JOHN 14
14
Üpa Tangte Tailam-a Jesu
1“Numan mong tahpai. Kahwang te ütinglak tüoh; üte-o üting lakyah. 2#Jn 13.33.Üpa nok me nyoi mawe ngohnang, hüke yenang shihma-a Taowe numante ihah shepu, Tao numan jingne nyoijing tümne tainang! 3Hüyange Tao taiye numan jingne nyoijing tümküma-a, Tao leih yelak, hüyange Taowe numan ü-phei teilak, Tao ümeken me ngoh tüoken me numan-o ngohlak. 4Hüyange Tao ümekente tailak ülam numan-e shingnang.”
5 #
Jn 11.16. Thomas Ite i, “Youngwanpa, nang ümekente tai toman-e yeshing; toman-e tailam hangke shinglak?” 6#Jn 10.9; 1.4,14.Jesuwe Ite i, “Lamnyu hüyange ütingpa hüyange üyinna Tao. Tao yekai ma-a Üpa tangte aowe-o peine ye-ok. 7Numan-e Tao shingma-a, numan-e Üpa-o shinglak. Sha-a muh numan-e I shingteki hüyange ngeteki.”
8Philip-e Ite i, “Youngwanpa, toman te Üpa hüopha, hüyange toman jingne wanglak.”
9 #
Jn 12.45. Jesuwe Ite i, “Philip, Tao numan phei hüshinne ngohyahpoi, nange Tao yeshing a? Aowe Tao ngeyangki Iye Üpa ngeyangki. ‘Tomante Üpa hüopha she’ nange hangke ipu? 10Tao Üpa me ngohnang, hüyange Üpa üme ngohnang she nange üting yelak a? Taowe hanghe ngao numante inang, ‘Ü-nying nyingke ngaopu ne yemeng.’ Hüyangpoi Üpa ü-phei ngohyange Iye toi lingnang. 11#Jn 10.38.Tao Üpa phei ngohnang hüyange Üpa ü-phei ngohnangshe ü-ngaote üting lakyah. Yejema-a, toishaolan jingne nehoi üting lakyah.
12“Üting tingha me Taowe numante inang: Aowe üte ütinglak nang, hanghe toi Taowe ling, Iye hatüo linglak, hüyange tüolan toiphei sheyongpu Iye linglak: hangjingne Tao Üpa tangte tailak. 13#Mt 7.7; Jn 15.7,16; 16.23; Jas 1.5.Hüyange numan-e ü min me hangyin yulakei, hatüo Taowe linglak, tüokhei Üpa müktishiwapu Üha kaiye hüolak. 14Numan-e üte ümin me hanghe yulakei, hatüo Taowe linglak.”
Yaha Üjao Janpu
15 #
Jn 15.10; 1 Jn 5.3; 2 Jn 6. “Numan-e üte kenma-a ü-ngaokenglan numan-e jonlak. 16#Jn 14.26; 15.26; 16.7; 1 Jn 2.1.Taowe Üpate yulak, hüyange numan phei jinte ngohlak jingne Iye numante ülao nyüolei jampa ja phalak. 17Hatüowa ütingpa Yaha, kahtoknyuwe I yeyah, hangjingne kahtoknyuwe I ye-nge, hüyange shingo yeshing. Hüyangpoi numan-e I shing, hangjingne I numan phei ngohnang, hüyange numan me ngohlak.
18“Taowe numan khahlei-e ye-anglak; Tao numan tangte leih yekülak. 19#Jn 7.33.Kenja ngohyang phei me, shaaji kahtoknyuwe Tao ye-ngelak; hüyangpoi numan-e Tao ngelak: hüyange Tao üyin me ngohpu jingne, numan-o üyin ngohlak. 20Hatüo nyih me Tao Üpa me, numan üme hüyange Tao numan me ngohnang she numan-e shinglak.
21“Aowe ü ngaokenglan shingnang hüyange angnang, I üte kenpupa. Hüyange aowe üte kennang, Üpawe Ite kenlak, hüyange Taowe Ite kenlak, hüyange Taowe ü-nying nyingke Ite ütahte ngaiye hüolak.”
22 #
Lam 1.13; 10.40-41. Judas (Judas Iskariot ne yeje) Ite i, “Youngwanpa, hangne tomante nang nying nyingke ütahte ngaiye hüoyange, hüyange kahtoknyu te yehüolak?”
23 #
1 Jn 2.24; Ütah 21.3. Jesuwe Ite janne i: “Ütam-e üte kenma-a, Iye ü-ngao jailak. Üpawe Ite kenlak, hüyange toman I tangte peilak, hüyange I phei ngohlak. 24Aowe üte yeken Iye ü-ngao yejai. Numan-e hanghe ngao jainang, hatüo ü-ngao ne yeje, hüyangpoi aowe Tao shon tüopa Üpa mepu.
25“Tao numan phei ngohwante muh tüolan ngao Taowe numante ngaoyangki. 26Hüyangpoi jampupa, Yaha Üjao ao Üpawe ü-min me shonlak, Iye numante üshei nyüoleiphalak, hüyange Taowe numante iyangpu üshei teihtam phalak.
27 #
Jn 16.33; Phi 4.7; Kol 3.15; Jn 20.19. “Chingmei, Taowe numan phei angnang; ü-chingmei Taowe numante phanang. Kahtoknyuwe phapuke Taowe numan te yepha. Numan mong tahshang hüyange tahnyam. 28‘Tao, tailak hüyange numan tangte üne-o yelak,’ she Taowe numante ipu jaiyangki. Numan-e üte kenshima-a, numan mongmei hahshepu, hangjingne tao Üpa tangte tainang, hangjingne Üpa ü-phei sheyongpupa. 29#Jn 13.19.Hüyange aope hipak ngoilakei numan-e ütinglaklak jingne, tüolan khongküm ngaishao me, sha-a Taowe numante iyangki. 30#Jn 12.31.Taowe shaaji numan phei maawe min ngao, hangjingne tüopa kahtok wanglam lampa peiküki. I ü tangme wong yenang. 31#Mk 14.42; Jn 18.1.Hüyangpoi Taowe Üpate kennang she kahtoknyuwe shinglak wongpong; tüokhei Üpawe hanghe lingne tam Taowe ling.
“Yongtüoh, teman sha-a taihah.”
Currently Selected:
JOHN 14: KONYBSI
Highlight
Share
Copy
Want to have your highlights saved across all your devices? Sign up or sign in
Konyak Naga Bible - ÜJAO LAITEP
Copyright © 2011 by The Bible Society of India
Used by permission. All rights reserved worldwide.