JOHN 1
1
Ngao Meine Meng
1 #
Kaht 1.1; 1 Jn 1.1; Ütah 19.13; Jn 17.5. Ükong wangwante Ngao ngoh, hüyange Ngaowa Kahwang phei ngoh, hüyange Ngaowa Kahwangne ngoh. 2I Ükong wangwante muh Kahwang phei ngoh. 3#Kol 1.16; 1 Kor 8.6; Heb 1.2.Sheminlamphe I kaiye lingngai, hüyange I ye-ompe ülam ja nehoi linge yengai. Hangyin linge ngaiyangki, 4#Jn 5.26; 11.25; 14.6.I mepu üyin ngoh, hüyange I üyin-a kahtalan wangngai ne ngoh. 5#Jn 9.5; 12.46.Wangngaiye wangnyak me tee-nang, hüyange wangnyakke tüopa yemei ok.
6 #
Mk 1.4; Mt 3.1; Lk 3.3; Jn 1.19-23. Kahwang mepu shonpu kahta ja ngoh; I min John. 7I-a saki phalak jingne, wangngai jeng saki phalak, I kaiye kahta üshei ütinglak-e tamlak jingne pei. 8Wangngai I ne yeje, hüpoi tüopa wangngai jeng saki phalak jingne I pei. 9#1 Jn 2.8.Hatüowa ütingpa wangngai ne ngoh, hanghepa wangngai kahtoknyu te pei hüyange kahta üsheite teeye tam.
10I kahtoknyu me ngoh; Kahwange I kaiye kahtoknyu ling, hüyangpoi kahtoknyuwe I yeshing. 11I yoi kahtalan tangte pei, hüyangpoi I kahtalanne I yeyah. 12#Gal 3.26; Jn 3.18; 1 Jn 5.13.Hüyangpoi hangshinne I yah hüyange I min me meng tüolan te Kahwang üha ne menglak wong Iye pha. 13#Jn 3.5; 1 Pet 1.23; Jas 1.18; 1 Jn 3.9.Iman iy me puhpu yeje, mei me puhpu yeje, yejema-a kahta mongpu me puhpu yeje, hüpoi Kahwang mepu.
14 #
Rom 1.3; Gal 4.4; Phi 2.7; 1 Tim 3.16; Heb 2.14; 1 Jn 4.2. Ngao kahta ne meng hüyange teman phei ngoh. I müktishiwapu, shüpshe hei ütinge maawe teman-e ngeyangki. Ipa mepu I shaha Halom ne menge hatüo müktishiwapu Iye tüoyangki.
15 #
Jn 1.30. Johnne I jingne saki pha, hüyange üngwün, “Hatüowa taowe ao jeng iyapeih I ngohnang, Ao ü-phei te pei, hüpoi I ü-phei sheyongpupa, hangjingne tao puh shao me I ngoh.”
16 #
Kol 1.19; 2.9; Eph 1.23; Rom 5.21. Hangjingne I wangngoipu shüpshe mepu moiman ja phei me ja she Iye teman üshei moiman. 17#Jn 7.19.Hangjingne Kahwange Mosa kaiye ngaokeng pha; hüyangpoi shüpshe hei ütingpa Jesu Khrista kaiye pei. 18#Woi 33.20; Jn 6.26; 1 Jn 4.12; Jn 3.11.Aowe-o Kahwang jeje mannge. Hüyangpoi Üpa mongjang me ngohpu, halom hawe I ütahte ngaipuwe shingne tam.
Baptipa John Ngaolan
(Mt 3.1-12; Mk 1.1-8; Lk 3.1-18)
19 #
Jn 1.6. Aope Jerusalem me ngohpu Jehudilanne ngengpa hei Levilan “Nang ao shi?” she Ite tonglak jingne shonne tei Johnne hatüo ngao iyangki.
20 #
Jn 3.28. Johnne yejanpe yengoh, hüpoi ngaiphaih-e hüyange meimei-e hüke iyangki, “Taowa Khrista ne yeje.”
21 #
Mt 11.14; 16.14; Mk 9.13; Mt 17.13; Hin 18.15,18. Hüyange iman-e Ite tong, “Hümma-a nang ao shi?” “Nanga Elijah a?”
“Iye jan, tao yeje.” Iman-e tong, “Nanga Hipa a?”
Iye jan “Yeje.”
22Iman-e i, hümma-a “Nanga ao shi tomante ipha.” “Aoyinne toman shon tüolan tangte toman-e nang mepu ngao yepu yahyelak yang. Nang jeng hangke ilak shi?” 23#Isa 40.3; Mk 1.3; Mt 3.3; Lk 3.4.Johnne janne Isaia hipa ngaokih-e hüke i:
“Youngwanpa jingne tailam tingkhakke tümtüoh,
she wanwüng jengme shejawe üngwünpu ngaowünga tao ngohnang.”
24Phariseelanne-o kahta ütam shon. 25Iman-e John te tong, “Nang Messiah ne-o yeje, yejema-a Elijah ne-o yeje, yejema-a Hipa ne-o yejepute hangne nange baptipu shi?” 26#Mk 1.7-8; Mt 3.11; Lk 3.16.Johnne jan: “Taowe yengme baptinang; hüpoi numan yo me ja yonge ngohnang numan-e yeshing. 27I ü-pheite peiküki, hüyangpoi I yashom wu lanlak nehoi tao yewang.”
28 #
Jn 3.26; 10.40. Tüolan üshei Bethani me ngai, Jordan yengyin jaye kaome, ümeken me Johnne bapti.
Jesu Kahwang Nyee Üha
29 #
Jn 1.36; Isa 53.7; Lam 8.32; 1 Pet 1.19; Ütah 5.6; 1 Jn 3.5. Ünenyih Johnne I tangte Jesu peipu nge hüyange i; “Kahwang nyee üha leitüoh; aowe kahtoknyu ünu yahtei nang! 30#Jn 1.15.Taowe ao jeng hüke i, hatüowa i: ‘Kahta ja ü-pheite peinang, hüpoi I ü-phei sheyongpupa’ hangjingne tao manpuhpe I ngoh. 31I ao ne menglak taowe yeshing, hüpoi Israel te I shingne tamlak jingne, taowe yengme baptiye peinang.”
32 #
Mk 1.10; Mt 3.16; Lk 3.22. Hatüo Johnne phapu saki: “Taowe wangdang mepu Yaha awshu kih yuwe nge hüyange I me pah. 33Taowe I yeshing, hüpoi Kahwang, aowe yengme baptilak jingne tao shon, Iye üte i, ‘I ao me Yaha yuyange pah hüyange ngohpu nange nge, Yaha Üjao me baptitamlak pa-a I ngoh nang.’ ” 34Hüyange Johnne i, “Taowe hatüo ngeteki. Hüyange taowe hatüo jingne saki phawe inang hatüowa Kahwang Üha.”
Jesu Pin Üwangpalan
35 #
Lk 7.18. Üne nyih I pinlan ni phei John üne-o tüome yongyange ngoh; 36aope Iye Jesu kemme nge, Iye i, “Leihuyah, Kahwang Nyee üha tüome ngohnang!” 37I pin niye Iye ngaopu jai hüyange Jesu phei woi. 38Jesuwe lüppe yeyange lei, iman Ipheite woipu nge, hüyange imante i, “Numan-e hanghe yampu?” Iman-e jan, “Nang ümeken me ngoh nangki, rabbi?” (leppu konnyüopa) 39Iye imante i, “Kei hüyange numan-e ngelak.” Tüophei me iman I pheite woi hüyange I ngohjing nge, hüyange tüonyih I phei nyoi. Hatüo shaaji ünhipak peli paji ne ngoh.
40 #
Mt 4.18-22; Mk 1.16-20; Lk 5.2-11. John ngao jaiyange, Jesu phei te woipu ni yo me ja-a Simon Peter ünao Andrew ngoh yangki. 41#Dan 9.25; Jn 4.25.Mokhshe Andrew-e Ijei Simon tüo hüyange Ite i, “Toman-e Messiah tüoteki.” (leppu “Khrista.”) 42#Jn 21.15-17; 1 Kor 15.5; Mt 16.18.Tüophei me Iye Jesu tangte Simon woipei. Jesuwe Ite lei hüyange i, “Nang John üha Simon. Nang min Cephas she nyiklak.” (Peter min jamuh, hüyange leppu, “Longnyu.”)
Jesuwe Philip Hei Nathanael Nyikpu
43 #
Mt 10.3; Jn 6.5; 12.21; 14.8. Üne nyih Jesuwe Galilee te tailak jingne monge tüm. Iye Philip tüo hüyange Ite i, “Ü-phei woikei!” 44Sha-a Philip-a Andrew hei Peter ni ngohpu ching Bethsaida mepu ne ngoh. 45#Lk 24.27.Tüokhei Philippe Nathanael tüo hüyange Ite i: “Ao jeng Mosawe ngaokeng lai me nyan, hüyange ao jeng hipalanne-o nyan, toman-e tüoteki. I-a Nazareth mepu Joseph üha, Jesu.” 46#Jn 7.41; Mk 6.2.Nathanael Ite tong, “Nazareth mepu ümei ütam ngailak a?” Philippe jan, “Kei hüyange leitüoh.”
47Aope Jesuwe Nathanael I tangte peipu nge, I jeng Iye i, “Hatüo me ütingpa Israel. Ime hanghe ümengo yenang!” 48Nathanael-e Ite tong, “Nange hangke tao shingpu?” Jesuwe jan, “Philippe nangte nyikshao me, aope nang phukpee phangme ngoh, Taowe nang ngeyangki.” 49#Tüo 2.7; Mk 15.32; Jn 12.13.Nathanael-e jan, “Konnyüopa,” “Nanga Kahwang Üha! Nanga Israel Ahngpa!” 50Jesuwe Ite janne i, “Taowe nang te nang aope phukpee phangme ngoh Taowe ngeki she ipu jingne nange üte ütinglak nangkü a? Nange tüophei sheyong shepu toilan ngelak!” 51#Lk 3.21; Kaht 28.12.Hüyange Iye Ite i, “Taowe üting me inang; Numan-e wangdang epyange; hüyange Kahta Üha tangte Kahwang shongmokpalan ongpu hüyange tapu ngelak.”
Currently Selected:
JOHN 1: KONYBSI
Highlight
Share
Copy
Want to have your highlights saved across all your devices? Sign up or sign in
Konyak Naga Bible - ÜJAO LAITEP
Copyright © 2011 by The Bible Society of India
Used by permission. All rights reserved worldwide.