Galesia 5

E Kristo e hapurese raiou ra

1E Kristo e purese ba raia ra tara Lo turu Jiu. Na limiou go tagala tala iam batema katunun kukui puku lel uami tara Lo turu Jiu.

2Hengo iam. Alia e Pol e hatei ragi limiou, te hapö moua limiou be Kristo tema antunan taguhu ranoui limiou. 3Alia e ranga lel pon gia i tamilimiou, a katuun te poeiena nonei ega hapö ega kukute hakapa nitöa talein a man Lo hoboto turu Jiu. 4A katuun te kukute sile nei a Lo turu Jiu tega matskö uaien i matana e Sunahan, nonei e luba nena a peisanen tere Kristo. E Sunahan ema antunan hanige neien. 5Kaba tara nitagala turu Namnamei u Göagono bara te hamana ra tere Sunahan. Bara te hahalosera tego ngö meraien ra u katuun u matskö. 6Te hamana ria ra tere Iesu Kristo, a markato turu hapö a ka pinopino. A töa ka lasi te panina: aragi ngil koru a Tsunono bate ngil hasera a tana katuun, ba markato teka te hatagalena u nihamana i tarara tara Tsunono.

7Alimiou u kato haniga mam koru iam. Kaba esi te hapiou raiou limiou tegoma hengo mena milimiou u raranga u mana? 8U mar hakats teka ema butu meia tere Sunahan te ngö raiou limiou. 9A tsitabubun is e tatei kato hapanena a man beret hoboto. 10Na e Sunahan e hahune nou esi a katuun te kato hatutu ranou limiou. Kaba lia e hamanegu a Tsunono e taguhu ranou limiou ba limiou temar hakats uamou temar hakats uagu lia.

11A matsi hahatoulana i tar, tego hatei noahas merai lia u katuun egi hapö, ba taraha tsiponi ba nori te kato homi noahas ria i tar? Na tego hatei merai lia u katuun egi hapö, bara ba u raranga tara kuruse tema tatei kato homie nei u hakhakats i taren. 12Alia e ngilegu u katuun teka te kato hatutu rariou limiou egi hapolasa ba nitöa raiou limiou!

13Kaba alimiou a matsi hahatoulana, e Sunahan e ngö sil rai limiou tego hapolasa ba mena milimiou a Lo. Kaba u raranga teka ema ranga nanei alimiou go pekoeiam a Lo bate kukute lase miou u ngilngilina i puta. E möa. Kaba e Sunahan e hapurese sil rai limiou tego hiangilngil uaiam limiou bate hiatagtaguhu miou. 14Taraha, u mamana u raranga hoboto tara Lo e kana iahana u töa puku u raranga teka: alö go mar ngil menai a tana katuun temar ngil has mena milö a peisa mölö. 15Kaba te kato here rami limiou u muki bate hiakatokato homi miou, alimiou go hanei iam! Alimiou ena mots hiakatokato homi nitöamiou, ba tema hiakaka haniga mi.

U ngil turu Namnamei na u ngilina i puta

16Alia e hatei ragi limiou, alimiou go hengo hanigeiam u Namnamei u Göagono tere Sunahan tara mamanaka te katoe milimiou, ba limiou tema kukutiemi u ngilngilina i puta. 17Taraha, u ngilngilina i puta e roron hiatatung mena u ngilngil turu Namnamei tere Sunahan, na u ngilngil turu Namnamei tere Sunahan e roron hiatatung has mena u ngilngilina i puta. Nori ema ron hianiganiga ri, ba limiou tema antunan katoe moi a ka te ngilin katoe milimiou. 18Kaba te mam rana limiou u Namnamei tere Sunahan, alimiou ema ka lel mia i kopina a Lo turu Jiu.

19U ngilngilina i puta e kato raiena u katuun bate katoeier a man markato a man omi: a markato te tsikolo uaier, na te kaka gono pinopino merari a pal tson na touhaliou, bate ronga taleria a peisaren tara markato a omi. 20Bate hatsunoner a got gamogamo bate katoeier a markatona turu matuna, bate hia o omir, hiatatungur, hiaraharahar, hiatoritori homir, na markato te tara ngil uaier, na hiakaka polasa na hiatagtagala. Bate hakats peisa las ner a manka i taren. 21Nori e hakats homi rer a palaier u katuun na nori e spakir bate hirata homir, bate katoeier a mamana markato a omi te markato uana teka. A man markato teka nonei a man markato turu ngilngilina i puta. Alia u hatei mam raiou limiou i manasa na lia e hatei lel pon ragou limiou i romana: u katuun te markato uaier teka ema antunan tasu roi tara Nipepeito tere Sunahan.

22Kaba u Namnamei tere Sunahan e roron hatakei ranoura, bate katoera a markato te hiangilngil uaier na te taguhu merari a palaier u katuun na te sasaala uaier, na te hiakaka haniga uaier, na tegima raharaha boroboro uai, na te ngil menari a tana katuun bate kato hanigeier, na markato tegi kato hamana menaira a ka te ranga nerara tsi a ka te hakats nerara. 23Ara e tuatami raia turu katuun, nara e haka puteiera u ngilngil i peisarara. A man markato teka nonei a markato turu Namnamei tere Sunahan, na e möa ta lo tega hapioun a man markato teka. 24Na u katuun te ka uaier tere Kristo, a mamana markato a omi hoboto i taren na u ngilngilina i puta, nori i hakute gono meien e Kristo tara kuruse me matena. 25U Namnamei tere Sunahan e hala ranei ra a nitöatöa, na ragi kukutie ien tara man markato hoboto i tarara. 26Ara gima tatei pei ara u katuun u kapan. Na ra gima tatei kato haraharahei a tabi bate hia o omira. E möa.

Currently Selected:

Galesia 5: HLA 2020

Highlight

Copy