Ifyacitilwe 21
21
1Ili twalekene naŵo, nekwimo'lwendo mubwato, twaliluŋgeme nekufika kuKoso; ŋgamailo nakuLodo; pakufumo'ko, nakuPatala. 2Popele, ili twabwene ubwato ŵulukwaŵuka ukulukuya kucalo caŵaPoinike, twaliicile-mo nekuyo'lwendo. 3Lomba, ili twaficile pakuŵona nikuKupilo, twalikuposele kucipiko, nekwenda ukulukuya kuSilya, nekutuntucila paTulo; pakuti popele apo epo bwalukufwaya ubwato ukutulila ifipe. 4Peŋka, pakuŵona aŵasambile, twalilinsisye popele apo insiku sisanu nasiŵili. Aŵo ŵalilaŵile kuli Paulu muMupasi ati, tekunyanta-mo amakasa muJelusalemi. 5Popele apo, ili twasilisye insiku isyo, twalifumine-ko nekuyo'lwendo lwesu; naŵo ŵonse pamo neŵakasi ŵaŵo neŵana ŵalitusindicisye, ili tatuŋgafuma mumusi; popele twalifukeme pacito, nekutembela; 6nekulayana; eli twaicile namubwato; sombi ŵo ŵalibwelele kwaŵo.
7Pakusilo'lwendo lwakufuma ku'Tulo, twalificile kuTolemayi; popele twaliŵasekelele aŵakwasu, nekulukwikele naŵo akasuŵa kamo. 8Ŋgamailo twalikumbulucile nekufika nakuKaisalia. Popele twaliinjile muŋanda yakwe Filipo uwakutulisya, umbi peŵumbalyaŵaŵo aŵali ŵasanu naŵaŵili, nekulukwikele nakwe. 9Uyo-muntu wali neŵana aŵanakasi ŵane, awatawaŋgopwa, aŵalukusimika. 10Lomba, pakwikala fweŵo kopele uko insiku isinji, kwaliisile ukufuma kucalo caŵena-Juda uwakusimika umbi, uwailicilwe ati niAgabo. 11Uyo aliisile kuli fweŵo, nekuwula umusipi wakwe Paulu, nekulikaka kumolu nakumaŵoko, nekulaŵila ati: Ifi ulukulaŵila Umupasi Uswetelele ati: Fyopele'fyo aŵaJuda aŵakuJelusalemi efi ŵakamukaka umwine wamusipi uyu, nekumuposa muminwe yaŵenafyalo. 12Peŋka, ili twaumfwile'fyo-fintu, fweŵo naŵaŵo aŵakoko twalimukombetele Paulu ati: Tekuya kuJelusalemi! 13Peŋka'po Paulu aliasucile ati: Mulukucite'ndo, ukulukulila, nekumfumyo'mutima? Pakuti nasumina, tekukakwa kweŋka, sombi kaŵili nekufwila kuJelusalemi, pakuti pesina lyaŵaSikulu Yesu! 14Popele, ili alukukana ukutekenesiwa, twalicilekele, ili tulaŵila ati: Ukufwaya kwaŵaSikulu kucitwe!
15Panuma yansiku isyo twaliŵulile ifipinto fyesu; lomba tulukuya kujelusalemi. 16Kaŵili ŵaliile nafweŵo ŵambi aŵasambile aŵakuKaisalia, nekupinta naMunasoni uwakuKupilo, umusambile wakale, ati tukekale nakwe kwaŵo.
17Lomba, ili twaficile kuJelusalemi, aŵakwasu ŵalitupokelele nekutemwa. 18Naŋgamailo Paulu aliinjile pamo nafweŵo kuli Jakobo; kaŵili eko ŵali aŵakulu ŵonse. 19Popele, ili aŵasekelele, aliŵulisisye nekufipendulula cimo cimo ifyo-fintu ifyacitile ŵaLesa pakati paŵenafyalo kumilimo yakwe. 20Naŵo, pakufyumfwa ŵaliŵalemesye ŵaLesa, nekulawila kuli Paulu ati:
Wemukwasu, waŵona ati muŵaJuda muli aŵantu amasausande aenji aŵacetekele; naŵaŵo ŵonse ŵali nemuŋkonsya pakuti pamafunde akwe Mose. 21Kaŵili ŵaliumfwile ifyakuli weŵo ati ulukuŵasambisya aŵaJuda ŵonse aŵali pakati paŵenafyalo ati ŋgawaleke Mose, nekuŵaŵula ati: Tekuŵakopola aŵana ŵenu, neli kulukukulonda ukwisiŵila uko. 22Mbanindo lomba? A ŵo ŵakomfwa icine ati waisa. 23Pakuti pali fyefyo ucite'fi ifi tulukukuŵula. Tuli neŵalalume ŵane aŵali necakulapa. 24Uŵapoke aŵa, ukaliswesye pamo naŵo, uŵalambule ati ŵaŵeye namumitwi yaŵo; popele ŵonse ŵakesiŵa ati tafili-po fyacine ifyeŵo ifyo ifi ŵaumfwile ifyakuli weŵo; sombi ati weŵo wemwine ulenda bwino, ili ulama'mafunde. 25Sombi ifyakuŵenafyalo aŵacetekele, twalilembele, ili twafundile ati ŋgaŵaleke ifintu ifyamilambu iyakufiŵumbwaŵumbwa, nemilopa, nefinani ififwile pakufipoto'mukosi, neŵucencemesi.
26Peŋka'po Paulu aliŵapokele aŵalalume aŵo; lomba ŋgamailo, ili aliswesesye pamo naŵo, aliinjile mwitempuli, nekusimika ukusilisya kwansiku syakuswesya, ukufike'li yaposelwe imilambu pakuti pali ŵo ŵonse.
27Peŋka ili syapalamine ukukumana insiku isyo sisanu nasiŵili, aŵaJuda aŵafumine kucalo caAsya, pakumuŵona Paulu mwitempuli, ŵalilisuŋgwilile iŵumba lyonse, nekumwikata, 28ili ŵaŵilicisya ati: Mweŵantu ŵakuIsilaeli, mutofwe-ko! Uyu-muntu ewoyo usambisya aŵantu ŵonse ponse ponse ukuŵasensa aŵantu, nemafunde, nenanda ino! Nakaŵili aliletele neŵaEla mwitempuli, nekupaŵifya pantu apa apaswetelele! 29Pakuti ŵalimubwene nakwe akale Tilofimo umuEfesa mumusi, popele ŵalukulaŋguluka ati Paulu alimwinjisye namwitempuli. 30Popele nemusi wonse waliŵele necipupa; neŵantu naŵo ŵaliŵutucile nekukumaŋkana: naŵo nekumwikata Paulu, nekumukulumuna ukumufumya mwitempuli; peŋka'po napamilyaŋgo nekwisalwa.
31Popele, ili ŵalukwesya ukumwipaya, ifyeŵo fyalificile nakucilolo icikulu icakucila peŵumba lyafita, ati monse mu Jelusalemi aŵantu walukupyuŋgana. 32Naco caliŵulile ifita nefilolo fyapamyanda, nekuŵutucila kuli ŵo; naŵo, ili ŵabwene icilolo icikulu nefita, ŵalicilekele ukumupama Paulu. 33Peŋka icilolo ico icikulu calipalamine, nekumwikata, nekufiŵula ati mukakeni neminyololo iŵili; eli ciŋgepusya ati: Mboyu ninani? Wacite'ndo? 34Popele ŵambi ŵaliŵilicisye fimbi, ŵambi naŵo fimbi nafyo, aŵapakati keŵumba. Lomba, pakuti tacaisiŵile ifyacine pakuti pacipupa, calififundile ati mutwaleni kwiliŋga. 35Peŋka, ili aficile Paulu pacitantilo, lomba alipapilwe kufita, pakuti paŵumpuwa bweŵumba; 36pakuti iŵumba lyaŵantu lyalimulondele, ili liŵilicisya ati: Mufumyeni-po!
37NaPaulu, pakufwayo'kumwinjisya mwiliŋga, alilaŵile kucilolo ico icikulu ati: Ndaŵile nenu? Naco ati: Uliisi uŵuEla? 38Kansi toli muIjipiti uyo, uwasuŋgwilile aŵantu akale mukucite' fyakwalucila, nekuŵatanjilila mumpaŋga aŵakali amasausande ane? 39Sombi Paulu ati: Ndi muJuda, uwakuTaso wamucalo caCilica, uwamumusi utauli unini; ndukumukombeteleni ati munsuminine ati ndaŵile kuŵantu.
40Popele, ili camusuminine, Paulu, lomba aciimakene pacitantilo, alicilicile kukuŵoko kuŵantu. Lomba, ili caŵele celele ukwakuti, alilaŵile kuli ŵo mumulaka waŵaEbeya ati:
Currently Selected:
Ifyacitilwe 21: AAL59
Highlight
Copy
Compare
Share
Want to have your highlights saved across all your devices? Sign up or sign in
Lamba Bible Version © United Bible Societies, 1959.
Ifyacitilwe 21
21
1Ili twalekene naŵo, nekwimo'lwendo mubwato, twaliluŋgeme nekufika kuKoso; ŋgamailo nakuLodo; pakufumo'ko, nakuPatala. 2Popele, ili twabwene ubwato ŵulukwaŵuka ukulukuya kucalo caŵaPoinike, twaliicile-mo nekuyo'lwendo. 3Lomba, ili twaficile pakuŵona nikuKupilo, twalikuposele kucipiko, nekwenda ukulukuya kuSilya, nekutuntucila paTulo; pakuti popele apo epo bwalukufwaya ubwato ukutulila ifipe. 4Peŋka, pakuŵona aŵasambile, twalilinsisye popele apo insiku sisanu nasiŵili. Aŵo ŵalilaŵile kuli Paulu muMupasi ati, tekunyanta-mo amakasa muJelusalemi. 5Popele apo, ili twasilisye insiku isyo, twalifumine-ko nekuyo'lwendo lwesu; naŵo ŵonse pamo neŵakasi ŵaŵo neŵana ŵalitusindicisye, ili tatuŋgafuma mumusi; popele twalifukeme pacito, nekutembela; 6nekulayana; eli twaicile namubwato; sombi ŵo ŵalibwelele kwaŵo.
7Pakusilo'lwendo lwakufuma ku'Tulo, twalificile kuTolemayi; popele twaliŵasekelele aŵakwasu, nekulukwikele naŵo akasuŵa kamo. 8Ŋgamailo twalikumbulucile nekufika nakuKaisalia. Popele twaliinjile muŋanda yakwe Filipo uwakutulisya, umbi peŵumbalyaŵaŵo aŵali ŵasanu naŵaŵili, nekulukwikele nakwe. 9Uyo-muntu wali neŵana aŵanakasi ŵane, awatawaŋgopwa, aŵalukusimika. 10Lomba, pakwikala fweŵo kopele uko insiku isinji, kwaliisile ukufuma kucalo caŵena-Juda uwakusimika umbi, uwailicilwe ati niAgabo. 11Uyo aliisile kuli fweŵo, nekuwula umusipi wakwe Paulu, nekulikaka kumolu nakumaŵoko, nekulaŵila ati: Ifi ulukulaŵila Umupasi Uswetelele ati: Fyopele'fyo aŵaJuda aŵakuJelusalemi efi ŵakamukaka umwine wamusipi uyu, nekumuposa muminwe yaŵenafyalo. 12Peŋka, ili twaumfwile'fyo-fintu, fweŵo naŵaŵo aŵakoko twalimukombetele Paulu ati: Tekuya kuJelusalemi! 13Peŋka'po Paulu aliasucile ati: Mulukucite'ndo, ukulukulila, nekumfumyo'mutima? Pakuti nasumina, tekukakwa kweŋka, sombi kaŵili nekufwila kuJelusalemi, pakuti pesina lyaŵaSikulu Yesu! 14Popele, ili alukukana ukutekenesiwa, twalicilekele, ili tulaŵila ati: Ukufwaya kwaŵaSikulu kucitwe!
15Panuma yansiku isyo twaliŵulile ifipinto fyesu; lomba tulukuya kujelusalemi. 16Kaŵili ŵaliile nafweŵo ŵambi aŵasambile aŵakuKaisalia, nekupinta naMunasoni uwakuKupilo, umusambile wakale, ati tukekale nakwe kwaŵo.
17Lomba, ili twaficile kuJelusalemi, aŵakwasu ŵalitupokelele nekutemwa. 18Naŋgamailo Paulu aliinjile pamo nafweŵo kuli Jakobo; kaŵili eko ŵali aŵakulu ŵonse. 19Popele, ili aŵasekelele, aliŵulisisye nekufipendulula cimo cimo ifyo-fintu ifyacitile ŵaLesa pakati paŵenafyalo kumilimo yakwe. 20Naŵo, pakufyumfwa ŵaliŵalemesye ŵaLesa, nekulawila kuli Paulu ati:
Wemukwasu, waŵona ati muŵaJuda muli aŵantu amasausande aenji aŵacetekele; naŵaŵo ŵonse ŵali nemuŋkonsya pakuti pamafunde akwe Mose. 21Kaŵili ŵaliumfwile ifyakuli weŵo ati ulukuŵasambisya aŵaJuda ŵonse aŵali pakati paŵenafyalo ati ŋgawaleke Mose, nekuŵaŵula ati: Tekuŵakopola aŵana ŵenu, neli kulukukulonda ukwisiŵila uko. 22Mbanindo lomba? A ŵo ŵakomfwa icine ati waisa. 23Pakuti pali fyefyo ucite'fi ifi tulukukuŵula. Tuli neŵalalume ŵane aŵali necakulapa. 24Uŵapoke aŵa, ukaliswesye pamo naŵo, uŵalambule ati ŵaŵeye namumitwi yaŵo; popele ŵonse ŵakesiŵa ati tafili-po fyacine ifyeŵo ifyo ifi ŵaumfwile ifyakuli weŵo; sombi ati weŵo wemwine ulenda bwino, ili ulama'mafunde. 25Sombi ifyakuŵenafyalo aŵacetekele, twalilembele, ili twafundile ati ŋgaŵaleke ifintu ifyamilambu iyakufiŵumbwaŵumbwa, nemilopa, nefinani ififwile pakufipoto'mukosi, neŵucencemesi.
26Peŋka'po Paulu aliŵapokele aŵalalume aŵo; lomba ŋgamailo, ili aliswesesye pamo naŵo, aliinjile mwitempuli, nekusimika ukusilisya kwansiku syakuswesya, ukufike'li yaposelwe imilambu pakuti pali ŵo ŵonse.
27Peŋka ili syapalamine ukukumana insiku isyo sisanu nasiŵili, aŵaJuda aŵafumine kucalo caAsya, pakumuŵona Paulu mwitempuli, ŵalilisuŋgwilile iŵumba lyonse, nekumwikata, 28ili ŵaŵilicisya ati: Mweŵantu ŵakuIsilaeli, mutofwe-ko! Uyu-muntu ewoyo usambisya aŵantu ŵonse ponse ponse ukuŵasensa aŵantu, nemafunde, nenanda ino! Nakaŵili aliletele neŵaEla mwitempuli, nekupaŵifya pantu apa apaswetelele! 29Pakuti ŵalimubwene nakwe akale Tilofimo umuEfesa mumusi, popele ŵalukulaŋguluka ati Paulu alimwinjisye namwitempuli. 30Popele nemusi wonse waliŵele necipupa; neŵantu naŵo ŵaliŵutucile nekukumaŋkana: naŵo nekumwikata Paulu, nekumukulumuna ukumufumya mwitempuli; peŋka'po napamilyaŋgo nekwisalwa.
31Popele, ili ŵalukwesya ukumwipaya, ifyeŵo fyalificile nakucilolo icikulu icakucila peŵumba lyafita, ati monse mu Jelusalemi aŵantu walukupyuŋgana. 32Naco caliŵulile ifita nefilolo fyapamyanda, nekuŵutucila kuli ŵo; naŵo, ili ŵabwene icilolo icikulu nefita, ŵalicilekele ukumupama Paulu. 33Peŋka icilolo ico icikulu calipalamine, nekumwikata, nekufiŵula ati mukakeni neminyololo iŵili; eli ciŋgepusya ati: Mboyu ninani? Wacite'ndo? 34Popele ŵambi ŵaliŵilicisye fimbi, ŵambi naŵo fimbi nafyo, aŵapakati keŵumba. Lomba, pakuti tacaisiŵile ifyacine pakuti pacipupa, calififundile ati mutwaleni kwiliŋga. 35Peŋka, ili aficile Paulu pacitantilo, lomba alipapilwe kufita, pakuti paŵumpuwa bweŵumba; 36pakuti iŵumba lyaŵantu lyalimulondele, ili liŵilicisya ati: Mufumyeni-po!
37NaPaulu, pakufwayo'kumwinjisya mwiliŋga, alilaŵile kucilolo ico icikulu ati: Ndaŵile nenu? Naco ati: Uliisi uŵuEla? 38Kansi toli muIjipiti uyo, uwasuŋgwilile aŵantu akale mukucite' fyakwalucila, nekuŵatanjilila mumpaŋga aŵakali amasausande ane? 39Sombi Paulu ati: Ndi muJuda, uwakuTaso wamucalo caCilica, uwamumusi utauli unini; ndukumukombeteleni ati munsuminine ati ndaŵile kuŵantu.
40Popele, ili camusuminine, Paulu, lomba aciimakene pacitantilo, alicilicile kukuŵoko kuŵantu. Lomba, ili caŵele celele ukwakuti, alilaŵile kuli ŵo mumulaka waŵaEbeya ati:
Currently Selected:
:
Highlight
Copy
Compare
Share
Want to have your highlights saved across all your devices? Sign up or sign in
Lamba Bible Version © United Bible Societies, 1959.