kilómetro rupi, oecha Jesús oguata ou ɨ iárambo jare ou barco raɨ kotɨ. Jayave okɨɨye reta. 20Ërei Jesús jei chupe reta:
—Che ko. Agüɨye pekɨɨye.
21Jayave jae reta oyerovia reve omboyeupi Jesús barco raɨ pe, jare jupiveiño barco raɨ ojo oväe ɨvɨ jókuae yogüɨrajaa pe.
Jeta vae reta oeka Jesús
22Pɨareve pe jeta vae reta ɨguasu jovaicho peño ñogüɨnoi vae, imaendúa meteiño ko barco raɨ oï joko pe vae, jare oecha reta Jesús mbaetɨ ojo pɨpe jemimboe reta ndive. Jemimboe retaño opa yogüɨraja. 23Ërei ïru barco raɨ reta yogüeru oväe tëta guasu Tiberias güi, jókuae mbɨyape jou reta yandeYa omee yasoropai jese Tumpa pe güirea iyɨpɨ pe. 24Jare oecha reta Jesús jare jemimboe reta mbaetɨ joko pe ñogüɨnoi yave, oyeupi reta jókuae barco raɨ reta pe jare yogüɨraja Capernaum kotɨ, Jesús oeka vaerä.
Jesús, mbɨyape tekove pegua
25Jare opa oasa reta ɨguasu yave, oväe Jesús jare jei reta chupe:
—Oporomboe vae, ¿yerae ma pa reyu kuae kotɨ?
26Jayave Jesús jei chupe reta:
—Añetete che jae peve, pe reta chereeka mbɨyape peu jare peyemoangapɨɨ pɨpe ramoño, mbaetɨ chereeka mɨakañɨ peecha ramo. 27Agüɨye peparavɨkɨ tembíu mbaetɨta ɨma oiko peve vae reño. Ërei peparavɨkɨ tembíu opambae vae pegua re, jae ko tekove opambae che Kuimbaerä ayeapo vae ameeta peve vae. Echa cheRu Tumpa jaerä ko chembou.
28Jayave oparandu reta Jesús pe:
—¿Mbae pa royapota? ¿Kërai pa orepuere royapo mbaravɨkɨ reta Tumpa oipota royapo vae?
29Jayave Jesús jei:
—Tumpa oipota peyapo vae jae ko, perovia vaerä cheré. Echa jae ko chembou.
30Jayave jei reta chupe:
—¿Mbae nunga mɨakañɨ pa reyapo, roecha vaerä jare rogüɨrovia vaerä nderé? ¿Mbaembae pa reyapo? 31Oreñemuñagüe reta jou maná ñuu pe.#Ex 16.4,15. Echa Tumpa Iñee pe oyekuatía oï: “Omee jou reta mbɨyape ara pegua.”#Sal 78.24.
32Jesús jei chupe reta:
—Añetete che jae peve, Moisés eteiä ko omee peve mbɨyape ara pegua. CheRu ko añave omee peve mbɨyape añetete pegua ara güi ou vae. 33Echa mbɨyape Tumpa omee vae, jae ko jókuae ara güi ou vae. Jae omee tekove ɨvɨ pegua reta pe.
34Jare jei reta:
—OreYa, emee oreve jókuae nunga mbɨyape.
35Jesús jei chupe reta:
—Che ko jae mbɨyape tekove pegua. Oipotagüe ou chekotɨ vae ngaraa ye ma iyɨmbɨaɨ; jare oipotagüe cheré güɨrovia vae ngaraa ye ma iɨuve. 36Ërei che jae ma peve körai: Mbaetɨ perovia, yepe tëi chereecha ma. 37Opaete cheRu omee cheve vae reta yogüeruta chekotɨ; jare oipotagüe ou chekotɨ vae ngaraa amombo. 38Echa agüeyɨ ara güi ayapo vaerä chembou vae jemimbota. Mbaetɨ ayu ayapo vaerä cheremimbota. 39Jare cheRu chembou vae jemimbota ko jae, mbaetɨ vaerä amokañɨ metei ave jae omee cheve vae reta, jare amoingove ye vaerä omanogüe vae ara taɨkuegua pe. 40Jare kuae ko jae chembou vae jemimbota: Opaete omae cheré jare güɨrovia cheré vae, güɨnoi vaerä tekove opambae vae; jare che amoingove yeta ara taɨkuegua pe.
41Jayave judío reta iñeenguru Jesús re. Echa jei: “Che ko jae mbɨyape ara güi ou vae.” 42Jei reta:
—¿Jaeä pa kuae Jesús, José taɨ? Yaikuaa katu ko tu jare ichɨ. ¿Kërai pa ipuere jei: “Ara güi ko ayu”?
43Jayave Jesús jei chupe reta:
—Agüɨye peñeenguru chekotɨ. 44Ngaraa kia ou chekotɨ, cheRu chembou vae mbaetɨ güeru chekotɨ yave. Jare che amoingove yeta ara taɨkuegua pe. 45Ñeemombeúa reta jembikuatía jei körai: “Tumpa omboeta opaete vae.”#Is 54.13. Jayave, opaete oyeapɨsaka cheRu re vae, jare jae omboe vae, ou chekotɨ.
46Mbaetɨ kia oecha cheRu, jaeño che ayu Tumpa güi vae. Che aecha cheRu. 47Añetete che jae peve, cheré güɨrovia vae güɨnoi tekove opambae vae. 48Che ko jae mbɨyape tekove pegua. 49Peñemuñagüe reta jou maná ñuu pe, ërei opa omano reta. 50Che ko jae mbɨyape ara güi ou vae. Kuae mbɨyape jou vae ngaraa omano. 51Che ko jae mbɨyape oikove vae ara güi ogüeyɨ vae. Kia nunga jou kuae mbɨyape vae oikoveta jekuae avei pegua. Jare jókuae mbɨyape ameeta vae cherete ko, jae ameeta ɨvɨ pegua reta jekove re vae.
52Jayave judío reta oyoaka oyoupii:
—¿Këraita ra kuae kuimbae jouka jete yandeve?
53Jayave Jesús jei chupe reta:
—Añetete che jae peve, mbaetɨ peu che Kuimbaerä ayeapo vae jete jare jugüɨ yave, ngaraa penoi tekove opambae vae. 54Cherete jare cherugüɨ jou vae, güɨnoi tekove opambae vae, jare amoingove yeta ara taɨkuegua vae pe. 55Echa cherete jare cherugüɨ tembíu añetete vae ko. 56Cherete jare cherugüɨ jou vae oiko che ndive jare che aiko jae ndive. 57CheRu oikove vae ko chembou, jare che aikove jese. Jökoraiño vi jókuae cherete jou vae oikoveta cherupi. 58Che ko jae mbɨyape ara güi ou vae. Kuae mbɨyape mbaetɨ ko maná peñemuñagüe reta jou ñuu pe vae rami, echa jeseve jae reta opa omano. Ërei oipotagüe kuae mbɨyape jou vae, oikoveta jekuae avei pegua.
59Kuaekuae jei Jesús judío reta itupao pe, Capernaum pe oporomboe yave.
Ñee reta tekove opambae vae pegua
60Kuae oendu reta yave, jeta Jesús jemimboe reta jei oyoupe:
—Yavai yae ko kuae ñee. ¿Kia pa ikɨ̈reɨta oendu?
61Jesús oikuaa jupiegua reta iñeenguru ko jókuae ñee re yave, jei chupe reta:
—¿Jaekaviä pa peve kuae jae vae? 62¿Mbae pa peyapota che Kuimbaerä ayeapo vae chereecha yave ayeupi tenonde aikoa pe? 63Jaeño ko Espíritu omee tekove. Yanderete ipuereä omee yandeve kuae nunga tekove. Kuae amombeu peve vae Tumpa iEspíritu pegua ko jare tekove omee vae ko. 64Ërei amogüe pegüi reta mbaetɨ perovia cheré.
Echa Jesús oikuaa iyɨpɨ güive kia reta mbaetɨ güɨrovia jese jare kia ko omeeta jovaicho reta pe vae. 65Jayave jei chupe reta:
—Jáeramo amombeu ma peve ngaraa kia ou chekotɨ cheRu güi oñemeeä yave chupe.
66Jayave güive jeta jupiegua reta oyerova ye Jesús güi, mbaetɨ ma oguata reta jupíe. 67Jayave Jesús oparandu jókuae doce jemimboe reta pe:
—¿Pe reta pekɨ̈reɨ vi pa opa peo?
68Jare Simón Pedro jei chupe:
—OreYa, ¿kia re pa rojota royemboya? Ndeño ko renoi ñee tekove opambae vae pegua. 69Rogüɨrovia ma nderé jare roikuaa nde ko jae Cristo, Tumpa oikove vae Taɨ.#Mt 16.16; Mc 8.29; Lc 9.20.
70Jayave Jesús jei chupe reta:
—Che ko poparavo pe doce vae reta. Ërei oime metei pepɨte pe aña pe oyeokuai vae.
71Körai jei Judas re. Judas ko jae Simón Iscariote taɨ. Echa jae ko omboeterenga jovaicho reta pe vae; Judas ko, doce vae reta güi metei.
Currently Selected:
:
Highlight
Share
Copy
Want to have your highlights saved across all your devices? Sign up or sign in
Biblia DC Guaraní Bolivia © Bolivian Bible Society, 2001.